Hei ſchoner grůs hei loſer ǒgen blik
[282r]
Hei ſchoner grůs hei loſer ǒgen blik·
ǒwe vil minnekliches lachen·
wie hant ir mich ſo gar verlaſſen vn̄ verkoꝛn·
ich bin gevallen in der[WS 1] ſoꝛgen ſtrik·
vō dien vil ſchedelichen ſachen·
das ich úch ſvnder mine ſchulde han ver loꝛn·
vil ſelig wib gar vnuerſchulde lide ich dinen zoꝛn
ſol der an mir gewinnen wernden ſik·
das tůt min leben alſo ver ſwachen·
das ich vil lieber wolte ſin noch vngeboꝛn·
Gv̊t wib ſit ich din kúnde alreſt gevie·
ſit wer dv mir in minem můte·
das liebſte lieb zer welte alleine vn̄ keines me·
nach dir gewarb ich offenbares nie·
dv́ zucht was ie in miner hůte·
noch enbin ǒch nit der einer daſſin v́bel erge·
die ſich von wiben ruͤment anders danne in wol anſte·
durch dich ſpꝛach ich lob allē wiben ie·
dvr dich gedachte ich ir ze gůte·
durch dich tet mir ir ere wol ir laſter we·
Got weis wol in verdiente nie den has·
den dv ane alle mine ſchulde·
vil liebeſt alles liebes haſt an mich geleit·
[282v] dvr lúchtig miner ǒgen ſpiegel glas·
ſit ich den unuerſchulte dulde·
ſo tůs dur wibes guͤte[WS 2] vnd ſwende minú[WS 3] leit·
gib mir her wider des mich berǒbet hat din werdekeit·
des ie min ſendes herze gernde was·
ich mein din wunnebernden hulde·
die dv mir haſt můt willend âne recht verſeit·