Ich spriche iemer swenne ich mac vnd ǒch getar

Ich spriche iemer swenne ich mac vnd ǒch getar·
frowe wis genedig mir·
si nimt miner swacher bet vil kleine war·
doch so wil ich dienen ir·
mit den trúwen vnd ich meine dc
vnd als ich ir nie vergas·
so gestan dú ǒgen min vnd niemer bas·

Swenne ich si mit miner valschen rede betruge·
so het ich si vnreht erkant·
vnd gevahe si mich iemer an deheiner lvge·
sa so schupfe mich ze hant·
vnd gelǒbe niemer miner klage·
dar zv̊ niht des ich sage·
da vor mvͤsse mich got behv̊ten alle tage·

Wart ie gůtes vnd getrúwes mannes rat·
so kvm ich mit froͤiden hin·
si weis wol swie lange si mich bitten lat·
dc ichs doch der bittende bin·
ich han ir gelobt ze dienen vil·
dar zv̊ dc ichs gerne hil·
vnd ir niemer vmb ein wort geliegen wil·

Wart ie manne einer wib so lieb als si mir ist·
so mvͤsse ich verteilet sin·
meniger sprichet si ist mir lieber das ist ein list·
got weis den willen min·
wie hohe es mir vmb ir hulde stat·
vnd wie nahe es mir gat·
ir lob das si vmb al die werlt verdienet hat·

Swie min lon vnd ǒch min ende an ir gestê·
dc ist min al meistú nôt·
zallen ziten fúrhte ich das si mich verge·
so wêr ich an froͤiden tot·
dc sol si bedenken alles ê·
tůt si mir ze lange we·
so gediene ich vf die sele niemer me·