Got vnd din eben ewekeit
[323v]
Got vnd din eben ewekeit·
mit drin^ personen vnder schriben·
sît es gelobt das vnser leit·
der drier einer hat vertriben·
der dir ze kinde ist bi beliben·
Der selbe wart dvr din gebot·
vnd ǒch durh vnser heil versnitten·
des starb er mensche vnd starb niht got·
er starb nach menschlichen sitten·
sin sterben hat vns leben erstritten·
Des vater minne vnd ǒch des svns·
der gotheit in ir herze drang·
vnd klagte in beiden wie das vns·
der erste val ze valle twanc·
dar an vns allen misselang·
got herre vn vber wundelich·
hie vber want div minne dich·
getorste ich sprechen so spreche ich·
si wart an dir so sigerich·
dc si den val nam vber sich·
Das vns zeflůche was geschehen·
des hat dú minne vns vber tragen·
des svln wir lob der minne iehen·
vnd iemer mer genade sagen·
Si hat getroͤstet vnser klagen·
got lie sich dvrh si mensche sehen·
der die minne tůt bekant·
den lat iv hie kúnden·
gotes geist ist er genant·
twahen kan er von sv́nden·
mit zwein wasser v́nden·
Das ein ist der wester tǒf·
da man inne tǒfet·
So ist des andern wassers lǒf·
dc dvr ǒgen lǒfet·
vnd dú wangen betrǒfet·
der minne schenke ist aller meist·
der vber svͤsse gotes geist·
dem er die wil schenken·
den divrstet nach der minne niht·
div zv̊ den súnden hat gepfliht·
Gotelich ist ir trenken·
Dú minne ist gůt·
der svnnen glv̊t·
vnd ir gelust erloͤschen tůt·
dú aber zesúnden weket mv̊t·
der minne svln wir wenken·
Dvr minne wart der alte ivng·
der ie was alt an ende·
von himel tet er einen sprvng·
her abe in dis ellende·
ein got vnd drú genende·
enpfieng von einer megde ivgent·
dc geschach dvr minne·
ir gab des heiligen geistes tvgent·
minne bernde sinne·
des wol dir kúniginne·
aller wunder si geswigen·
dc erde himel vber stigen·
dc svlt ir fúr ein wunder wigen·
erde obe vnd himel vnder·
dc svlt ir han besvnder·
fúr elliv wunder wunder·
an dem dis wunder si geschehen·
des mv̊s man von der megde iehen·
die got liphaft zehimel nam·
dar menschlich mensche nie bekam·
von erden so was si geborn·
vnd wart foͤgetinne ze himel erkorn·
des habe dú ware minne danc·
die got zv̊ dirre liebe twanc·
An ir lit aller engel lob·
si ist ein sterne von iacob·
ir mv̊terberen magetv̊m kan nieman volle trúten·
von engeln noch von lúten·
Dv patriarchen vor behúge·
propheten lobes ein vberflúge·
ine weis ob ieman da zv̊ túge·
dc er din lob reichen múge·
der die svnnen enpfenget·
den hast dv geangenget·
Dv blv̊men gerte von ýesse·
dú nie gewan gelichen me·
vnd ǒch niemer me gewinnen mac·
din lib brahte vns die svͤssen fruht·
des himel Vnd erde ist ge eret·
swa si hat geseret·
da hast dv heil gemeret·
Minnen burde svnder swere·
minnen burde sv́nden lêre·
Vnd doch rehte minnen bvrde·
wart getragen von dir alleine·
Dv vil reine vnd er vil reiner·
Mit dem dv geburdet wurde·
Er got der minne· er minne schenke·
in tet dv́ mine also gelenke·
dc er sich in din herze vielt·
der aller elemente wielt·
Sit dc minne vns hat geneiget·
den des svͤsse súnde veiget·
vnd des helfe vns truren sweiget·
Als er vil dike zeiget·
des si er gebenedîget·
aller cristen stimme schrîget·
zv̊ dir mv̊ter magt maria·
dc din helfe vns súnden vrîe·
dur die eingottigen drîe·
die cristen gelǒben drigent·
Minne din fúr ist en zv́ndet·
minne din kraft ist dur grúndet·
dv bist ǒch als vber wúndig·
dc nieman lebet so sv́ndig·
wiltu dich vnder winden sin·
er werde gotes vnd ǒch din·
So ile minne vnd kvme her abe·
brinc din svͤsse mit dir her·
dú din gernde si der ger·
minne gernde minne·
wie sich din gerndú diet gehabe·
des nim war vnd růch der·
in der herze sv́nde ist swere·
minne den gib sinne·
da von ir heil beginne[WS 1]·
minne enbirt wol sv́nden namen·
minne sol sich sv́nden schamen·
Súnden ist niht minne·
minne ist ir toͤterinne·
Do minne des niht wolte enbern·
si mvͤste got ir bette gewern·
do mv̊ste er siner tohter gern·
menschlich zeiner mv̊ter·
Svs wart dú tohter mv̊ter sin·
vnd ǒch der vatter ir ...[WS 2]
[324r] ... vol niht sin kark·
noch al sin kv́ndekeit im si doch malter vber stark·
so tůt dc mútte ein fůter dc malter kume ein halbes fuͤderlin·
sage mvnt vol hant vol schos vol malter mútte·
ist din gezelt iht witer danne ein hútte·
sprich ia vnd las dich selbe vngaffet·
er ist ein tore der wol getar·
hoh vberhǒbet grazen dar·
da sin getar im selben schaden schaffet·
Der hof hat drier hande diet·
gehoft vn vngehoft verhoft der mir dú drú beschiet·
der bat mich dc ich wer bi den gehoften gerne zaller stunt·
er sprach mag es niht rat gesi·
so volge miner lere vnd wis den vngehoften bi·
oder bi dien gar gehoften verhoft dem ist wol valsches túschen kvnt·
verhoft dc lekert zeteslichen stunden·
sost vngehoft mit schame doch gebunden·
verhoft e der danne wolte vragen·
er tête ê missewende drin·
so mv̊s doch ienre in schamen sin·
ern welle dan dekeiner eren lagen·
Uor gelihsenere kúndekeit·
sol man sich gerne huͤten wan ir mantel ist so breit·
dc sich dar vnder birget valschlicher leben danne ir geberde si·
geislich geberde vnd fleischlich leben·
swa dú beide luzent vnder infeln bi dien krumben steben·
da versv̊che ein wol versvnnen keiser einen glihsenere bi·
dú glihsenheit dú birget vil vnreines·
si hat so vil der sv́nden vnd des meines·
vf sich geladen in kurzen iaren·
dur Jvden[WS 3] vnd durh fúrsten golt·
so ist man ir ze rôme holt·
ir crede mich kan schatzes wol gevaren·
Der toren milte toren lobet·
swer dan dur toren lob sin gůt vertoͤret vnd vertobet·
der habe der tôren lob vnd si da bi ân ere vnder âne gůt·
dú minne hat ir toren ovch·
er wol der minne tore vnd rehter witze ein gǒch·
swer wol gewibet ist vnd vf ein andere wendet sinen mv̊t·
swer ǒch turnieren minnet also sêre·
dc er da bi vergisset der hus ere·
dern hat die mâsse niht behalten·
ein genv̊g turnieren dc ist gůt·
zevil an allen dingen tůt·
bruch an dem lobe svs sagent die wîsen alten·
Dú lieben wib betwingent man·
ist da twingen bi son ist da doch niht wunders an·
so twinget schatz ǒch sinen kneht also dc er im dienen mv̊s·
so twinget gv̊tes herre ǒch gv̊t·
dc es im dienen mv̊s vnd liden swas er mit im tv̊t·
so twinget wines kraft ǒch sinen man dc im wirt sinne bůs·
dannoch weis ich ein wunderliches twingen·
dc wunderlicher ist ob allen dingen·
dc einem toten wúrfelgebeine·
ein lebende man herze vnd mv̊t·
so gerlich vndertenig tůt·
dc es im nimt herze vnd lib alleine·
Der túuel schůf dc wúrfel spil·
darvmbe dc er selen vil da mit gewinnen wil·
dc esse er hat gemachet dar vf dc ein got gewaltig ist·
der himel in sinen handen stat·
vnd dú erde dar vf er dc tus gemachet hat·
die drien vf die drie namen die er hat der suͤsse wêre crist·
dc quater dc wurchte er mit grossen listen·
vf die namen der vier ewangelisten·
den zinggen vf des menschen sinne·
wie der die fvͤnfe mache krank·
dc ses wie er sehs wochen lang
die vasten vns mit topel an gewinne·
Har vnd bart nach kloster sitten·
vnd klosterlich gewant nach kloster sitten gesnitten·
des vinde ich genv̊g in vinde aber der niht vil dies rehte tragen·
