Ein mv́ndel rot zwo brvne bra

Ein mv́ndel rot zwo brvne bra·
hant mih verwunt niht anderswa·
wan in dc herze al da
dú minne wont mir alse na·
so sere ringe ich vf ir sla·
dc ich ervúrhte werden gra·
e zit es wende ein lieblich ia·

Zer werlte kvmt er niemer me·
den nach sim liebe si so we·
mich vrumt niht mere noh sin kle·
ich aht vf blv̊men als vf sne·
mirst swere der suͤze vogel schre·
nah ir sen ich swies mir erge·
sus lige ich in ir minne se·

Min mv̊t ist swerer dan ein bli·
der solte grůnen sam ein zwi·
dc mich da twinget dc ist si·
ich moͤhte sorgen werden vri·
solt ich der lieben wesen bi·
nah minem willen tage dri·
so wer min froͤide gros ahý·

Swas ich die minne strike flo·
doch hant si mich bevangen so·
dc ich an vroiden bin zerô·
ir ermel blank ir hende zwo·
der trúten mahte mich wol vro·
das min gemvͤte drunge vf ho·
als in dem meien gruenú lo·

Ich bin von senelicher klu·
dv́ mich da drvket sam ein vlu·
in minem herzen nie so ru·
vil sveze minne woltest dv·
mich senden siechen troͤsten nv·
ich ahte^{[WS 1]} klein der merker hv·
vnd lieze gar der sorgen drv·

Anmerkungen (Wikisource)

1. Vorlage: ehte.