Gelúkes rat treit vier man (Mit originalen Lettern)

Gelúkes rat treit vier man·
d̾ eine ſtiget vf d̾ and̾ ſtiget abe
d̾ dꝛitte iſt obē· d̾ vierde d̾ iſt vnd̾·
her kúnig ſo ſtiget an dē rade·
d̾ oben vffe ſitzet dc iſt ane ſchade·
d̾ gein ú ſtet d̾ ſiget ǒch beſvnd̾·
her kv́nig welt ir dē ſtv̊l erſtigē vn̄ beiagē·
vn̄ ǒch dc rich erſtritē·
ſo mīnet got vn̄ rihtet ſwc die wiſen klagē·
ſit milte zallē zitē·
ir gebet dc úwers vatter eigē nie enwart·
vn̄ ſeht an alexand̾ der gab vnverſpart·
des vert ſin lob ī allē richē witē·

Wa nv d̾ bc gekroͤnet ſi·
ein kv́nig mit tvgendē der enwont vns niend̾ bi·
d̾ krone trage als er ī hohē pꝛiſe·
in hat gekront vúrſtē art·
des miltē tvgēde frůtes ſint an in geſpart·
in hat gekroͤnet^{[WS 1]} ſalomō d̾ wiſe
in hat gekroͤnt d̾ vil tvgēdē d̾ ê pflag
artus d̾ w̾de leige·
d̾ dꝛier lob treit ane ſcharte vn̄ ane krak·
watzlab d̾ erē heie·
dc iſt d̾ die krone ī beheim lande hat·
ſit er ob allē kúnigē ſo gekroͤnet ſtat·
als ob allē manodē tv̊t d̾ meie·

Artus mā ſol dich lange klagē·
ſit mā d erē vindet niht bi diſen tagē·
die mā vf dime hove wol w̾ben kvnde·
lebteſt dv noch ich wolt dir gebē·
zwene ge erte ritter wol nach h̾rē leben·
die dir wol zêmē an diner tavelrvnde
ahi wie mā ir hohē pꝛis ir w̾dekeit·
in oͤſt̾riche ſiht gleſten·
die pꝛúzē teilē ſilb̾ golt ros richú kleit
dē kv́ndē vn̄ dē geſtē·
w̾nhart heinrichs lip treit heldes mv̊t·
lebte artus die zwene die het er wol v̾gv̊t·
ir trúwe iſt ganz ir lob hat niht gebꝛeſten·

Got ere dē wirt die geſte gar·
got ere die maſſenie· vn̄ wer nem erē war
die ere get vil lobelichē ſchone·
got ere die biderben vber al·
d̾ lip d̾ gv̊t vmb ere wirbet ane zal·
dē gebe got froͤide vn̄ clarē pꝛis zelone·
ſwie gar aber ich nv hie zehove v̾ſwigē ſi·
ich kā noch frúnde buͤſſen
dē argē ſcharf· dē miltē bin ich ſenfte bi·
mit lindē ſpꝛúchē ſvͤzen·
ſchone als eſ ein turteltube habe erleſen·
dar vmbe ſoltē mir die biderben gvnſtig weſen·
vn̄ mir min armv̊t mit ir gvͤte bvͤzen·

Anmerkungen (Wikisource)

1. Vorlage: gekronet.