halb visch halb man ist visch noch man·
gar visch ist visch gar man ist man als ichs erkennen kan·
von hof mv́nchen vnd von kloster rittern kan· ich niht gesagen·
hofmúnchen kloster ritter disen beiden·
wolte ich reht zerehte wol bescheiden·
ob si sich wolten lassen vinden·
da si ze rehte solten wesen·
in kloster mv́nche svlen genesen·
so svln des hofs sich ritter vnderwinden·
Do wonte ein maget vf erde hie·
dú sante ir botten vs nach gotes svn nv merkent wie·
ir kv́sche vnd ir demvͤte ir zuht ir scham ir grosse reinekeit·
die latten got mit ganzer kraft·
also dc er ir sante die hohgelopten boteschaft·
dc si in magt gebere· do wart ir von dem engel do geseit·
do die botten die lieben mêre vername·
vnd si in ganzem gelǒben des bekamen·
der heilige geist der enpfieng so schone·
dc kint mit mangen tvgenden so·
dc wonte vnder ir brusten do·
vnz si in gebar wc geben wir ir zelône·
[324v] Adam vnd manig verlornú sel
froͤite dc in der helle do der engel gabriel·
aue marien kvnte dc reine wort vnd si in maget gebar·
den hohgelopten reinen got·
des menscheit an dem krúze leit den tot nach dem gebot·
als in dú minne lêrte vnd im gebot dc wart erfúllet gar·
sin súnden blôsser lib der lie sich toͤten·
sin vnschuldig tot half vns vs noͤten·
er brach die helle nach sinre vrstende·
do wart vil manig sele erlôst·
nv bîtte ich dich vil svͤsser trost·
dc dv mir gebest ware rúwe vor minem ende·
Matheus menschen bilde hat·
wie got ein mensche wart von im vns dc geschriben stat·
in manigem ewangelio dú got selber sprach dur sinen mvnt·
wie got alsam ein calp vertrůg·
den tot an der menscheit wie man in an dc krúze slůg·
dc machet lucas calp mit siner schrift von cristes tot vns kunt·
wie er von tode erstůnt mit loͤwen krefte·
dc schribet Marcus leo mit meisterschefte·
Iohannes ar von der gotheite·
die hohen wisheit niht enspart·
in arn wise gotes himelvart·
do gab vnd git noch maniger sele geleite·
Hei wie wunneklich ein schar·
da die vil reine trinitate in ein gesament gar·
zv̊ voller angesihte vnd ǒch du edele mv̊ter bi gestat·
dú aller guͤte ist vbervlůt[WS 4]·
ich meine cristes mv̊ter dú da besser ist dan gůt·
propheten patriarchen der engel schar ǒch da vil schone hat·
zwelf botten vnd vier ewangelisten·
marterer vnd ander gv̊te kristen·
bihtere megde witwen vrowen·
vnd alle gottes heiligen gar·
herre got nv hilf vns dar·
dc wir si dort mit froͤiden mvͤssen schǒwen·
Es ist vil manigem minner leit·
ob ieman siner frǒwen dienet vf genedekeit·
wan er wil eine ir einer dienen vmb ir hulde vnd vmb ir grůs·
nv grîfen alle cristen zů·
vnd dienen miner frowen dienen spate dienen frů·
mit minem gv̊ten willen si tůt in allen aller sorgen bůs·
der diener sol keiner den andern niden·
si svln alle vnkúsche ǒch gar vermiden·
si ist reine si mv̊tet niht wan reines·
ir wont dú ware minne bi·
si ist alles wandels fri·
er selig man dem si gewingket eines·
Swer gerne minneklichen lige·
vnd in den selben froͤiden doch den sv́nden an gesige·
den wise ich an ein bette da er vil maniger froͤide nietet sich·
lege sich vf sinú baren knie·
vnd ruͤfe tugentliche ze der magt dú sv́nde nie begie·
spreche anders niht wan frowe dur dine grôssen guͤte erhoͤre mich·
wie koͤnde er bas geligen vnd geminnen·
mag er die frowen erwerben vnd gewinnen·
dú kan wol wernde froͤide machen·
ir guͤte froͤit ie bas vnd bas·
ir guͤte wirt sin materas·
so wirt ob im ir gvͤte sin dekelachen·
Du sv́nden blos du valsches bar·
du himel frowe gewaltig vber al der engel schar·
des himels vnd der erde vnd swes din kint dar inne begriften hat·
dv êrestes[WS 5] mv̊ter reinú maget·
dú erlúhtest vinster naht als si mit svnnen si betaget·
dv gruntveste steter trúwen dú schirmerinne gotes hant getat·
dv sv̊nerinne cristen ivden heiden·
dú wol dc úbel ze gv̊te kan bescheiden·
dv portenerinne vor hellebanden·
gar sv́nder trost din helfe ich spúr·
dv vnd din svn fúr helle fúr·
sint vnser schirm vor sv́nden vnd vor schanden·
Sich vmbe dich vil selig wib·
sich in min herze vindest ieman da dan dinen lib·
so la mich frowe verderben vnd ane trost vntz an min ende leben·
sist aber dv gewaltig min·
vil selig wib so la mich bas in dinen hulden sin·
in kan niht fúr bas werben min ǒgen hant dich minem herzen geben·
dc hastv selig frowe gar dur gangen·
ich han dich dike tǒgen drin enpfangen·
swenne ich so lieb an dih gedahte·
so wart mir eine wile bc·
dar nah ich dike trurig sas·
dis kurzelieb mir langes leit ie brahte·
Sit trúwe ist al der werlte gůt·
sit trúwe ist al der selden dach getrúwelichen mv̊t·
han ich gegen der vil gůten dú mines herzen kúniginne ie was· vnd iemer mv̊s an ende sin·
mir lieb vor allen frowen lieb dú liebe frǒwe min·
si minnekliche si gv̊te min trúwe ist vester danne ein adamas·
gegen ir wan si ist mines wunsches paradýs·
vnd miner wunne gar ein blvͤndes ris·
vnd mines alters ein [325r] svͤssú ivgende·
vnd miner selde ein hoher vunt·
miner froͤide ein wernder grunt·
mich troͤstet ir schoͤne ir kv́sche vnd ǒch ir tvgende·
Der gůten wibe werdekeit·
wil ich mit worten vnd mit sange iemer machen breit·
von getrúwes herzen grunde dur die vil herzelieben frowen min·
an der min hohstú froͤide stat·
ir kúsche ir schoͤne ir minneklicher lip beslossen hat·
min herze sit der stvnde dc mich enpfieng ir liehter ǒgen schin·
da wart ich also minneklich enpfangen·
da von min truren was vil gar zergangen·
swa si nv si dú minnekliche·
si ist mir in dem herzen bi·
ir lib ist alles wandels fri·
da von bin ich an hohem mv̊te riche·
Was kleider frowen wol anstê·
des wil ich úch bescheiden ein hemde wis alsam ein sne·
dc ist dc si got minne vnd habe in lieb dest wol ein riches kleit·
dar obe sol sin ein rok gesnitten·
so dc si lieb vnd leit sol tragen mit vil kúschen sitten·
ir gúrtel si dú minne ir vúrspan dc si tugenden si bereit·
dú ere ir mantel dc der an ir deke·
ob iht des si dc wandels an ir bleke·
ir rise dc sol sin ir trúwe·
dar ob ein schapel von der art·
dc si vor valsche si bewart·
si selig wib der lob ist iemer núwe·
Ein man der so erworben ist·
der sol sich froͤwen des dc es hat also geordent crist·
ein lip zwo sele dc ist swa sich zwei gebent zesamen mit rehter ê·
wol im der hohen zúuersiht·
dc er so volleklich hat mit ir kúsche gemeine pfliht·
ist dc si beide minnent von herzen got nv hoͤrent von in mê·
ist dc er si mit steten trúwen meinet·
ir zuht ir kúsche ir gvͤte vor valsche in reinet·
lat aber er si des engelten·
dc si sich âne missetat·
lat vinden so ist sin ere mat·
er dient da mit gotes zorn der werlte schelten·
Ein man der niht erwinden wil·
er minne ein lieb zv̊ sinem wibe nach sines herzen spil·
dem wil ich ein zv̊ wisen· die im der babest niht verbieten mag·
minne ere alsam sin selbes wib·
er hals si vnd kusse er druke si schone an sinen lip·
vnd lige er in der mitte· so weis ich wol nie keiser bc gelag·
swelh man dú zwei hat bi siner siten·
der mag der hohen svnnen wol erbiten·
ein reines wib vnd dar zv̊ ere·
