Hie voꝛ do was min wúnſchen alles ſo

Hie voꝛ do was min wúnſchen alles ſo·
das ich die lieben ſolte ſehen·
do was ſi gůt vnd ich ir guͤte vro·
ſit her iſt mir von ir beſchehē·
das ich nu ein anders lǒbende bin·
das heiſſet ǒwe das ichs ie geſach·
wer mochte haben ſo ſenften ſin·
das in nit můte ſolich vngemach
als mir in weis dvrch was von ir beſchicht·
nu wie dv́ ſwere ſi getan·
des kan ich tumber mich enthaben nicht·
dv́ welt dv́ mvͤſe es kúnde han·

IR reinen wip ir wol gemůten man·
vernemet von ir min ſênde klage·
ich habe ir als ich beſte mich verſan·
gedienet alle mine tage·
vnd han ſwie es ze leſte doch gevar·
die zit vnd ǒch des libes arebeit·
ane allen valſch mit trúwen gar·
vnd ǒch mit rechter ſtete an ſi geleit·
ǒwe nu tůtz alreſt dem gelich
ſam ſi nit wiſſe wer ich ſi·
iſt dan^{[WS 1]} min ſang dur not nit klagerich·
ſit ich gegen ir bin ſchulden fri·

Noch klag ich eines das mir naher gat·
das mir vil ſcham vnd ſmerzen birt·
der grůs den al dv́ welt von ir enpfat·
des nieman gůter ane wirt·
ſecht der ſelbe iſt mir von ir verſeit·
des ſunder baren ich geſwigen wil·
der mich doch wilent nit vermeit·
des ich von ir genaden hette vil·
nun kan ich leider anders noch en mag
wan alder welte ſis geklagt^{[WS 2]}·
das trúwe ſtete vnd alſe manig tag·
ſo krankes lonen hant beiagt·

Anmerkungen (Wikisource)

1. Vorlage: danne.
2. Vorlage: geklaget.