Hý wie wunnenklich dú heide (Mit aufgelösten Abbreviaturen)
[34r]
Hý wie wunnenklich dú heide·
sich mit manigem spehen kleide·
gegen dem meigen hat bekleit·
lǒp gras blůmen vogellin beide·
die man sach in manigem leide·
gar verswunden ist ir leit·
also mehte ǒch mir verswinden·
sorge dú von froͤide ie swant·
wolde froͤide ê· sorge enbinden·
sit dc froͤide ie sorge embant·
so wurde ich sorgen fri·
Do min ǒge erkos die suͤssen·
do wart mir ein lieplich grvͤssen·
roͤselecht ein roter grůs·
do dahte ich dú ǒgen mvͤssen·
dir vil senden kvmber bvͤssen·
anders dir wirt niemer bv̊s·
sorgen es enwænde ir gvͤte·
dannoch wc ir gvͤte gůt·
sam die rosen in tǒwen bluͤte·
was ir mvnt rot als ein blv̊t·
owe dannoch was ich vro·
Wer kan froͤlich fro beliben·
wan bi reinen lieben wiben·
hi wie svͤsse name ein wib·
wip kan sendú leit vertriben·
wol ir reinen lieben liben·
ǒch si hant so lieben· lip·
dc mich nach in mv̊s blangen·
bi in ist dú wile vnlank·
swa liep lieb hat vmbevangen
dc ist ein suͤsser vmbevank·
lieplich nach der minne ger·
We der gar verlornen stvnde·
dc mir senden nien enkvnde·
lieplich kv́ssen werden kvnt·
von ir rosenvarwen mvnde·
owe minne dc din wnde·
mich so lange hant verwunt·
ich bin von dir vngeheilet·
ich gewan gegen dir nie heil·
minne das dv sist verteilt·
hab ǒch ir[WS 1] der minne ein teil·
dv verwundest mich niht me·
Was dǒg minnekliches singen·
swa sint wip die kvnnen twingen·
wa sint man die minne ie getwang·
wer kan stete frioͤde bringen·
wer kan sorge vs herzen dringen·
minne ie sorge vs herzen drang·
von der wibes ǒgen bliken·
da man sach ein svͤssen blig·
si went sich der minm[WS 2] entstriken·
man sint svnder minne strig·
welt da von trage ich dir has·