Doctor Brants Narrenschiff/Von Tischzucht

« Verleumdung des Guten	Sebastian Brant Doctor Brants Narrenschiff	Von Fassnachtsnarren »
fertig Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).

[153r]

Ob disch begat man grobheyt vil
Die mann heiß narrheyt vnder wil
Von den zu^o letzst ich sagen will

Von disches vnzu^ocht

So ich all narrheyt gantz durch su^och
Setz ich billich zu^o end diß bu^och
Ettlich die man für narren acht
Der ich doch vor nit hab gedacht

[153v]

5

Dann ob sie schon eyn mißbruch hant

Do mit die hoffzucht würt geschant
Ouch grob vnd vngezogen sint
Sint sie doch nit so ga^entzlich blindt
Das erberkeyt von jn werd geletzt

10

Als die du^ont / die ich vor hab gesetzt /

Oder sie gotts dar vmb vergessen
Sunder mit drincken vnd mit essen
Sint sie vast grob / vnd vnerfaren
Das man sie heißt vnhoflich narren

15

Als die nit weschen du^ont jr hend

Wann sie zu^o disch sich setzen wend /
Oder die sich zu^o disch du^ont setzen
Vnd andere an dem sytzen letzen
Die vor jn soltten syn gesessen

20

Vernunfft / hofzu^ocht also vergessen

Das man zu^o jn mu^oß sprechen / ho /
Woluff gu^ot fründ / sitz abhar do
Loß den dar sytzen an din statt /
Oder der vor nit gbettet hat /

25

Den segen über wyn vnd brott

Ee dann das er zu^om disch hyn got /
Der ouch zu^om erst gryfft jn die schüssel
Vnd stoßt das essen jn den drüssel
Vor erbern lüten / frowen / herren

30

Die er doch solt vernünfftlich eren

Das sie zu^om ersten griffen an
Vnd nit wer zu^o vorderst dran /
Dem ouch so nott zu^o essen sy
Das er bloßt jn das mu^oß vnd bry

[154r]

35

Vnd du^ot syn backen zerblosen

Als wolt er eym eyn schür an stossen
Mancher betreifft dislach vnd kleidt
Ouch jn die blatt er wider leit
Was jm so gro^eplich ist entfallen

40

Das vnlust bringt den gesten allen

Ouch ettlich die sint also ful
Wann sie den lo^effel zu^o dem mul
Du^ont / hencken sie den offnen trüssel /
Vber die blatten mu^oß vnd schüssel

45

Was jnn entfallet dann dar nyder

Das selb kumbt jn die schissel wider
Ettlich die sint also naßwiß
Die vor hyn schmeckten an die spiß
Vnd machent mit jn ander lüt

50

Vnlustig / vnd schandbar zu^o zyt

Ettlich die küwen jn dem mundt
Vnd werffen das von jn zu^o stund
Vff dischlach / schüssel oder erd
Das mancher dar ab nymbt bo^eß werd

55

Wer von eym mundtfol gessen hat

Vnd leyt den wider jn die blatt
Oder sich leyt vff den disch
Vnd lu^ogt wo syg gu^ot fleisch vnd fisch
Ob das schon vor eym andern lytt

60

Grifft er / vnd nymbt das doch zu^o zyt

Vnd loßt das vor jm bliben eyn
Das es keym andern werd gemeyn
Den selben man eyn schlyndrapp nennt
Der über disch alleyn sich kennt

[154v]

65

Vnd dar vff legt arbeyt vnd flyß

Das er alleyn esß alle spyß
Vnd er alleyn mo^eg füllen sich
Vnd andern nit go^endt ouch des glich
Die selben heiß ich rumm den hag

70

La^erß ka^erly / schmirwanst / füll den mag

Das ist eyn bo^eser masß genoß
Vnd würt geheissen wol eyn frosß
Der sich nit solcher vnzücht mosß
So jm gu^ot essen / bescho^ert das heyl

75

Das er es mit eym andern teyl /

Ouch der syn backen fült also
Als ob sie stackten jm vol stro /
Vnd mit dem essen vmb sich gaff
In alle winckel wie eyn aff

80

Vnd sicht eym yeden zu^o mit bger

Ob der villicht me esß / dann er
Vnd ee diser eyn mundt voll zuckt
Hat er vier oder fünff verschluckt /
Vnd das jm nit villicht gebra^est

85

Dreit er vff teller hyn zu^o na^est

Das er sich villicht nit versumm
Lu^ogt er / wie er die blatten rumm
Ee er die spiß du^ot abhyn schlucken
Du^ot er eyn stych jnn becher gucken

90

Vnd macht eyn suppen mit dem wyn

Dar mit schwenckt er die backen syn /
Vnd ist jm offt dar zu^o also nott
Das es jm halb zu^or naß vß got
Oder sprytzt es eym andern licht

95

Inns drinckgschyrr oder angesiecht /

[155r]

Nün duben züg / vnd eyn bapphart
Das ist mit drincken yetz die art
Syn schmutzigen mundt wüscht keyner jm
Do mit das veißt jm becher schwym /

100

Schmatzen am drincken lob ich nit

Man to^eubt ander lüt dar mit
Wann man so sürfflet durch die zen
Solch drincken gibt eyn bo^eß geto^en
Mancher drinckt mit solchem geschrey

