Doctor Brants Narrenschiff/Von Auffschub suchen

« Von viel Pfründen	Sebastian Brant Doctor Brants Narrenschiff	Von Frauenhüten »
fertig Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).

[39v]

Wer singt Cras Cras glich wie eyn rapp
Der blibt eyn narr biß jnn syn grapp
Morn hat er noch eyn gro^esser kapp

Von vffschlag su^ochen

Der ist eyn narr / dem gott jn gyt
Das er sich bessern soll noch hüt
Vnd soll von synen sünden lan
Eyn besser leben vohen an

[40r]

5

Vnd er jm selbs su^ocht eyn vffschlag

Vnd nymbt zyl vff eyn andern tag
Vnd singt Cras / Cras / des rappen gsang
Vnd weißt nit ob er leb so lang /
Dar durch sint narren vil verlorn

10

Die allzyt sungen / morn / morn / morn /

Was sünd an trifft / vnd narrheyt sust
Do ylt man zu^o mit grossem lust
Was gott an trifft / vnd recht ist gethon
Das will gar schwa^erlich naher gon

15

Vnd su^ocht eyn vffschlag jm allzyt

Bychten ist besser morn dann hüt
Morn went wir erst recht leren tu^on
Als spricht mancher verlorner su^on
Das selb morn / kumbt dann nyemer me

20

Es flücht vnd schmiltzt glich wie der schne

Biß das die sel nym bliben mag
So kumbt dann erst der mornig tag
So würt von we der lib gekrenckt
Das er nit an die sel gedenckt

25

Also verdurbent jn der wu^est

Der juden vil / der keyner mu^est
Noch solt gantz kumen jn das landt
Das gott verhieß mit syner handt
Wer hüt nit gschickt zu^o rüwen ist

30

Der fyndt morn me das jm gebrist

Wa^en^[1] hüt beru^efft die gottes stym
Der weißt nit / ob sy morn ru^eff jm
Der synt vil tusent yetz verlorn
Die meynten besser werden morn