die minnet von rehte ein werder man·
dú drú nieman gescheiden kan·
es en tů der tot· oder tvmbes herzen lere·
Dú minne hat wunderlichen sit·
si svͤsset ir viendes mvnt vnd tůt ir frúnde swere quit·
si pflege bas frúndes munde sweze den tete vinde vindes nît·
Nv hilt ir minne minen namen·
wil si sich frúnde vienden so mag sich frúnt wol minne schamen·
ich meine swa frúnt gegen frúnde minne spart vind sich git·
hie mischet sich minne svͤsse mit distelz greten·
wil si durh losen volgen boͤsen reten·
war zv̊ sol denne ir nam getúret·
ist sol dich vnstete ir svͤsse bi·
ich wil erteilen swa dú si·
vf minen eit dc minne da wirt gefúret·
Ein lib zwo sele ein mvnt ein mv̊t·
ein trúwe vúr missewende vnd ǒch vor varnder scham behv̊t·
hie zwei da zwei in eime vereinet gar mit steten trúwen ganz·
swa lieb mit liebe des wirt inein·
da kan ich niht gedenken· dc silber golt vnd edel gestein
der zweier froͤide vergulte· dú sich so bútet durh liehter ǒgen glanz·
vnd ob dú minne der zweier herze bunde·
swa man dú beide vnder einer deke fvnde·
dc arm mit arme sich beslusse·
da moͤhte wol sin der selden dach·
nv wol im dem es ie geschach·
ich weis dc wol dc sin got niht verdrvsse·
Ein ivng si lobelichen ivng·
so habe ein hoh geburt nach hohen eren gernden sprung·
si valscher volge vri si gv̊ter lere willig vnd fro·
si sines mvndes niht zesnel·
in zorne las des mv̊tes vierekke vnd niht sinewel·
solt ich mir einen herren wúnschen den wolt ich mir wúnschen so·
vnd dennoch mêr kvnd er sich des betwingen·
dc er sich biderbe lúte liesse dringen·
vs engen winkeln an die wite·
swelh herre mir volge giht·
der selbe herre wil des niht·
dc man mir mv́ge sin lob getv̊n ze strite·
Ein herre ivng schoͤne vnd rich·
der sol sin manlich minneklich vnd ritterlich·
wie manlich minneklich vnd ritterlich·
wie verre dú drú gereichen mvgen des lant úch [325v] alle wunder nemen·
manlich wert sich vn rehter tat·
so wert sich minneklich vn svͤsses mv̊tes swer den hat·
so leret riterlich geselle sin vnd wol bi lúten zemen·
manlich dc treit den zǒm in mv̊tes mvnde·
vnd ringet mit dem mv̊te mange stunde·
so mv̊t mv̊t willeklich gerne were·
so brichet manlich mv̊tes mvnt·
von siner friheit mange stunt·
vf rehte tat dc merkent mv́twillere·
Mv̊t wille ist úbel er ist ǒch gůt·
er ist dem gv̊t der von mv̊twillen gerne das beste tv̊t·
vnd ist dem úbel der von mv̊twillen tv̊t des er sich solte schamen·
kvͤne vnd vri vf swaches leben·
swer der mv̊twillig ist wer mag dem fúrbas lere geben·
vnreht mv̊twille lat sich mit worten noch mit werken nieman zamen·
Ich han da bi gestanden vnd gesessen·
da dike ein herre selbe hat gemessen·
dú losen vnd dú durnehten
was half swie vil er si beschiet·
mit rede vnd doch der losen diet·
ze heinlich was vnd schvhte dú gerehten·
Gewalt mag melden vnder stan·
gedanke mv̊s[WS 6] man ledic vngevangen lâssen gan·
es wart nie keiser kv́nig so her der gedank vnd merken kvnne erwern·
vnzuht wc ist dir deste bas·
swiget din mvnt so sint dir reinv́ herze doh gehas·
nert dich gewalt· vor melden vor merken kan dich nieman wol ernern·
vnreht gewalt zevalle ste din brugge·
stete als ein tǒ si ir rippe vnd ǒch ir rugge·
In tiefem wage in túnnen ise·
wúnsche ich dc ir geverte si·
dar vf din last swere als ein bli
din vorgedanc· in dinen bůsen rise·
Dú ere was wilent also wert·
dc man ir ardes gerte denne man ir givte gert·
dc er mv̊s sin gar eren balt der si zehuse torste bitten·
In svelichem hove si von dem verswant[WS 7]
ir getorste sich nieman vnwirden mit vnhovelichen sitten·
swer nv geminne were vnd ǒch gemeine·
swas er ir liebes tête gros oder cleine·
dc dúhte si nv alles svͤsse·
si nimt noh kleinen dienst vergůt·
swer ir den willeklichen tůt·
dem niget si zelone vnz vf die fuͤsse·
Es wart nie wib noch man belogen·
so sere als ere vnd ist si doch da bi vil wol gezogen·
man git ir manigen friedel· vnd were es war des si sich moͤhte schamen·
der werlte vmbilde hoͤhet hie·
vnd nidert dort von welhen schulden oder wie·
solt ere iegeslichen minnen dur sinen pfingeslichen kúniges namen·
so wúrde si verwitwet also schiere·
ich nante ir wol in einem atemen viere·
die mit entlehenter wirde fůren·
vernt vf vnd húre wider abe·
das willeklicher ere habe·
nvn welle got sin lat sich niht behůten·
Es ist ein frome dú wunder birt·
zehimel vn vf der erde in wage in lúfte in vúre wirt
ir wunder niht verborgen si ist hoh si ist tief si ist breit si ist lang·
got ist der eren hohstes zil·
âne ere in nieman reichet er teilt ǒch ere dem er wil·
gegen aller creatúre· so ist er aller eren anevang·
engel megde marterer vnd bihtere·
dc der aller ere geliche were·
son hiesse vro ere niht ein wunder·
der eine ist gêret der and bas·
nach sinen tugenden iegesliců das·
svlt ir ǒch spehen an aller fruht besvnder·
Swas dú vil reinú trinitat·
gotlicher dinge zehimele vnd hie begangen hat·
da wc· dú ere mit dú svndert sich von gotes hvlden nie·
dú ere ist aller selden stam·
si wildet ie vnd bilde vnd was den rehten vůgen zam·
gelenke gv̊ten dingen vnd missewende widerbrúhtig ie·
ir craft dú heren gotes tǒgen kroͤnet·
ir wirde die engel túret vnd schoͤnet·
da von rat ich dc ir si eret·
wol im der zerehte pfliget·
der hat vor gote vnd hie gesiget·
si gotes zart lip vnd sele beheret·
Swas in der werlte noch geschah·
vntrúwen vnbildes· swa man vride vnd sv̊ne ie brach·
da wc vnere mite· dú brůfte ie mit willen missetat·
vnere swachet wib vnd man·
vnere der werlte lob noch gotes hulde nie gewan·
von rehte von den dingen vnere sich ie her gesvndert hat·
Vnere senket in der helle abgrúnde
vn [326r] ere ist aller valschen dinge vrkv́nde·
vnd ere vncristenlichen sinnet·
vnere ist eweklicher tot·
vnere bruͤuet iemer wernde nôt·
was sol sin leben der dich vnere minnet·
Dú edele ist ein hoher nam·
wol im der si behaltet svnder lasterliche scham·
dem gibe ich ane wenken· dc er besetzet wol der eren stat·
nv sprechent was mag besser sin·
danne edel richer lip der dc mit werke machet schin·
sin leben mit zúhtenheit nach tvgende rat vnz an sines lebennes mat·
den svln wir alle sprechen wol gemeine·
ich hans dar vúr dc er si engel reine·
swer edel si dc sult ir hoͤren·
dc ist der adellichen tůt·
den niht vn edellicher mv̊t·
mag sine zuht zerfuͤren noch zerstoͤren·
Das hohste ding da von man seit·
dc in der werlte mag gesin dc ist dú edelkeit·
der edel ist so wol dem wart[WS 8] dem koͤnde niemer bas geschehen·
dú edel ist kv́sche vnd wol gezogen·
swas man gegen edel wirbet da wirt nieman an betrǒgen·
dú edel ist suͤser worte· der edel mv̊s man alle tvgende iehen·
bi edel mag man selicheit wol vinden·
von edelkeit mv̊s aller valsch verswinden·
der edel kan sich niht gelichen·
wie man die edel erkennen sol das kan ich úch betúten wol·
nieman ist edel ern tů dan edellichen·
Zwei adel sint an den lúten ǒch·
von sinem kúnne ist einer edel vnd ist doch selbe ein gǒch·
der ander ist von sinen tugenden edel vnd niht von hohem namen·
swa dise zwene solten leben·
