Herzeliebe frowe mir (Mit aufgelösten Abbreviaturen)

Herzeliebe frowe mir·
got gebe dir húte vnd iemer gůt·
kvnde ich wol gesprechen dir·
des hete ich willeklichen mv̊t·
wc sol ich dir sagen me·
wan dc dir nieman holder ist danne ich da von ist mir we·

Si verkerent mir dc ich·
so nidere wende minen sanc·
dc si niht versinnent sich·
was minne si des haben vndanc·
die getraf dú liebe nie·
die da nach dem gůte vnd nach der schoͤne minnent we wie minnent die·

Ich vertrage als ich vertrůc·
vnd iemer mere wil vertragen·
dv bist schoͤne vnd hast genv̊c·
wc mvgen si mir da von gesagen·
swas si redent ich bin dir holt·
vnd neme din glesin vingerlin fúr einer kúniginne golt·

Bi der schoͤne ist dike has·
ze der schoͤne nieman si zegach·
liebe tůt dem herzen bas·
dú schoͤne gat der liebe nach·
liebe machet schoͤne wib·
des enmac dú schoͤne niht getůn si machet niemer lieben lib·

Hast dv trúwe vnd stetekeit·
so bin ich des an angest gar·
dc mir iemer herze leit·
von dinen schulden wider var·
hast aber dv der zweier niht·
sone mvͤssest dv mir niemer werden owe danne ob dc geschiht·