Gv̊ten lúten wil ich kenden

Gv̊ten lúten wil ich kenden^{[WS 1]}·
was mir liebes ist geschehen·
die boͤsen mir das missewenden·
wold ich in der rede veriehen·
die wil ich vermiden ob ich kan·
mirst^{[WS 2]} getrǒmet ab der gv̊ten
nv scheide mirs ein selig man·

Sol ich ir den trǒm betúte^{[WS 3]}
wie dc er gefuͤget si·
dar zů bit ich gv̊te lúte·
ein valscher lib der ste hin bi^{[WS 4]}·
des nemt alle vil inneklichen war
sol mir lieb da von geschehen
dc ern^{[WS 5]} vns iht verkere gar·

Ein stimme hies mich vro belibe^{[WS 6]}·
vnd in hohem mv̊te leben·
si grůste mich von einem wibe·
...
wan si zetrost ist mir geborn·
vor al len frowen gimme ein svnne^{[WS 7]}
got hat niht stunden an dir verlorn·

La mich noch ein lútzel sprechen·
von der lieben frowen min·
mir en moͤhte nihter gebrechen^{[WS 8]}·
moͤht ich noch in trǒimen sin·
ofte bi ir so wolde ich rúwe lan·
vnd vil vnsenfte pine
die ich von der gv̊ten han·

Solde ich mich von schulden freun·
alse wunneklicher stvnt·
mir enkvnde niht gedrevn·
sit dc mir so svͤsser mvnt·
mit liebe hat gekv́ndet hohen mv̊t·
da ich slief in sender leide·
sprechet alle es si mir gv̊t·

Anmerkungen (Wikisource)

1. Vorlage: kv́ndē.
2. Vorlage: mirſ.
3. Vorlage: betúten.
4. Vorlage: hin.
5. Vorlage: er.
6. Vorlage: belibē.
7. Vorlage: ſvnn.
8. Vorlage: gebreſten.