Got git sin gabe swem er wil

Got git sin gabe swem er wil·
er hat úch lib gegeben·
vnd in der kintheit selden vil·
des svnt ir úch niht vberheben·
erent ritter minnent frowen gruͤssent arme gernde diet·
ú ist gesetzet uf ein zil·
seht fúr úch vnd neben·
vnd spilt es vf der eren spil·
behúget an úwer vorder leben·
der vil maniger krone trůt bis in der tot von leben schiet·
der úch dient dem svnt ir genaden sin bereit·
v́ch si der witwen vnd der weisen kvmber leit·
hant die tútschen wert·
in úwerm herzen minnent got· so tůt er dvr úch swes ir gert·
verdienet^{[WS 1]} akers kúngrich· vnd ǒch cecilien lant·
in úwer hant·
swaben ist bekant·
herzoge sint ir da genant·
swc egerlant der gúlte hat· vnd nvͤrenberg lúte vnd der sant·
wil es got ú kvmt nach vf dc hǒbet roͤmsche krone wert·

Dv hohgelobter megde kint·
got herre vatter krist·
vil gros gegen dir min schulde sint·
dur dine gvͤte gib mir vrist·
vnz ich gebvͤsse wider dich die minen grossen missetat·
min herze wc gegen dir ie blint·
vnd noch vil leider ist·
die súnde waren mir ein wint·
gedenke herre dc dv bist
der vmb vnsich súndig armen grôsse not erlitten hat·
dinen angestlichen tot· la niht an vns verlorn sin·
gib herre mir der sin rehte in das herze min·
dc ich gelebe also
in dinem dienste hie dc min der tieuel dort iht werde vro·
so wir zesamen komen vf den ivngestlichen tag·
da nieman mag·
erwenden dinen slag·
da riche niht herre ob ich verlag·
din hoh gebot dc ich noch ie in minem herzen ringe wag·
dvrh dinen tot hilf mir dc der armen sele werde rat·

Ein esel gab vúr eigen sich·
dem fuse dc wc gv̊t·
da lert er in sprechen wihteklich·
si waren beide hohgemv̊t·
seht do vůrt her reinhart sinen knappen in den gruͤnen kle·
er sprach min esel hvͤte dich·
der wolf dir schaden tv̊t·
erhoͤret er dich· des warte vf mich·
der esel in dem grase wv̊t·
do schv̊f im sin mâg vnfroͤide· dc er sang ein húgeliet als ê·
zv̊ dem gedoͤne kan gegangen isengrin
swc reinhart seit· der wolf sprach esel wer sin
des wolt ietsvnt swern·
da vůrte in reinhart zeiner dru· er sprach ich mag michs niht erwern·
da mv̊s er die kaffen ruͤren des wc er bereit·
dc wart im leit·
dú dru den wolf versneit·
er wart bestúnbelt so man seit·
ach got wer ieglich kaff ein drv swenne es gat an den valschen eit·
dc were wol ir ist gar zevil nv swera lieger we dir we·

Anmerkungen (Wikisource)

1. Vorlage: v́ dienet.