105

Als ob eyn ku^o kem von dem hew

Eyn ere was ettwan drincken noch
Jetz ist den wynschlüch also goch
Do mit sie drincken mo^egen vor
Das drinckgschyrr heben sie entbor

110

Vnd bringent eym eyn früntlich drunck

Do mit der becher macht glunck glunck /
Vnd meynen do mit andere eren
Das sie den becher vor vmb keren /
Ich darff der selben hoffzucht nit /

115

Das man mir vor das glaß vmb schüt

Oder man mich zu^o drincken bitt
Ich drinck mir selbs / keym andern zu^o /
Wer sich gern fült / der ist eyn ku^o
Der ouch schwa^etzt über disch alleyn

120

Vnd nit loßt reden / syn gemeyn

Sunder mu^oß ho^eren yederman
Im zu^o / das er vil schwa^etzen kan /
Keyn andern er vß reden loßt
Eyn yeden er mit worten stoßt

125

Vnd hynder redet alle frist

Manchen / der nit zu^o gegen ist

[155v]

Ouch der sich kratzet jn dem grind
Vnd lu^og ob er keyn wiltpret fynd
Mit sechs fu^eß / vnd eym vlmer schilt

130

Das er dann vff dem ta^eller knylt

Vnd jn die blatt die fynger tu^eg
Do mit er mach eyn na^eglyß bru^eg
Ob er jm selb syn nasen wisch
Vnd stricht die fynger an die disch /

135

Die ouch so ho^eflich synt erzogen

Die vff jr arm vnd elenbogen
Sich la^enen vnd den disch bewegen
Dar vff mit allen vieren legen
Als die brut dett von Geyspitzheyn

140

Die vff den teller legt jr beyn

Do sie sich buckt nach dem sturtz
Entfu^or jr ob dem disch eyn furtz
Vnd ließ eyn ro^eubtzen jr entwischen
Wo man nit kumen wer dar zwischen

145

Mit küblen / vnd sie vff hett gthan

Das mul / keyn zan hett sie behan /
Ettlich die du^ont also hofieren
Das sie das brot vast wol beschmieren /
Mit schmutzgen henden / pfeffer bry

150

Do mit es wol gesalbet sy

Es ist eyn vorteyl vff fürlegen
Das aller best du^ot man an regen
Vnd was nit wol gefellet mir
Das leg ich gern eym andern für

155

Dar durch würt dann eyn weg gemacht

Do mit ich nach dem besten tracht

[156r]

Eym andern würt was ich nit will
Das best würt mir / des schwig ich still
Mancher hat mit mir offt hofiert

160

Ich wolt er hets nye angeru^ert

Do mit / so wer mir bliben das
Das vor mir lag / vnd mir schmeckt baß /
Mancher den schlenttrianum tribt
Die blat er vff dem disch vmb schibt

165

Do mit das best für jn kum dar

Ich hab des vil genomen war
Das mancher treib so^elch ofentür
Die zu^o sym anschlag jm gab stür
Do mit jm wart gefült syn buch

170

Des hat der disch manch seltzen gbruch

Wann ich die all erzelen solt
Eyn gantz legend ich schriben wolt
Wie man dett jn den becher pfiffen
Mit fynger jn das saltzfasß griffen

175

Das mancher acht es sy vast grob

Worlich / das selb ich vil mer lob
Dann das man saltz nem mit dem messer
Eyn gweschne hant ist vil besser
Vnd süferer / dann eyn messer licht

180

Das man erst vß der scheyden zücht

Vnd man nit weißt zu^o manchen stunden
Ob man eyn ka^etz mit hab geschunden /
Des glich für vnuernunfft man halt
Wann man die eyger schlecht vnd spalt

185

Vnd ander des glich gouckelspyl

Dar von ich yetz nit schriben wyl

[156v]

Dann es syn sol eyn hoflicheyt
Ich schrib alleyn hie / von grobheyt
Vnd nit subtil ho^eflich sachen

190

Ich wolt sunst wol eyn bibel machen

Solt ich all misß bruch hie beschriben
Die man du^ot ob dem essen triben
Des glichen so acht ich ouch nit
Wann ettwas jn dem drinckgschir lyt

195

Ob man das mit dem mund abbloß

Oder dar jn das messer stoß
Oder eyn schnytten von dem brott
Wie wol das selb hoflicher stott
So halt ich das doch also nu^on

200

Das man eyn yedes wol mo^eg thu^on

Wo man es aber hat so vergu^ot
Das mans als vß dem drinckgschyrr du^ot
Vnd man eyn frisches dar jn nymbt
Als sich by eren des wol zymbt

205

Das mag man scheltten nit mit glympff

Für arm lüt / ist nit so^elcher schympff
Eyn arm man sich benu^egen lott
Was jm gott gibt / vnd jn berott
Der darff nit aller hoffzucht pflegen

210

Zu^om letsten sprech man doch den segen

So man genomen hat das maß
So sag man deo gratias
Wer sich jn disem über siecht
Den acht ich für keyn wisen nicht

215

Sunder ich billich sprechen mag

Das er die narren kapp ouch trag

[157r]