ze wete vmb ere wem dc lob die wisen solten geben·
so neme ich in zekempfen der sich vor vntvgenden kvnde schamen·
swer edel ist von magen vnd niht von mv̊te·
der brichet siner edelen vordern[WS 9] hůte·
nv sprechent ir nah spehende lúte·
sit dc der edelen vetter kint·
von hohem adel gevnedelt sint·
war ere[WS 10] mvge da man si mvͤde trúte·
Ich bin edel sprichet manig man·
an dem man tvgende noch ere zuht noch wirde erkennen kan·
ich wolte dc der were niht wol geborn noch edels mannes svn·
dur dc er pflege edeler sitte·
vnd dc die edeln swachen ir adel erten noch da mitte·
vnd dc man zallen ziten die edelen sehe adellichen tůn·
der edel stein zimt wol in rotem golde·
swer edeln stein in kvpfer legen wolde·
da mitte sin wirde were vermachet·
also geschiht einem edelen man·
der edele niht erkennen kan·
mit reinen sitten des edele wirt geswachet·
IR vsgesanten brůder seht[WS 11]·
zv̊ zúwer lere wol wand úwere wort vil maniger speht·
der eine wirs der ander bas misselicher merker hant ir vil·
versvmen vnd vergahen lat·
ir wissent wol dc mâsse mit disen zwein zetv̊n niht hat·
zevil verswigen svmet ein vber sprechen sich vergahen wil·
welt ir den sv́ndesiechen laben mit lere·
so schreket in mit zwiuel niht zesere·
dc ir im alle sv́nde vnmeret·
mit svͤssen worten dc ist gv̊t·
swa ir den wilden wilder tůt·
da were bas dc ir in gar verberet·
Swa so die lúte geordent sint·
es sin die himelberen oder es sin der helle kint·
dc wc gotte alles kvnt e ie wurde zit tag wuͤhse oder iar·
dar vmbe nieman sprechen sol·
swas ich getůn bin ich genislich ich genise wol·
bin ich dem valle ergeben son hilfet mich min wol tůn niht ein har·
swer sich also mit rede verketzeriet·
von dem ist der zwiuel niht gefrîet·
wir svln den zwiuel vs vns rumen·
dú gottes vor gewissenheit·
dv ensolte vns niht hares breit·
vnd ist dc wir vns selben niht versvmen·
Her han ich wil úch siges iehen·
ir sint so rehte kvͤne als ich vil dike han gesehen·
úwer meisterschaft ist gros gegen úweren wiben der ir habt doch vil·
nv ist niht wan eine mir beschert·
dv́ hat mich aller froͤide vnd miner sinne gar behert·
si treit dc lenger messer vnd zv́rnet swenne ich froͤlich wesen wil·
het ich ir zwo so getoͤrste ich niht gelachen·
het ich viere so mvͤste mir froͤide swachen·
het ich ir ehte wie genese ich dennen·
so wurde ich schiere von in verzert·
her han dc úch úwer frúmkeit nert·
dast úwer heil wan ir meistert zwelf hennen·
Swa gv̊t man hat ein v́bel wib·
vnd da bi vnuerwissen gar verfluͤchet si der lib·
da ist lúzel eren bi swa si der meisterschefte pfliget·
noch besser wer ein senfter tot·
[326v] dem gv̊ten man zelîden dan iemer mer werndú not·
ich wil dich gůtman leren wie din meisterschaft ir angesiget·
du solt dir dine guͤte lan entslifen·
vnd solt nach einem grôssen knútel grifen·
den solt ir zv̊ dem ruggen messen·
ie bas vnd bas nach diner kraft·
dc si der iehe der meisterschaft·
heis si dir swern si welle ir v́bele vergessen·
Tvrnieren was ie ritterlich·
nv ist es rinderlich toblich totreis mvndes rich·
mortmesser vnd mort kolben gesliffen aks gar vf des mannes tot·
sus ist der turnei nv gestalt·
des werdent schonen frowen ir ǒgen rot ir herze kalt·
swanne si ir werden lieben man da weis in mortlicher not·
do man turnierens pflag dur ritters ere·
dvrh hohen mv̊t dvr hv́bescheit vnd dur ere·
do hete man vmbe eine decke·
vngerne erwúrget gůten man·
swer dc nv tůt vnd dc wol kan·
der dunket sich zerwerlte gar ein reke·
Es ist ein wurze dú schaden birt·
von der leiden sâmen vil manig sele verirret wirt·
der himelichen wunne die got den gv̊ten selen hat bereit·
swer die wurze erkennen wil·
vnd ir samen der sol miden alles wúrfel spil·
dc swendet gv̊t vnd ere vnd bringet der sele dort iemer werndú leit·
owe im der sin ie von erst gedahte·
was er der sele da mitte zerhelle brahte·
vnd schiet si von dem himelriche·
owe welh ein verflůchter vunt·
da mit er stúret der helle grunt·
swem si wirt kvnt der brinnet ewekliche·
Dú trunkenheit tůt grossen schaden·
si tůt die sele sv́nden vnde schanden vberladen·
si machent manigen man dc im got vnd die lúte werdent gram·
dú trunkenheit tůt dannoh me·
si schadet an dem gv̊te vnd tůt da bi dem libe we·
si stvmmet vnd blendet si toͤtet vnd machet manigen lam·
sit das si toͤtet sele lib vnd ere·
vnd benimt dc gůt vnd bruͤuet noh schaden mere·
wie sol man in heissen danne
der ir wil volgen zaller stunt·
her trunkenbolt her trunkenslunt·
sus heisset er von wibe vnd ǒch von manne·
Zvkersvͤsses honec benit·
die enwurden ie so svͤsse als ein wort des man nv pfliget·
wilent was es bitter nv ist es worden also svͤsse gar·
dc selbe wort e nieman sprach·
da giengen vnderwilen· grosse slege vnd wunden nach·
nv istz also svͤsse worden dc nieman nv nimt so svͤsses war·
dc selbe wort wil ich mit fv̊ge nennen·
dc ir es alle mvget wol erkennen·
si sprechent sîm von boͤsen wiben·
vnd dc leider also vil·
dc ichs got iemer klagen wil·
vnd sol dc wort die lenge also beliben·
Dú milte manigen herren hat·
ir knehte der weis ich lútzel an min herze mir dc gat·
gv̊t leben was bi ir knehten nv ist dv́ wile bi ir herren lang·
ir herren sint so here gar·
dc si in ir keines herze niemer wol enkumet dar·
wil si mit ir iht werben des mv̊s si varn vnder einer banc·
vnz ir einer lihte des gerůchet·
dc er si durh gv̊ten willen sůchet·
der stv̊nden mv̊s si danne vâren·
des taten niht ir knehte do·
die enwurden niemer fro·
vnz an die wile swenne si in ir dienste waren·
Ist milte ein tvgent als man ir giht·
so weis ich wol an ir dc si lert gůt hin werfen niht·
si kan wol hengen vnd haben si kan wol halten vnd lan·
ich weis wol ir tůt we versagen·
swa si zerehte geben sol da kan si niht verzagen·
swen si ir hant mit helfe bútet· dast mit herzen ǒch getan·
swer vierdunc lop mit marken vbergiltet·
der hat ǒch getôrt vnd niht gemiltet·
vnd da bi fůder mesig êre·
mit hantvol niht engelten wil·
der ere ist ǒch ein teil zevil
dc missezimt der rehten milte serê·
Swind ist ein lob swer dc nv kan·
bi der welde verdienen der ist ein gar nach retig man·
was gar nah retig si dc wirt in sibchen ahte dike schin·
do sibche starb do lies er kint·
dú nv bi disen ziten also swinde worden sint·
dc man si liden mv̊s da man ir wol enbere moͤht es sin·
swa swinde clůgheit heime bi ir behuset·
vnd swinde lûsset da bi clůgheit mv̂set·
hin vnd her mit kúndekeite·
ist da trúwe vnd warheit mitte·
des enwen ich niht als ich ir sitte·
erkennen kan gůt frúnt flúh ir geleite·
Dv́ klv̊gheit ist der kúndekeit·
kebshalb [327r] vil nahe sippe· vnd ist dc si magen leit·
so huͤten dc div klv̊gheit der kúndekeit iht gar zeheimlich si·
klůg vnd klv̊g vnd vberklůg·
der drier hat ein reines herze an einem gar genv̊g·
ist klv̊g ein lop so klv̊g also dc da iht grete steke bi·
swes klůgheit stet mit kúndekeit zevâre·
wie er mit frúnde so kúndeklich gebare·
da wil klv̊gheit ir lob verboͤsen·
nv clvͤgen hin nv klvͤgen her·
swa klůgheit ist mit valscher ger·
dú enzimet niht wol wan den argelosen·
