Dv́ vledramvs dú dunket den vogel swenne so si flúget

Dv́ vledramvs dú dunket den vogel swenne so si flúget
den esel molet sin stimme valscher wan der trúget·
der vuhs ist kv́ndig vnd kan mangen list·
der wolf von drin naturen ist· nah robe er strebt·
sinen ivngen lip fruht los die wile dú mv̊ter lebt·
natern er treit swanne er nv́nierig ist·
zisel vnd polmúse die sint mv́se genos· der schalk hat schalke sitte·
der tv̊ swc er welle· er loser er smeiter er ge in pfaffen tritte·
so mv̊s er doch smaheit liden zallen stvnden·
als der valsche vogel tv̊t vnd der vuhs vor den hvnden
esel vnd wolve zinsent wisse krist·

Hoͤrt irs her esel her dvnkel gv̊t her eren niding
her galgen swenkel wend ir wars her niemans frúnt her gliding·
ir sit wol des withopfen gnôs·
úch gebristet an rehter kvnst an eren vnd an můte·
siges vnd stúre der habt ir niht· ir vliessent ane růte
her swalwen nest úwer schal der ist zegros
wc sol der kvͤie luͤien wc sol der vroͤsche schrien· der hennen gagzen
swelh schalch im selben dv́nket den schal· der hagel·
svs sicht man slaht in slahtes flagzen^{[WS 1]}·
hoͤrt irs her entensnabel her snúdel her sv́rtel vnd ǒch ir tore·
her snúdel wc snúdelt ir vns an· wc sol ein wolf zekore·
her affen zagel· her schanden deke blos·

Anmerkungen (Wikisource)

1. Vorlage: flegzen.