Gelúkes rat treit vier man (Mit aufgelösten Abbreviaturen)

Gelúkes rat treit vier man·
der eine stiget vf der ander stiget abe
der dritte ist oben· der vierde der ist vnder·
her kúnig so stiget an dem rade·
der oben vffe sitzet dc ist ane schade·
der gein ú stet der siget ǒch besvnder·
her kv́nig welt ir den stv̊l erstigen vnd beiagen·
vnd ǒch dc rich erstriten·
so minnet got vnd rihtet swc die wisen klagen·
sit milte zallen ziten·
ir gebet dc úwers vatter eigen nie enwart·
vnd seht an alexander der gab vnverspart·
des vert sin lob in allen richen witen·

Wa nv der bc gekroͤnet si·
ein kv́nig mit tvgenden der enwont vns niender bi·
der krone trage als er in hohem prise·
in hat gekront vúrsten art·
des milten tvgende frůtes sint an in gespart·
in hat gekroͤnet^{[WS 1]} salomon der wise
in hat gekroͤnt der vil tvgenden der ê pflag
artus der werde leige·
der drier lob treit ane scharte vnd ane krak·
watzlab der eren heie·
dc ist der die krone in beheim lande hat·
sit er ob allen kúnigen so gekroͤnet stat·
als ob allen manoden tv̊t der meie·

Artus man sol dich lange klagen·
sit man d eren vindet niht bi disen tagen·
die man vf dime hove wol werben kvnde·
lebtest dv noch ich wolt dir geben·
zwene ge erte ritter wol nach herren leben·
die dir wol zêmen an diner tavelrvnde
ahi wie man ir hohen pris ir werdekeit·
in oͤsterriche siht glesten·
die prúzen teilen silber golt ros richú kleit
den kv́nden vnd den gesten·
wernhart heinrichs lip treit heldes mv̊t·
lebte artus die zwene die het er wol vergv̊t·
ir trúwe ist ganz ir lob hat niht gebresten·

Got ere den wirt die geste gar·
got ere die massenie· vnd wer nem eren war
die ere get vil lobelichen schone·
got ere die biderben vber al·
der lip der gv̊t vmb ere wirbet ane zal·
den gebe got froͤide vnd claren pris zelone·
swie gar aber ich nv hie zehove verswigen si·
ich kan noch frúnde buͤssen
dem argen scharf· dem milten bin ich senfte bi·
mit linden sprúchen svͤzen·
schone als es ein turteltube habe erlesen·
dar vmbe solten mir die biderben gvnstig wesen·
vnd mir min armv̊t mit ir gvͤte bvͤzen·

Anmerkungen (Wikisource)

1. Vorlage: gekronet.