Gvͤtlich sol ein iegslich wib

Gvͤtlich sol ein iegslich wib·
gerne tún dest war dc wibet wol·
div wol kleiden wil ir lip
dv́ sol tv̊n ir herze gvͤte vol·
Gvͤte ist ein dc beste wibes kleit·
dc an frowen lip ie wart geleit·

Swelh wip guͤtlich lachen kan·
schone mit zúhten hat dv́ roten mvnt·
dv́ mag einem werden man·
súften bringen vs des herzen grunt·
gůt geberde frowen schone stat·
wol ir dv́ bi gvͤte schoͤne hat·

Swa ein gv̊t wip minnen wil·
dv́ sol minnen dc ir rehte zeme·
valscher manne ist nv vil·
da von sol si denken wen si neme·
der ir eren hvͤte vnd stete si·
so dc er gegen ir si wankes vri·

Swelh man sich vor missetat·
hat behv̊t^{[WS 1]} vnd iemer hvͤten wil·
swa ein wip sich an den lat·
der lip darf borgen niemer vil·
erst vil eren fro dc weis ich wol·
bederbe man gv̊t wib bedenken sol·

Ein gv̊t wip dv́ solde die·
haben lieb die manlich sint gemv̊t·
swer nie gros vntat begie·
der ist werden wiben ze froͤiden gv̊t·
swelh man siner eren hvͤten kan·
an den sol ein wib ir ere lan·

Swes min frowe sich an mich lat·
des pflige ich ir so ich beste kan·
ich begie nie missetat·
gegen ir ich nie velschen mv̊t gewan·
si ist mir lieb danne min selbes lip·
dc ist min reht si ist ein wiplich wip·

Anmerkungen (Wikisource)

1. Vorlage: behvͤt.