Gv̊t riter merke was ich sage
[47v]
Gv̊t riter merke was ich sage·
ich hoͤre die vogel singen·
von liebe scheide dich enzit·
ein wolken grawet gen dem tage·
ich sihe in schone vf dringen·
der melde has niht froͤide git·
nim vrlob tǒgen ze der minneklichen·
vnd scheident úch dc ist min rat·
der tag der wil gerichen·
mit liebe von ein ander sit dú naht ein ende hat·
Us suessen slafe ein selig wib· vragete do si erhorte·
den wahter singen von dem tage·
si sprach frúnt getruwer lib·
sage mir mit senftem worte·
hoͤrst dv dú voglin in dem hage·
dv́ hast min herze vs suͤssem slaffe erschreket·
er sprach lat úwer fragen sin·
den riter balde weket·
der morgen kumt dc sage ich vf die rehten truͤwe min·
Dú minnekliche wahte in do·
si sprach ach lieber herre·
der wahter kúndet vns den tag·
des bin ich armes wib vnvro·
ich wolte vnd wer er verre·
der vns zwei gescheiden mag·
der riter sprach din mv̊t sol vro beliben·
dv solt mich schiere in froͤiden sehen·
din herzeleit vertriben·
got gebe vns heil ich sihe den morgensternen schone vfbrehen·