Doctor Brants Narrenschiff/Die Lehre der Weisheit

aus Wikisource, der freien Quellensammlung
« Von Schelten und selber thun Sebastian Brant
Doctor Brants Narrenschiff
Der sorglose Narr »
fertig
Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).


[29v]

Wer gern die wißheyt hoert vnd lert
Gentzlich zuo jr sich all zyt kert
Der würt jn ewikeyt geert




Die ler der wisheyt.


Die wißheyt schrygt mit heller stym
O menschlich gschlecht myn wort vernym
Vff bschydikeyt hant acht jr kyndt
Mercken all / die jn dorheyt syndt /

[30r]

5
Suochen die ler vnd nit das gelt

Wißheyt ist besser dann all welt
Vnd alles das man wünschen mag
Stellen noch wißheyt nacht vnd tag
Nüt ist / das jr glich vff erd

10
In raetten ist wißheyt gar werdt

All sterck vnd all fürsichtikeyt
Stot zuo mir eyn / spricht die wißheyt
Durch mich / die künig hant jr kron
Durch mich / all gsatz mit reht vff ston

15
Durch mich die fürsten hant jr landt

Durch mich / all gwaelt jr rehtspruch handt
Wer mich lieb hat / den lieb ouch ich
Wer mich frü sucht / der fyndt mich
By mir ist richtuom / guot / vnd ere

20
Mich hat besessen gott der herre

Von anbegynn jn ewikeyt
Durch mich hat gott all ding bereyt
Vnd on mich ist gar nüt gemacht
Wol dem / der mich allzyt betracht

25
Dar vmb myn suen nit synt so traeg

Sellig ist der gat vff min waeg
Wer mich fyndt / der fyndt heil vnd glück
Der mich hasßt / der verdirbt gar dick
Die plag würt vber narren gan

30
Sie werdent wißheyt sehen an

Vnd den lon / der drumb ist bereit
Vnd werend wurt jn ewikeyt
Das sie jnbluotend / vnd selbst sich
In jamer nagent ewiklich