Hoh alſam dú ſvnne ſtet dc herze min

Hoh alſam dú ſvnne ſtet dc herze min·
dc kvmt vō einer frowē dú kan ſtete ſin·
ir genade ſwa ſi ſi·
ſi machet mich voꝛ allem leide fri·

Ich han ir niht ze gebenne wā min ſelbes lib·
derſt ir eigen dike mir dú ſchone git·
froͤide vn̄ eine hohē mv̊t·
ſwāne ich daran gedenke wie ſi mir tůt·

Wol mich deſ daſ ich ſi ie ſo ſtete vant·
zwa ſi wonet dú eine liebet mir dc lant·
fuͤr ſi vber den wildē ſe·
dar fuͤr ich hin mir iſt nach ir ſo we·

Het ich tuſent māne ſin dc were wol·
dc ich ſi behielte der ich dienen ſol·
ſchone vn̄ wol ſi dc bewar·
dc mir vō ir niht leides wider var·

Ich enwart nie rehte ſelig wan vō ir·
ſweſ ich ir gewúnſchen kan des gan ſi mir·
ſeleklich es mir ergie·
do dú ſchone mich in ir genade vie·