Heide walt vnd anger wol bekleit

Heide walt vnd anger wol bekleit·
die hant sich enbloͤsset dest min klage·
kleiner vogelin truren ist mir leit·
die der winter twinget alle tage·
noch trage ich in minem herzen grosser swere· svnder strit·
dc mich leit in sorgen dú vil seldenbere· lange zit·
wol im der zeliebe hat den trost·
dc er sender leide wirt erlost·

We mir we der svͤstebernden not·
dc ich trost von liebe niht enhan·
sit dú minne dienen mir gebot·
der ich bin mit trúwen vndertan·
ich lan mich an ir genade sicherlichen· si ist so gůt·
wer mag nv an hohen froͤiden bc gerichen· mir den můt·
Wol im der zeliebe hat den trost·
dc er sender leide wirt erlost·^{[WS 1]}

Reine kv́sche tvgetriche sitte·
si hat in ir herzen^{[WS 2]} rehte scham^{[WS 3]}·
selde vnd ere wont der lieben mitte·
noch in rehter wibes guͤte alsam·
mir kam in das herze ir minneclich gebaren do ich si sach·
des lide ich vil sender nv bi manigen iaren vngemach·
Wol im der zeliebe hat den trost·
dc er sender leide wirt erlost·^{[WS 4]}

Nieman mag der minne han gewalt·
si tůt dike we vnd ofte wol·
er mag wol ze selden sin gezalt·
den si tv̊t mit willen froͤiden vol·
ich sol leider noch bevinden ob dú minne· froͤide gebe·
si tv̊t ungenade mir in minen sinnen swie ich lebe·
Wol im der zeliebe hat den trost·
dc er sender leide wirt erlost·^{[WS 5]}

Anmerkungen (Wikisource)

1. Vorlage: Wol im der ⁊c̾·
2. Vorlage: h̾ze.
3. Vorlage: ſchame.
4. Vorlage: Wol im der ⁊c̾·
5. Vorlage: Wol im der zeliebe· ⁊c̾·