Es wer vns allē

Es wer vns allē·
einer hande ſelden not·
dc man rehter froͤide ſchone pflege als ê·
ein miſſevallē·
dc iſt miner froͤiden tot·
dc dien ivnge froͤide tv̊t ſo rehte we·
war zv̊ ſol ir ivnger lip·
da mit ſi froͤide ſoltē mīnē·
hei woltē ſi ze froͤidē ſinnē·
ivnge man des hvlfē noh div wib·

Nv bin ich ê doch·
fro vn̄ mv̊s bi froͤidē ſin·
dvrh die liebē ſwie er dar vnder mir ergat·
min ſchin iſt hie noch·
ſo iſt bi ir dc h̾ze min·
dc mā mih ofte ſinne loſen hat·
hie ſoltē ſi zeſamene komē·
min lip min h̾ze ir beider ſinne·
dc ſi des wol wurdē inne·
die mir dike froͤide hant benomē·

Voꝛ den merkeren·
kan nv niemāne lieb geſchehē·
wā ir hv̊te twinget manigē werden lib·
dc mv̊s beſweren
mich ſwenne ich ſi ſolte ſehen·
ſo mv̊s ich ſi miden ſi vil ſelig wib·
doch mvͤſſe ich noch die zit geleben·
dc ich ſi willig eine vinde·
ſo das dv́ hv̊te vns beiden ſwinde·
da mitte wurde mir liebes vil gegeben·

Vil manig̾ vꝛaget·
mich der liebē wer ſi ſi·
der ich diene vn̄ alles her gedienet han·
ſo des betraget·
mich ſo ſpꝛiche ich ir ſint dꝛi·
dien ich diene ſo hab ich zv̊ der vierden wan·
doch weis ſis alleine wol·
dú mich hat ſvs zv̊ zir geteilet·
dú gv̊te wūdet vn̄ heilet·
der ich voꝛ in allen dienen ſol·

Nv frowe mīne·
kvm ſi mīneklichē in·
dv́ mich twinget vn̄ alſo betwūgen hat·
bꝛing ſi des inne·
dc w̾dú mīne twīgen kan·
was ob mīneklichú liebe ǒch ſi beſtat·
ſo moͤhte ſi ǒch geloubē mir·
dc ich ſi gar vō h̾zē meine·
nv mīne bewere irs vn̄ beſcheine·
dc ich iemer gerne diene dir·