Ich ſpꝛiche iemer ſwēne ich mac vn̄ ǒch getar
[102r]
Ich ſpꝛiche iemer ſwēne ich mac vn̄ ǒch getar·
frowe wiſ genedig mir·
ſi nimt miner ſwacher bet vil kleine war·
doch ſo wil ich dienē ir·
mit den trúwē vn̄ ich meine dc
vn̄ als ich ir nie v̾gas·
ſo geſtan dú ǒgen min vn̄ niem̾ bas·
Swēne ich ſi mit miner valſchen rede betruge·
ſo het ich ſi vnreht erkant·
vn̄ gevahe ſi mich iemer an deheiner lvge·
ſa ſo ſchupfe mich ze hant·
vn̄ gelǒbe niemer miner klage·
dar zv̊ niht deſ ich ſage·
da voꝛ mvͤſſe mich got behv̊ten alle tage·
Wart ie gůtes vn̄ getrúwes māneſ rat·
ſo kvm ich mit froͤidē hin·
ſi weiſ wol ſwie lange ſi mich bittē lat·
dc ichs doch d̾ bittende bin·
ich han ir gelobt ze dienen vil·
dar zv̊ dc ichs g̾ne hil·
vn̄ ir niem̾ vmb ein woꝛt geliegen wil·
Wart ie māne ein̾ wib ſo lieb als ſi mir iſt·
ſo mvͤſſe ich v̾teilet ſin·
meniger ſpꝛichet ſi iſt mir lieber das iſt ein liſt·
got weis den willen min·
wie hohe es [102v] mir vmb ir hulde ſtat·
vn̄ wie nahe eſ mir gat·
ir lob das ſi vmb al die w̾lt v̾dienet hat·
Swie min lon vn̄ ǒch min ende an ir geſtê·
dc iſt min al meiſtú nôt·
zallen ziten fúrhte ich das ſi mich v̾ge·
ſo wêr ich an froͤiden tot·
dc ſol ſi bedenkē alles ê·
tůt ſi mir ze lange we·
ſo gediene ich vf die ſele niemer me·