Doctor Brants Narrenschiff/Von Zwietrachtstiftern

aus Wikisource, der freien Quellensammlung
« Von Kinderverziehern Sebastian Brant
Doctor Brants Narrenschiff
Von unberathnen Narren »
fertig
Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).


[11v]

Wer zwischen steyn vnd steyn sich leyt
Vnd vil lüt vff der zungen dreit
Dem widerfert bald schad vnd leydt




Von zwytracht machen


Mancher der hat groß freüd dar an
Das er verwirret yederman
Vnd machen künn diß hor vff das
Dar vß vnfrüntschafft spring vnd haß

[12r]

5
Mit hynder red vnd liegen groß

Gibt er gar manchem eynen stoß
Der das erst über lang enpfindt
Vnd machet vß dem fründ eyn fyndt
Vnd das ers wol besyglen moeg

10
Luogt er / das er vil dar zuo leg

Vnd wills jn bichts wiß han gethon
Das nit verwissung kum dar von
Vnd das ers vnder der rosen hett
Vnd jn din eygen hertz geredt

15
Meynen do mit gfallen wol

Die welt ist soelcher zwytracht vol
Das man eyns vff der zungen[1] trag
Wyter dann vff eym hangenden wag
Als Chore det / vnd Absolon

20
Das sie groß anhang moechten han

Aber es schlytzt jn vbel vß
In allem land ist Alchymus
Der fründ zertrag vnd hynderlieg
Vnd fynger zwischen angel dieg

25
Die werden offt geklembt dar von

Als der / meynt entpfohen lon
Vmb das er Saul erschlagen hett
Vnd die do doettent Hißboseth
Als dem der zwischen mülsteyn lyt

30
Gschicht / wer vil zwitracht macht all zyt

Man sicht gar bald jn geberden an
Was er sag vnd sy für eyn man
Bürg man eyn narren hynder thür
Er streckt die oren doch har für

  1. Vorlage: zungtn