Ein wūder in der w̾lde v̾t

Ein wūder in der w̾lde v̾t·
dc ſich allē tvgēdē wert·
valſchlich lebē iſt ſin gelvſt·
es hat der ſirenē ſang·
pfawen varwe vn̄ haſen wank·
ſchafes hvt vn̄ fvhſes bꝛvſt·
vnſeldē wirt im niemer bůs·
ſin wolflich lib hat hēnen fv̊s·
ſin kemlins rucke hat nat̾n zagel·
in ſime krankē h̾zē ſtat·
ein vrſpꝛvng aller miſſetat·
vntrúwen regē der eren hagel·

Den ich alſo vol wund̾t han·
dc iſt der vngetrúwe man·
d̾ mit valſcheit wūder tůt·
d̾ kan vꝛemd̾ lage vil·
mit woꝛtwehē nit ſpil·
v̾deket er giftb̾en mv̊t·
nv wil dultē irn haſ·
vn̄ wil die h̾ren leren das·
wie mā dē loſer vindē mag·
ī ſinē mvnde ſwebt ein ſtrale·
mit geluptem laſt̾ male·
d̾ ſchvz iſt giftrich vn̄ ir ſlag·

Nv m̾ket wie ein kv́ndig man·
ein vnrein ſwin erkēnē kan·
er kv́ſt es bi d̾ zvngē·
ir h̾ren dc iſt úw̾ reht·
ſwēne úch ritt̾ oder kneht·
zewīkel habe gedꝛungē·
ſo ſpꝛechet vf ſines h̾zē ſpehen·
frúnt la mich dine zvngē ſehen·
vn̄ m̾ket wie ſi ſi geſtalt·
iſt ſi dāne ſwebel var·
oder natern vech·
ſoſt der ſelbe vntrúwē balt·