Doctor Brants Narrenschiff/Von zweien Herren Dienst

« Von Pfennigsnarren	Sebastian Brant Doctor Brants Narrenschiff	Von geschwätzigen Narren »
fertig Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).

Der vocht zwen hasen vff eyn mol
Wer meynt zweyn herren dienen wol
Vnd riechten vß me dann er sol

Von dienst zweyer herren

Der ist eyn narr der vnderstot
Der welt zu^o dienen / vnd ouch gott
Dann wo zwen herren handt eyn knecht
Der mag jn nyemer dienen recht

5

Gar offt verdürbt ein hantwercks man

Der vil gewa^erb vnd hantwerck kan
Wer jagen wil / vff eyn stund
Zwen hasen vohen / mit eym hund
Dem würt ettwan kum eyner wol

10

Gar dick würt jm gantz nit zu^o mol

Wer schiessen vß vil armbrust will
Der trifft kum etwan wol das zyl
Wer vff sich selbst vil a^empter nympt
Der mag nit tu^on das yedem zymbt

15

Der hie mu^oß syn vnd anderswo

Der ist reht weder hie noch do
Wer tu^on will das eym yeden gfalt
Der mu^oß han ottem warm vnd kalt
Vnd schlucken vil das jm nit schmeckt

20

Vnd strecken sich noch der gedeck

Vnd künnen pfulwen vnderstrowen
Eym yeden vndern ellenbogen
Vnd schmieren yedem wol syn styrn
Vnd lu^ogen das er keynen erzürn

25

Aber vil a^empter schmecken woll

Man wermbt sich bald by grossem kol
Vnd wer vil win versu^ochen du^ot
Den dunckt doch nit eyn yeden gu^ot
Dan schlecht geschmydt / jst bald bereyt

30

Dem wisen liebt eynfaltikeyt

Wer eynem dient / vnd du^ot jm recht
Den halt man für eyn truwen knecht
Der esel starb / vnd wart nye satt
Der all tag nuwe herren hatt