Ein wachter ſang
[283r]
Ein wachter ſang
dv́ nacht wil hin·
wol uf ſwer iender tǒgen lit
vn̄ ſi gereit ich ſiche den tag vf dꝛingen·
herze vn̄ gedank·
vn̄ al den ſin
twinge er vō liebe deſt min ſtrit·
vúr kvmftig leit
vúr ſtarkes miſſelingen
mâſſe ſich alſo der minne
das vnmâſſe nit gelige
ſo das er nach vngewinne
dur ſin lieb ze lāge icht lige
dur got wol vf eſt ſcheidens zit
beſcheidenheit
dv́ hoͤꝛet zallen dingē·
So we mir tag
der kúnfte din
dv́ vrǒwe vs truͤbem můte ſpꝛach
ia wilt dv mich
der hoͤchſten froͤide pfenden
dv biſt ein ſlag
der froͤiden min
ſo leide mir noch nie geſchach
ǒwe ſit dich
nu nieman kan er wenden
ſo wache vrúnt min trut geſelle
troͤſte mich vil ſenedes wib
ich vúrhte des dar[WS 1] tag d̾ welle
mir enpfroͤmden dinen lib
das iſt min hoͤchſtes vngemach
nu wache vn̄ ſich
dv́ nacht dv́ wil ſich endē·
Der ſelben ſtunt
wart nit geſpart
da wurde nahen bi gelegen
froͤide vnde ſpil
ergieng da von in beiden
da tet in kunt
ir edel art
wes lieb bi liebe ſolte pflegen
do was das zil·
das ſi ſich můſten ſcheiden
ſich dú zwei gemeinen
mit beſcheidēlichen ſitten
doch můſton ſú ſich ê vereinē
das ſi ſich nit lange mitten
des wart da ſicherheit gewegen
mit trúwen vil
vnd ǒch mit manigen eiden·
Anmerkungen (Wikisource)
- ↑ Vorlage: d̾ar.