Her frúnt wie tůt ir mir nv so·
ir tůt als ir mir worden sint zebiderbe vnd zeho·
seht vúr die fuͤsse bas vnd vberseht den frúnt so lihte niht·
sit úwers viendes niht zegeil·
was ob úwer heil eime andern kvmet an sin seil·
den ir nv vberseht dc úch der selbe har nach vbersiht·
nv wârent ir doch noch vor einem iare·
min bester frúnt nv stet ir mir ze vare·
mit mvchelreher kv́ndekeite·
han ich úch niht bi namen genant·
so ist úch doch wol dc bekant·
dc disú rede uf úch get mit geleite·
Die engel sint noch engel kint·
vnd da bi hessig nidig hohgemvͤtig sint·
wie kvnden si nah gottes eren einen rehten babst erwellen·
romere sint niht heilig gar·
also sint die cardinal ob ichs gespreche tar·
swen si vnheiligen erwelnt den wellent si vúr heiligen zeln·
vnrehte weler welnt vil dike vnrehte·
die gotes erwelten die sint sine knehte·
swer gotes erwelter babest wêre·
nach dem orden melchisedech·
dem er krone vnd kelch verlech·
der wer vns wol zerome vatterbere·
Des vater swert vnd ǒch des svns·
die en hellent niht geliche dc bekrenket si vnd vns·
des vater swert agreifet vf húgelin vnd vf des riches has·
swa sin das riche hin bedarf·
man enwetz es mit dem golde anders wirt es niemer scharf·
dc selbe swert trůg wilent der grawe herre sante peter[WS 12] bas·
nv treit es peter húgel mit dem schine·
do man gregorium worhte vs peterline·
do solt er mit dem selben[WS 13]swerte·
sich húgelines han erwert·
der noh mit vns nach schatze vert·
an peters stat der niht wan selen gerte·
Walt hat oren velt hat gesiht·
ir hohen rimêre riment von dem richen keiser niht·
wan das ir getúrret gesprechen von dem keiser stille vnd vberlut·
sin oren hoͤrent dur den walt·
sin ǒgen verrent vber velt sin hv̊te ist manigvalt·
sin merken vnd sin melden dú sint ǒch swinder danne windes brût·
kranches hals ebers oren strûsses ǒgen·
dú drú getrv̊c nie keiser me so tǒgen·
da hin gegen siner viende lâge·
er hat der nagel grôssen hort·
swas man im locher vor gebort·
dú fúllet er mit lancreher wage·
Das riche was vil sere siech·
sin stimme wc vor klage tunkel heiser vnd riech·
rôt waren im dú ougen dú oren tǒp erstvmmet wc es ǒch·
den houer kvnde es niht verheln·
vnd einen vngefuͤgen cropf trǒg es an siner keln·
es enmohte gen noch riten· vf allen vieren es vil kvme krǒch·
vnz im gesante got den keiser wisen·
des wisheit svlen alle wîsen prisen·
der hat die siecheit vnderstanden·
des riches ding vil ebene stât·
wan dc im noch steket ein grât·
er weis wol wa entzwschen sinen zanden·
Got alter vnd núwer crist·
sit alle creatúre in diner hant beslossen ist·
der himel vnd dú erde wasser fúr luft vnd allú engelschaft·
der liehte tag dú truͤbe naht·
mit lǒfe wol berihtet hat din goͤtelichú maht·
dú ie an anegengen vnd iemer ist mit endeloser kraft·
dv angesihteklichen wunder tete·
do man dich sach in menschelicher wete·
vnd vor den ivden svnderliche·
las verns alrerst din ellen sehen·
des dir die kristen mv̊ssen iehen·
vnd widerstant von stǒfen frideriche·
Das riche dast des keisers niht·
er ist sin pfleger vnd sin voget ir fúrsten sehent ir iht·
an im so schuldehaftes da von er sv́le des riches abe gesten·
so nemt ú einen der ú zeme·
vnd ǒch dem riche bas dan er
vnd wartent alle deme·
sit ir dem keiser gram die rache lânt niht vber das riche gen·
ir svlt des riches wol von rehte schonen·
swenne ir dem keiser nv genemt die crônen·
swelh úwer si dan vf gesetzet·
der sol dc riche wol entladen·
beide von [327v] vnrehte vnd von schaden·
so werden wir des keisers wol ergetzet·
Svmelichen fúrften ist dc leit·
dc roͤmesch rich gevallen ist in dise vnwerdekeit·
si dvnket vnd sprechent ein anderre pflege des riches bas dan er·
lamparten kriechen vngerlant·
die ergaben sich dem riche do stunt es in sin eines hant·
des riches rinc vil widerwirt nimt man im crone vnd ǒch dc sper·
nv sehent vúr úch des riches welere·
den ir nv welt dc er si schanden lere·
vnd also dc ir in versv̊chent·
werde er iv lieb so stet im eben·
vnd si des niht so lât iv geben·
dc riche wider zehant so irs gerůchent·
Ein kúnig der wol gekroͤnet gat·
vnd dc sin crone verre bas gekúniget stat·
da ziert der kúnig die crone·
bas dan in div krone gezieren mvge·
ein wol gekúniget krone trage·
tůt dannoch mere er stiller witwen vnd weisen klage·
er svͤnet vnd vridet vnd ist bi lu͗ten wol in eren hvge·
sin herze vnd ǒch sin mv̊t sint selten mvͤssig·
sin mvnt ist zallen ziten eren gruͤssig·
im schimelt niht in siner archen·
dc bezúget ich mit dem besten wol·
mit vrlobe ich in nennen[WS 14] sol·
es ist der kúnig erich von tenemarke·
Ein kúnig der aller der wil sin·
die siner helfe gerůchent der ist ǒch vnder wilent min·
wie moͤht er min vermissen swenne er vmbe vnd vmbe wil gewern·
er giltet lob vnd giltet kvnst·
er git dem gerenden gůt an im lit ere vnd ǒch vernvnst·
er ist ein kǒfman alles des ein reine herze kan begern·
wan dc in dv́rst nach eren also sere·
der in in gvsse drisseg fúrsten ere·
noch mere wolt in nach eren dúrsten·
der svnne zimt niht bc dem tage·
danne den edelen krone trage·
vs beheim lant gotte vnd vns zeinem fúrsten·
Her herre vnd habt ir einen man·
der iv sinen dienest market veile machen kan·
so messent sinen dienest nach der miete vnd nach der liebe niht·
vnd versv̊chent in dannoh·
irn sult in aber niht haben fúr einen willerichen doch·
der willeriche schilt get fúr den market veiln als man giht·
belehent schilt vnd behvset vor manigen iaren·
des schilt der sol niht zegelich gebaren·
belehent schilt vnd der behuset·
der sol sich stellen dem gelich·
dc man iht spreche schilt pfi dich·
wie sere mir vor dime túnne gruset·
Swer einen gucgǒch haben wil·
an eines habches stat vnd wenet da mit vahen vil·
reiger gense rappen dc mv̊s geschehen ob ims der túuel wiget·
ich wene der gucguc cleine gert·
so des habches tvgende mit sterche gegen dem storchen vert·
der gucguc gert der mvggen der habch dem starken storchen obe liget·
ǒch ist ir beider wirde vil vngeliche·
nv habent den gǒch die herren svmeliche·
vil bas ich meine ein smeichenere·
der niht wan schande vahen kan·
vnd smehent den getrúwen man·
der dvr si were vahens niht zeswere·
Swa lugener ist herren botte·
vnd swa der boͤse zage pfliget einer starken rotte·
da wirt dú botschaft michel vnd kert der zage vienden lihte den nac·
were ich ein herre ich wolt ir niht·
von disen zwein mag wol geschehen ein michel vngeschiht·
von dem lugenere vnd von dem zagen der kecher rotten pflag·
si mvͤsten minen hof mit flúten vrien·
oder ich begvnde si schone beide zwien·
ein bǒn were wol mit in gekleidet·
einhalp mit starker lekerheit·
dishalb des swert nie vient versneit·
vnd doch mit rede vor lúten vil gevreidet·
Ein hovschrecke wande ein loͤwe sin·
do sprach ein heime mich dunket ich si ein howendes swin·
ein ohse wande dc er svnge bas danne ie kein nahtegal·
do sprach ein affe so wene ich bin·
dc schonste tier ein tore iach so han ich wisen sin·
ein snegge wolte springen· vúr den lehbart beide berg vnd tal·
