Ein wachter sang
[283r]
Ein wachter sang
dv́ nacht wil hin·
wol uf swer iender tǒgen lit
vnd si gereit ich siche den tag vf dringen·
herze vnd gedank·
vnd al den sin
twinge er von liebe dest min strit·
vúr kvmftig leit
vúr starkes misselingen
mâsse sich also der minne
das vnmâsse nit gelige
so das er nach vngewinne
dur sin lieb ze lange icht lige
dur got wol vf est scheidens zit
bescheidenheit
dv́ hoͤret zallen dingen·
So we mir tag
der kúnfte din
dv́ vrǒwe vs truͤbem můte sprach
ia wilt dv mich
der hoͤchsten froͤide pfenden
dv bist ein slag
der froͤiden min
so leide mir noch nie geschach
ǒwe sit dich
nu nieman kan er wenden
so wache vrúnt min trut geselle
troͤste mich vil senedes wib
ich vúrhte des dar[WS 1] tag der welle
mir enpfroͤmden dinen lib
das ist min hoͤchstes vngemach
nu wache vnd sich
dv́ nacht dv́ wil sich enden·
Der selben stunt
wart nit gespart
da wurde nahen bi gelegen
froͤide vnde spil
ergieng da von in beiden
da tet in kunt
ir edel art
wes lieb bi liebe solte pflegen
do was das zil·
das si sich můsten scheiden
sich dú zwei gemeinen
mit bescheidenlichen sitten
doch můston sú sich ê vereinen
das si sich nit lange mitten
des wart da sicherheit gewegen
mit trúwen vil
vnd ǒch mit manigen eiden·
Anmerkungen (Wikisource)
- ↑ Vorlage: d̾ar.