Es meiet húre aber als ê (Mit originalen Lettern)

Es meiet húre aber als ê·
vō dem tǒwe
ſpꝛach ein frowe·
ſpꝛingēt blv̊mē vn̄ kle·
dú nahtegal ſinget vf der lindē·
ir ſvͤſſen ſanc·
merze von dem reien ſpꝛanc·
bi dem ſolt dv mich vinden·

Tohter wende dinē mv̊t·
vō dē tǒwe·
ganc her ſchǒwe·
diſú mere ſint niht gv̊t·
warn dich gegē dem ſcherpfen winder·
ahte niht vf merzē ſin
des rede dꝛing hin hinder·

Vnde reie alſo ſwies dir erge·
ob er dich triege·
das ein wiege·
voꝛ an dinem fůſſe iht ſte·
ſich ſo wirt din froͤide harte kleine·
vn̄ mag geſchehē·
ſo dv die blv̊mē welleſt ſehen·
dc nach dir iht weine·

Mv̊ter ir ſoꝛget vmbe dē wint·
mirſt vnmere·
ſolhe ſwere·
wib dú trůgē ie dú kint·
ich wil miner froͤide niht enlâſſen·
durh úwern rat·
reiche mir min liehte wat·
dú wiege var v̾waſſen·

Nv hoͤꝛent wie es ir ergie·
ſi biegen beide·
da mit leide·
dú mv̊ter einē rechen vie·
den begreif dú tohter bi der groͤſſe·
ſi nam in der altē vs d̾ hant
do gient es an die ſtoͤſſe·

Si ſtieſſen beide ein ander wol·
dú alte ſpꝛach
dis vngemach·
nā ich vernt vō dir niht ver vol·
nv bin ich leider krāc an minē libe·
gebeſt dv merzen tvſent marc
er neme din niht zewibe·