ein mor sprach mich mag nieman vber wîssen·
ein hase sprach ich tar wol wolfe bissen·
ein igel sprach min hut ist linde·
solt ich es bi dem eide sagen·
si moͤhte ein keiserinne tragen·
ze nehst an ir die lúge sint alle swinde·
Ein klage in minem herzen hat·
sich lange her vercluset der niemer tvgende noh ere begat·
dc der an gv̊te richet vnd dc der eren riche wirt gůtes bar·
solt ich in beiden [328r] teilen gv̊t·
ich rihte den eren richen der sich vor schanden hat behůt·
der milte vnd tvgende wielte der zúhte vnd eren wer vollekomen gar·
den tvgende losen wolte ich swache spisen·
dc er e siner tage mvͤste grisen·
vf das ob er sich wolte bekeren·
lies er von boͤsen sitten abe·
ich gebe im richtůn vnd habe·
sehe ich an im sich tvgende vnd ere meren·
Ein voller mensch fúnf sinne hat·
als vns dú schrift bewiset vnd als ir nam geschriben stat·
sehen hoͤren[WS 15] grifen riechen smakem sus sint si genant·
nv habent die sinne fúnf wildú tier·
ir ieliches einen vnd hat den fúrbas danne wir·
der luhs dc swin dú spinne der gir der affe dc tůt in got bekant·
der luhs gesiht dc swin wol hoͤret ze walde·
dú spinne kleine grifet vnd balde·
der gir rúcht affe smaket der sinnen·
hat iegeslichs den einen bas·
dan der mensche dvr dc wunder dc·
got hat getan dc zwir sinú wunder minnen·
Merke tvmbes mv̊tes ivnger man·
war vmbe drie creatúre der hvnt dú katze vn ǒch der han·
heissent husgerete da ratent si dc manigem kvmt zegv̊te·
des hvndes bellen dir kv́ndet dc·
wie dú gegen froͤmden lúten solt wesen snel vnd niht zelas·
die biderben haben nach eren dc zimt dir wol gegen boͤsen stete hv̊te·
dú katze minnet vnreines vnd das reine·
das dv niht habe reine sitte gemeine·
der han dir kúndet mit gesange·
dristunt zer naht des tages kunf·
verslafest dú sinen sigenvnft·
in todes last so slafest dv zelange·
Swer minnen wil nach minne sitte·
der wisse dc d minne sol rehte milte volgen mitte·
diemv̊te dur die minne der hohste minner wol erzeiget hat·
nie minner[WS 16] hoher minne pflag·
als der durh minne liebe sin selbes leben so ringe wag·
dehein minner niemer mere durh minne liebe der milte so bi gestat·
nv merkent rehte wer der minner were·
dc wc iesus der svͤsse wunderere·
der gab dur vns der minne zelone·
sin selbes leben in todes gir·
ir minner seht wie minnent ir·
minne vnd milte tragent beide des himels krone·
Der rehte gůte sol niht gern·
dc man in vs der erde zweier lône sv́le gewern·
dc er si rich an gůte vnd da bi si ane valsche beiag·
wil er im selben wol behagen·
gotte vnd gv̊ten lúten so sol er gůtes niht beiagen·
wan als im sin selbes gewissen warer gezúg gewesen mag·
der gůte sol sich froͤiwen gůtes mv̊tes·
hat er da bi die minre mâsse des gv̊tes·
die minne er fúr die vbermâsse·
swer me wil haben dan er sol·
der wirt gv̊tes minne vol·
vnz in dv́ werlt lat ê dc er si lâsse·
Ein vngebetten gevaterschaft·
wert niht wan siben naht vnd fúrbas hat si keine kraft·
so man den tǒf vs gússet da mit so ist gevaterschaft da hin·
swer aber gevater wirt dur gůt·
durh frúntschaft vnd durh liebe als dike ein frúnt gegen frúnde tůt·
dc waltet grosser trúwen als ich von karles vetter bewiset bin·
swer vngebetten zv̊ dem tǒfe dringet·
den herren bette noch herren vorhte dar twinget·
vnd het er eine tohter ivnge·
vnd gewuͤhse danne dirre gebar·
er gelege wol wurde im sin stat·
d tohter bi ob in ir minne twunge·
Gesotten lúge gebraten lúge·
lúge vs der galrei lúge von parat lúge von trúge·
gebalsmet lúge gebismet lúge lúge mit safran vberzogen·
lv́ge swie mans erdenken kan wil·
der wirt gesant an brieuen in des riches stete so vil·
dc mich des iemer wunder nimt dc si mit lúge niht sint betrogen·
dc si der lúge niht sint worden rêsse·
es wurde nie so starke lúge vrêsse·
als in des riches stette die lúte·
swc man in lúge mag zv̊ getragen·
die swindentz alle mit ir kragen·
in weis ob es ein púllesch zvber túte·
Dv́ werlt gelichet sich dem mer·
dc iemer tobet vnd v́ndet vbermâsse vnd ane wer·
also tobet vnd v́ndet der werlte leben mit gelicher geselleschaft·
der vngetǒften si geswigen·
ich klage dc die getǒften in den kvmber sint gedigen·
des si wol mvgen verderben es enwende dú starke gottes kraft·
belibent si die lenge in dirre vreise·
so werden wir kielbrústig vf der reise·
wir sweben in der sv́nden v́nden·
primaten mit ir krumben steben·
die vischent niht wan nach den geben·
vnd lant da bi die sele in grosen súnden·
[328v] Die wildener die habent sitte·
das si doch vnder wilent beiagent guͤtú mursel mitte·
swenne si die aren vindent so bindent si die ivngen an dc nest·
vnd sperrent in den snabel ǒch·
swie vil der alte vúr si geleit so gint der ivnge gǒch·
so nimt er im dc beste dc treit er alles hein in sinen test·
er lât si sten vnd nagen ob einer crawen·
dc gv̊te brichet er in vs den klawen·
dc gelich ich zv̊ den rat lúten·
die da ivnge herren[WS 17] han·
die lâssentz ob den crawen stan·
vnd nement si die hasen mit den húten·
Zwiuel machet zwiuel mv̊t·
zwiuel buwet selten hus vf starke sule gv̊t·
zwiuellichen wende zwiuel bvwet vnd zwiuelliches tach·
manig zwiuel hof ist also grôs·
dc ich des vúrhte sere si mvͤssen ligen buwes blos·
der zwiuel hat niht ein ende[WS 18] zwiueler hie bevor in zwiuel sprach·
zwiuel buwet selten gv̊t gesêsse·
zwiuel riet mir dc ich niht en mêsse·
weder hofstat noch gezimber·
zwiuel welle mich danne lân·
vnd darzv̊ zwiuellicher wan·
so sit gewis dc ich gebvwe ninmer·
Vil wiser man nv hoͤre mir·
ein ding dc wol geteilet ist dc wil ich teilen dir·
hie vor wc trúwe vnd ere froͤide bi zuht· vnd alles gv̊tes vil·
woltest dv dc so manigen tag·
do sin gewesen als nv din leben gewesen mag·
dc din nv niht enwere· nv merke reht wc ich dir sagen wil·
der werlte leben dast nv worden swere·
es richet valsch vnd lugelichú mere·
die lúte sint worden vngetrúwe·
verratet der vater nv sin kint·
dú meiste menge ist eren blint·
nv kús also dc es dich iht gerivwe·
Beschaffen vnd es mv̊ste sin·
mit disen zwenin bedekent tvmbe lúte ir schanden schin·
beschaffen vnd es mvͤste sin dú werfent niemannes ere hin·
swer selbe sin ere vber siht·
vnd die verlúset der endarf dú zwei des zihen niht·
beschaffen vnd es mvͤste sin wand ich des wider kempfe bin·
es mvͤste sin vnd es wc mir beschaffen·
dc hoͤre ich dike sprechen mangen affen·
als in sin selbes mv̊t betrúget·
dc er sv́nde vnd schande begat·
vnd giht es si beschafnú tat·
ane sine schulde vúr war der tôre lúget·
Nv merkent alle wie dc zimt·
swa man von herren hoͤuen disú houemere vernimt·
wir kamen hin zehoue vnd fůgte sich so dc wir niht kamen dar·
nv merke sinne richer man·
ob ich dir disen sin bescheidenlich bescheiden kan·
so nim in dinem herzen tǒgenlichen miner sprúche war[WS 19]·
swer kumt zehove vnd herren gerne sehe·
wirt dem zehove erbotten solhú smehe·
dc man in freuellichen enget·
dc er des herren niht ensiht·
der ist ze hove vnd ist da niht·
des herren lob mit schelten wirt gemengent·
Es was ein gar vnselig man·
