Heide vnd anger in froͤiden stat
[279r]
Heide vnd anger in froͤiden stat·
die habent sich bereitet mit der schoͤnsten wat·
die in der meie hat gesant·
wir svln allen·
vaste schallen·
der svmer ist komen in dv́ lant·
Wol vs der stuben ir stolzen kint·
lat úch vf der strasse sehen· hin ist der scherfe wint·
ob ich wil der warheit iehen·
vnd ǒch der vil kalte sne·
hebt úch balde·
zv̊ dem walde·
voglin singent den was we·
[279v] Die sint ergetzet leides gar·
ir sult mir es gelǒben vnd nemt sin selber war·
was der sumer· erzeiget hat·
er wil richen·
sicherlichen·
manigen bǒm mit lǒbes wat·
Die nv niht ganzer hůte pflegen·
die svln balde ir bestes virtag gewant an legen·
vnd lassen sich dar inne sehen·
wir svln schowen·
vor den ǒwen·
maniger hande blv̊men brehen·
Swie rúwental min eigen si·
ich bin disen svmer aller sorgen fri·
sit der winter ist da hin·
ich wil leren·
die ivngen eren·
nach froͤiden stůnt ie min sin·