Frowe ich were gerne vro
[152r]
Frowe ich were gerne vro·
dc mag ân iv wer helfe niht gesin·
we wie were iv danne so·
dan ist niht an nemt ander troͤster danne min·
ane got eine· kan mich niht getroͤsten wan ir eine·
lat solhen spot· deswar ich ahte vf úwer klasen harte kleine·
Nein vil sv̊zú frǒwe nein·
stetem frúnde sol nieman also gar versagen·
wenne wart ich des enein·
dc ich úwer swere wolde helfen tragen·
wissent dc ich fúrht wirt [152v] si von iv niht ringer·
ich sage ú bas durh solhe not verlure ich niht ein vinger·
IR sult selhen spot verbern·
ia hat mir der ernst gar den schimpf benomen·
nv wes sol man úch gewern·
dc ir sprechent dc iv swere si benomen·
des kan ich úch wol gewisen nemt ir mich zerate·
verdenke ich mich als ich doh sol so volge ich ú des rates spate·
Das min rat vnd ǒch min klage·
ú so kleine wiget dc tůt mir we·
zúrnent ir ob ich versage·
dc mir nien enkvmt· so wirt des zornes me·
sit nv zorn niht vrumt· so svͤne ich gerne vf úwer guͤte·
ih han gesworn dc ich vor loser manne túke mih behuͤte·
Boͤser túke ist mir kvnt·
ich han ú gedienet ane valschen wank·
wer es war dc úwer mvnt·
gegen mir sprichet des sagte ich ú gerne dank·
hulfes iht· ich swuͤre ú dc ich niht kan wan die riht·
so svlt ir niht verkvnnen úch dar vmbe gůter zv̊versiht·