in einer stat gesessen dar inne er nie dehein heil gewân·
der dahte ich wil versv̊chen wie min gelúke in fremden landen si·
do im der reise zemv̊te wart·
vnselde wart sin geuerte dú hv̊b sich mit im vf die vart·
er lief gegen einem walde er wande er were vnselden worden vri·
er sprach vnselde nv bin ich dir entrunnen·
nein sprach vnselde ich han den sig gewunnen·
swas du geliefe dc selbe ich rande·
vf dinem halse wc min gemach·
der man do zů im selben sprach·
sost niht so gv̊t ich enkere wider zelande·
Einem vischer trǒmt er solte lan·
swc er vienge cleiner vische er solte niht wan grôsse van·
die ime vnd sime gesinde weren helfelich fúr alle ir armv̊t·
der vischer volgte dem trǒme nach·
swas er vieng cleiner vische der enahtet er niht im was gach·
wie er die grôssen vienge in betrǒc der trǒm als er noh manigem tůt·
svs wart der vischer grôsser sorgen riche·
dem vischer ich vil manigen man geliche·
der cleines gůtes niht enahtet·
vnd gewinnet er des grôssen niht·
reht als dem vischer im geschiht·
der die kleinen lie vnd nah den grossen trahtet·
IN miner abentzit ich bin·
vnd trage doch ivngen lúten gar ivnglichen morgen schin·
ich lege mich vf minen arm vnd spanne doh nach eren wol·
min abent svnnen schin ist bleich·
ist aber der ivngen morgen rot da bi ir ellen weich·
so wirt ir lib gemaches rich da bi an eren selten vol·
ivng man nv wis fro vnd doh mit zúhten·
úlfheit ist ein suht ob allen súhten·
an ivngen eregernden luten·
úlfcheit erzúhet ivngen lib·
so dc got noch reinú [329r] wib
in niht mvgen geminnen noch getruten·
Dú welt ist nv so wunderlich·
so si ein dúrre begrifet si verzagent alle gelich·
vnd moͤhte doch gedenken· got hies vs hertem steine wasser gan·
swer gar verzaget der ist verlorn·
hie libes dort der sele we im dc er ie wart geborn·
swer die sv́nde buͤsset der mv̊s von gotte svnder genade han·
irdenscher frúht got sinen regen sendet·
der ǒgen flůt mit rúwen sv́nde wendet·
er selig der des gedinget·
vnd sich verlâset an des geben·
der vns git sterben vnd leben·
des barmekeit vns zedem himel bringet·
Swenne ein zvn drú iar gestat·
vnd dc ein hunt des zunes alter drú verslissen hat·
wirt danne ein ros dristvnt als alt als der hvnt dc ist alt genv̊g·
wirt danne ein man dristunt als alt·
als dc ros seht der ist allen wiben gar zekalt·
ern ist niht minnebere swie vil er fúrs hie vor vs helme slůg·
swer in danne vor gerihte kampflich an sprichet·
dc alte hovereht er an im brichet·
dc svlt ir svnder triegen wissen·
ist dc ichs bezúgen sol·
so bezúge ichs mit hern hoier wol·
der hat wol drú rosses alter verslissen·
Wir haben gehort lange wol·
dc man den man bi sinen gesellen dike erkennen sol·
hvͤtet úch vor vngesellen· ir werden edeln die nach eren streben·
von vngesellen wirt der man·
vil dike hǒbet siech wirt einr der mv̊s[WS 20] mit schanden an sin ende leben·
hvͤt úch vor vngesellen zallen stvnden·
ich wolte dc[WS 21] si solten gen gebunden·
alsam die frowen mit gebenden·
dc man si erkante da bi·
vnd alle lúte sprechent pfi·
verschamtú brut ir welt die minne schenden·
Atzvnge ist herren hof ein hagel·
atzvnge ist herren habe me vergift danne natern zagel·
atzvnge beschatzet der herren arme lúte vnz an den grvnt·
atzvnge dú vrisset den hohen nider·
vnd machet den nideren hoh da kan nieman getv̊n niht wider·
were dc der wirte schade so were es der hren hohster vunt·
atzvnge zv̊ swem si sich gesellet·
den frisset si dc im dú maht enphellet·
atzunge dc dv sist verflůchet·
swa dv den ere gerenden weist·
dem verezzest dv vras aller meist
nv fris in dich den túfel der[WS 22] din růchet·
So wag geliut so wint geliget·
so die starke mvͤden den wil den tiern an gesiget·
dc si sich legent durh růwe· so er gerůwet megenzer bischof niht·
er ist ein waller her vnd dar
swa er sich hin erbútet· so wil er lihte anderswar·
alsus man sine reise den wise wassern dike geliche siht·
er weis wol velt hat oren walt hat ǒgen·
svs machet er siner viende speher toren·
mit kranch halse[WS 23] kan er wol swigen·
vnd mit struses ǒgen sehen·
mit lvhses oren runen spehen·
stein bokes wis kan er wol berge stigen·
Ein sneller wol gevierter wagen·
der get vf zwelf schiben vnd hat lange hergetragen·
zwo vnd fúnfzeg frowen· die sint dar vf gesetzet nach ir zal·
der wagen niemer stille stat·
sin orden zallen ziten snelle lǒfet vnd gat·
vs holze niht gehǒwen ern ist zekvrz zelang zebreit zesmal·
den wagen ziehent siben ros sint wisse·
vnd ander siben swarz mit stetem vlisse·
wer ist der mir den wagen betútet
dem gebe got iar ane lein·
der wagen ist ú vor geseit·
der lǒset vnz im sin meister dc verbútet·
Dis liet ist vol wunders gar·
ich sach vf einem wagen zwo vnd fúnfzeg frowen var·
die heten alle ein swester die vindet man bi welher so man wil·
dc erste vol snewes wc·
dc ander dc trůg wurze dc dritte blv̊men vnd gras·
dc vierde trůg besvnder korn obs win zam vnd wildes vil·
den wagen vierzehen ros merkent wunder
zwelf wagen man die pflagen ir besvnder·
die waren bi in zallen stvnden·
iegslicher der stv̊nt sinen weg·
ane brvgge vnd ane stek·
ich han den wagen ane schatz ze kv̊fe fvnden·
Sich mensche dich wer du bist·
war vs dv sist worden vnd wer dv wirst in kurzer vrist·
din leben wert vnlange wider dem leben dc niemer ende hat·
lebe tusent iar dc ist ein wint
wider manigen iaren dv́ da niht zellenne sint·
da froͤide ist âne ende· manig wunne spil dú niemer mer[WS 24] zergât·
war kan din vater mv̊ter brůder swester
dú werlt wart nie gemeiner krankeit vester
[329v] denne si ist bi disen ziten·
dú meiste menge hat den mv̊t·
si werbent vmbe landes gůt·
vnd wissent niht wie lange der tot welle biten·
Vil tvmber mensche ich râte dir·
den rât der dir wol fuͤget ob dv wilt gerne volgen mir·
dv denke in dinen sinnen wie dv gewinnest ein ewekliches leben·
vor allem horde so minne got·
dv frage wise lúte dc si dir sagen dú zehen gebot·
dú kristenlicher lere der cristenheit zehelfe sint gegeben·
nv merke reht wie dv si solt behalten·
vnd tůst dv dc so maht dv selden walte·
hie vnd dort gar eweclichen
verdienest dv der sele heil·
des himels froͤiden erbeteil·
besitzest dv dc wissest sicherlichen·
Swer ane sv́nde welle veruarn·
der mide drie sv́nde er kan sich niemer bas bewarn·
dú erste heisset hohuart dú ander vngehorsam ist genant·
die dritte nennet man gitekeit·
dise hǒbet sv́nde machent iemer werndú leit·
dc vns da vor behvͤte der svͤsse got des mvͤsse er sin gemant·
lucifer wart durh die erste verstossen·
von himel er vnd ander sin genôssen dú ander rǒbet dc paradise·
dú dritte wůchert alle tage·
die tiefe der helle owe der klage·
mensche sich fúr dich vnd hvͤte dich sist dv wise·
Ich han gehoͤret manigen tag·
dc eteswenne ein nagel ein isen wol behaben mag·
vnd ein isen behabt ein ros vnd das ros behabt ein biderben man·
so wirt ǒch eteswenne erwerert·
ein bvrg von biderbem manne vnd von der burg ein lant ernert·
swas grosser dinge ergat dv́ hebent sich von cleinen dingen an·
nagel isen ros burg lant dú fúnfú weren·
