Heide velt berg vn̄ tal

Heide velt berg vn̄ tal·
ſint gezieret vber al·
vō der bǒme^{[WS 1]} blvͤte·
ſtant ſi wol bekleit·
Hoͤꝛent wie dú nahtegal·
ſvͤſſe doͤnet ane zal·
wā des meiē guͤte·
machet ſi gemeit·
ſi kan ſingen lute als ê·
dc^{[WS 2]} dú heide erkrachet·
manic blv̊me dvr dē kle·
wol betǒwet ane we·
gegē der ſvnne lachet·
gar an vnderſcheit·
Meien blv̊t· mānes lip·
froͤlich tv̊t· liebes wib·
troͤſtet^{[WS 3]} ſinē mv̊t·

Meie wūnekliche zit·
vf dem liehtē velde wit·
mit den blv̊mē teilē·
ab̾ ſchone wil·
ſw̾ nv liebe nahe lit·
heý wie der an allen ſtrit·
kan mit froͤiden heilen·
ſender wūden vil·
lieb vō leide manigvalt·
ſich bi liebe loͤſet·
ſo gelǒbet ſtet der walt·
vn̄ dú heide wol geſtalt·
ſchone lit geroͤſet·
in ir wūne ſpil·
Meien blv̊t· mānes lip·
froͤlich tv̊t· liebes wib·
troͤſtet ſinē mv̊t·^{[WS 4]}

Wib ſint gv̊t ſvͤs vn̄ wiſ·
wib hant reiner tvgende ṕs·
nach ir mīne tǒgen·
mannes h̾ze qvilt·
wib ſint heiles wunſchelris·
aller froͤidē paradiſ·
vs ir liehten ǒgen
blvͤiet vn̄ ſpilt·
ſwē ir b̾ndes mīnezwi·
niht ergeilē kunne·
der ge ſterbē vn̄ ſi·
lebend̾ froͤide vf erde fri·
wib hant alle wūne
mit troſte vber zilt·
Meiē blůt· mānes lip·
froͤlich tv̊t· liebes wib·
troͤſtet ſinē mv̊t·^{[WS 5]}

Anmerkungen (Wikisource)

1. Vorlage: bǒmē.
2. Vorlage: dc dc.
3. Vorlage: troͤſtēt.
4. Vorlage: Meien blv̊t· ⁊c̾·
5. Vorlage: Meiē blůt·