Gewalt bi grossem gv̊te

Gewalt bi grossem gv̊te·
lúte búrge vnd da bi lant·
lib kraft schoͤn vnd kleider·
swer der genvht iht hat·
in des verschamten mv̊te·
man lasterker ie vant·
da velschet adel leider
des herzen missetat·
der distel^{[WS 1]} hat dem weissen·
vil gar an im^{[WS 2]} gesigt·
sol ich den edel heissen·
der niender tvgende pfligt·
ob er mir dvrst niht buͤsse·
vnd ǒch vmb ere niht gebe·
sin win ist ane sv̊ze·
erwildet ist sin Rebe·

Verschamten schanden túrsten·
verschamt ist úwer mv̊t·
ir stritent vnd vehtent·
niht wan in úwern sack·
wie pflegent ir der fúrsten
war kvmt der herren gůt·
vnschuldig wilt ir ehtent·
gitig ist úwer hag·
bv̊ze vnd besserunge·
vil maniger vor ú tůt·
swer helwen gar vs swunge·
der same wurde gv̊t·
doch were hv̂ffe kleine·
der helwen ist zevil·
vs ruhem swarzen beine·
wart nie gv̊t wúrfel spil·

Anmerkungen (Wikisource)

1. Vorlage: tiſte.
2. Vorlage: in.