breit wan dc mich dvnket an den meren·
wir han dar zů niht ganzes mannes
we im das er ie wart geborn·
an dem fúnfú sint verlorn·
der were wert ahte vnd ǒch des bannes·
Ich kan geritten vf ein velt·
vúr einen gruͤnen walt da vant ich ein vil schoͤn gezelt·
dar vnder sas dú trúwe· si wand ir hende si gote ir leit·
si schre vil lute vnd sprach ze got·
herre la dich erbarmen ich bin in der werlt der richen spot·
dc rihte dv mir herre din gewalt ist michel vnd breit·
die vngetrúwen wellent mich verkeren·
herre got hilf mine froͤide meren·
min schar ist worden alse cleine·
der vngetrúwen ist so vil·
vntrúwe ist in der werlte ein spil·
nv hilf im crist swer dich mit truwen meine·
Got vater vnser da dv bist·
in dem himel riche gewaltig alles des dir ist·
geheiliget so werde din nam zv̊ so mvͤsse vns komen dc riche din·
din wille werde dem gelich·
hie vf der erde als in den himeln des gewer vnsich·
nv gib vns vnser tegelich brot vnd swes wir dar nach dúrftig sin·
vergib vns allen sament vnser schulde·
als dv wilt dc wir durh dine hulde·
vergeben der wir ie genamen·
dekeinen schaden swie gros er si·
vor sv́nden bekor so mache vns vri·
vnd loͤse vns ǒch von allem v́bele amen·
Got aller gv̊ter dinge vrspring·
got aller wite vnd aller lenge ein vmbegender ring·
got aller hohe ein dach got aller tiefe ein endeloser grunt·
nv sich vs diner goteheit·
vs diner túre har nidere der gekǒften kristenheit·
durh die din eineborner svn wart an dem frone crúze wunt·
mit sinem blv̊t er vns gemehelt zebrúten·
die liebe solt dv herre an vns trúten·
dvrch den er vns tier hat gefriget·
von helle vnd vs des tieuels kloben·
den svln wir mit sant dir loben
fúr einen got· vnd doch die namen gedriget·
Das boͤste fleisch dc ie gtrůg·
wolf oder hvnt in sinem mvnde dc was boͤs genv̊g·
des boͤsen menschen zvnge ist boͤser vil so we im die si tragen·
mit worten krenkent si den luft·
vnd senkent îene die si da tragent in der helle gruft·
knie runen lvgelosen meine swern spotten dar zv̊ flůch beiagen·
dc kan boͤse zvnge vnd dannoch mêre·
si weket zorn vnd loͤschet houes ere·
si snabel snellet von den besten·
dc boͤste dc si vinden kan·
dú werlt nie boͤser fleisch gewan·
des mvͤssen sich die maden an ir meften·
So we dir werlt din valscher glanz·
an aller stetekeit vnstete durkel vnd vnganz·
enzvket hat mit loser luge svn· nvz hin mine tagen·
dv hiesse mich in wollvst leben·
mines herzen wider got mit kv́ndekeit hie streben·
des han ich dir gevolget dc ich nv zespate [330r] leider klage·
mir ist von sv́nden vs gebogen der rugge·
vnd weis niht wenne mich der tot hin zugge·
bar gv̊ter werke vnd rúwen beider·
der man zetode wol bedarf·
din lon svr bitter vnd scharpf·
ich funden han werlt an dem ende leider·
Wes svmest dv dich endekrist·
dc dv niht kvmst sit al dú werlt so gar schatz gitig ist·
nv hast dv doch zegebenne des si da gert gist ir si git sich dir·
dv fvnde nie so gůten kǒf·
so nv dv endarft niht fúrhten den gelǒben noch den tǒf·
es ist ir alles veile so gar stet nv nach gv̊te ir herzen gir·
iesus crist den ê die ivden verkǒften·
wer er hie en erde ich wene die getǒften·
noch verkǒften svmeliche·
kvm endekrist dv rehter gǒch·
den pfaffen zů der kilchen ǒch·
vindest dv nv veile vnd roͤmsches riche·
Sage vngelopter richer man·
warvmbe enganst dv niht dem biderben man des er dir gan·
ia gvnde er dir wol eren· so nidest dv dc er als erhaft ist·
lâs in mit sinem gv̊te leben·
dar nach als im got mv̊t sime edelen herzen hat gegeben·
wilt dv niht sin als er so en mag ǒch er niht sin als dv da bist·
wis als dv bist vnd habe dir dc zebv̊ze·
dc dv den biderben gvnnest der vnmv̊sse·
da mitte er eren mv́ge ervolgen·
vnd ǒch sin gv̊t erzúgen mv́ge·
sit dir sin leben niht entúge·
noch im din leben so enwis im niht erbolgen·
Eben vber vnd vnder durh geuarn·
dc ist zehoh vnd ǒch zenidere swer dc wil bewarn·
der var enmitten hin dc ist vúr vallen vnd vúr struchen gůt·
ein mêsselich stigen wirret niht·
von vnmeslichen stigen swindelt lihte so man giht·
swer gnv̊g tůt der tůt bc danne einer der im selben vbertůt·
der mittel mâsse pflâgen ie die wisen·
oben vber gehortich nie die wisen prisen·
des si gelobt dú mitel mâsse·
tumbes mannes vf vnd abe·
der vornan strebe vnd hinden snabe·
vnd v́berreht vnsteteklichen grâsse·
Es sol ein rittermêssig kneht·
den zapfen gerner schúhen danne den schilt dc ist sin reht·
gesiget der zapfe an im so entwahset im der schilt in vremde hant·
stet im der mv̊t eben in den schilt·
so dc herze vnd mv̊t im reht vf schiltes ampt spilt·
dc git im gv̊ten mv̊t vnd hohes lop verre vnd wite erkant·
ir edelen knehte lernent also trinken·
dc ir niht schiltes halb beginnent hinken·
fúr túrsten ist trinken wol erlǒbet·
swem aber dvrh des zapfen kling·
vnmerent ritterlichú ding·
der treit hin hein vil lihte ein trunken hǒbet·
E das die knappen wider als ê·
ze knehten werden so wirt ir wol tusent oder me·
bestúmbelt vnd erhangen dc git man knappen vmb ir knapeschaft·
ich meine der edeln knehte niht·
ich meine die man steln rǒben vnd brennen siht·
svlen die dar an erwinden· dc mv̊s geschehen von starker galgen kraft·
swelh herre sich betragen wil des rehten·
der mag sich leider kinne nv beknehten·
sin eigen kneht wirt im so swinde·
dc er ob im wil twahen hant·
vernt mener húre seriant·
sit willekomen dem stoke ze ingesinde·
Ein herre von gebúrte vri·
dc der ein dienest man ein ritter vnd ein kneht doch si·
darzv̊ ein eigen man wie dc geschehe des wunder man noch wib·
ein vri geburt niht geirren kan·
ein herre der ensi doch wol der eren dienestman·
ein ritter sinre rât der milte ein kneht der zv́hte ein eigen lip·
ein herre der sus vnder snitten were·
der dúhte mich ein hof scher wunderere·
hie vri da dienestman dort eigen·
vf dis ein ritter vf dc ein kneht·
were er zedisen fúnfen reht·
ein kúnigin solt im ir hǒbet neigen·
Ivch ist von meren worden kvnt·
wie alexander vůr durh wunder an des meres grunt·
vnd wie von abacug ein imbis wart zebabýlone braht·
wc herzoge ernest nôt erleit·
wc er vnd grave wetzel der gesnablen diet versneit·
wie si die grifen fůrten do ir zespise ir kinden wart gedaht·
vnd wie si durh den berg har wider kamen·
da si der krone weisen inne namen·
dis waren wunderlichú wunder·
doch dvnket es mich gar ein niht·
wider dem nv tegelich geschiht·
nv sprechent wie da merkent oben vnd vnder·
Anmerkungen (Wikisource)
- ↑ Vorlage: helbeginne.
- ↑ hic quaedam deperdita [Hier fehlen 1 oder mehrere Blätter] (Zusatz von Goldast).
- ↑ Vorlage: Jvdon.
- ↑ Vorlage: vb̾vulůt.
- ↑ Vorlage: criſtes.
- ↑ Vorlage: mv̊s mv̊s.
- ↑ Hier fehlt das Reimwort dazu.
- ↑ Vorlage: dē wart dem wart.
- ↑ Vorlage: woꝛte.
- ↑ Vorlage: er.
- ↑ Vorlage: ſpeht.
- ↑ Vorlage: peter peter.
- ↑ Vorlage: ſebē.
- ↑ Vorlage: nēmen.
- ↑ Vorlage: hoͤꝛen hoͤꝛen.
- ↑ Vorlage: niennīner.
- ↑ Vorlage: h̾zen.
- ↑ Vorlage: ein.
- ↑ Vorlage: ſprúcheiwar.
- ↑ Vorlage: mv̊s mv̊ſ.
- ↑ Vorlage: dt.
- ↑ Vorlage: dēr.
- ↑ Vorlage: kranchalſe.
- ↑ Vorlage: mer mer.