Er si mir helfeklichen bi

Er si mir helfeklichen bi·
an dem ich in disme núwen done·
er hat vil hoher name doh wc der si·
so sint ir dri·
die wir kristen nennen schone·
gedriet got al svnder mein·
svs wart es gordent in dem hohsten throne·
ietweder vatter svn vnd geist·
svnder erschein·
got der wc den persone·
ir beider geist
den menschen an dem sehsten tage wart vor none·
alre meist
ers beschiet do man die botschaft warf zv̊ der meide vrone·
do sich dú gotheit mit der menscheit sv̊nde als dv wol weist·
got dv vertreist
aller gv̊ter dinge lone nv lone·

Sibillen sprvch mv̊s werden war·
den si von kúnigen sprach dc ist ane wende·
si iach dú riche wurden fúrsten bar·
owe der iar·
sehet so nahet es dem ende·
die wisen pruͤventz an der zit·
die kircken sprenzen hoh vf ir gebende·
si hant dc riche in hon schaft vil gevriet·
solher strit
machet mangen noch vil ellende·
er ist geborn
bi dem in lambes mvnde wahsent wolfes zende·
sinen zorn
mv̊ssen kv́nige fúrhten· vngerochen sint die brende·
dú bv̊ch vns sagent bi im werden ellú reht verlorn·
sprechet horn·
bi dem roche kvme stet ein vende·

Ein auentúre wart gesant·
zebabýlone die da wunder stalte·
da schreib von golde schrift ein kvnstig hant·
an die want·
dú des kv́niges lebe verzalte·
die hohgezit wart vnbehagen·
doch wc ein meister der die urteil malte·
er wolte vnrehter hoh vart niht vertragen·
zetode erslagen
wart der wirt· dc schv̊f der alte·
der got ie hies
vnd Iemer eweklichen rihtet mit gewalte·
er versties
baldazar· er kan noch letzen reht als er in valte·
er wc niht wis· der sin gelúke niht an in lies·
des geniez·
geliche ich dem der nach verluste snalte·

Froͤwe dich rose ane dorn·
frowe al der werlde wer veriesch solhe mere
dc von dir wart ein vatter dir geborn·
vserkorn
wart din kúsche vnwandelbere·
wer gevriesch solich wunder ie·
dc ein vatter ie sin kint gebere·
den al dú werlt vnbegrifen mohten nie·
den vnbevie
si aleine· nv merket wie dem were·
da wart dú meit
ein mv̊ter vngemeilt vnd ǒch sv́nden lere·
als ir seit^{[WS 1]}
gabriel si gebere· den gotes svn ane alle swere·
do wart der vatter kint der tohter dvr ir stetekeit·
die menscheit
vns erloste dc geschv̊f dú meit gewere·

Ein alexander fůrt ein her·
da sin ein persone getorste wol erbiten·
in hoher wirde mit kostlicher zer·
mit der wer
als man kv́nige sol an riten·
nv fůrt eins alexanders mv̊t·
eins alexanders her gesament witen·
eins alexanders lip vnd ǒch sin gv̊t·
wol behv̊t·
zeganzen eren· zallen ziten·
ein beheim wert otacker der des riches erbe noh sol witen·
ob ers gert·
sin wirt eben berge vnd tal vnd alle liten·
svs sol ein stǒfer húre hoher stigen danne vert·
vnd sin swert·
sol vmb ere alse alexander striten·

Anmerkungen (Wikisource)

1. Vorlage: ſeite.