Got vatter sun mit geiste

Got vatter sun mit geiste·
lob ere pris gebenedit
sist dv genedig sv̊che der la mich herre sin gezwit·
von diner gvͤtlichen art
dur den gedank der din geschepfede zilte·
svs trit ich an dc meiste
von einem vs einem der dritte spros·
vnd was niht deste ivnger· ein wesen dvrh drie vlos·
der ewig wc vnd wart
drie personen in einer sberstancie ist got hilte·
dc wunder dc hat krefte·
got fúr ze der helle· der lip wc tot vnd lag in grabes hefte
vnd wurden doh nie gescheiden·
geflohten vs gestriket in·
an ende vnd ane beginne schin·
sus gab er die instú gegen ivden vnd gegen heiden·

Eins braht ein vnd zwei dvrh eine·
mit der drie drú in eine·
vnd eines vmbe die alle· alda so lit ia vnd nein·
dc wc aller wunder vrspring·
der sechter eine wart al da zezart·
got braht vns minne reine·
nature wisheit sint dvrh den·
den niht kvnde vmbe vahen vatter svn mit geiste die drie in einem got wir stehen·
die alle vmbevienc
maria klare nein vnd ia valsch ware gelǒbe wart·
stature wart zerbrochen·
do geist in geistes geschikeit zoch an sich menschen knoten
in einer megde libe
dc wc wol aller wunder hort·
got viel got beleib got menschen wort·
got wunderere· gib vns himel beliben·