Ich bin iemer derander niht dereine

Ich bin iemer derander niht dereine·
der grossen liebe der ich nie wart vri·
owe weren die hv̊ter al gemeine·
toub vnd blint swenne ich ir were bi·
so moͤhte si min leit
eteswenne mit gelâsse ir kúnden·
vnd mich mit rede zv̊ ir gefrúnden·
so wurde ir wunder vil von mir gesaget·

Miner ougen tǒgenliches sehen·
dc ich ze botten an si senden mv̊s·
dc neme dur got von mir fúr ein flehen·
vnd ob si lache dc si min grůs·
ich enweis wer da sanc
ein sitich vnd ein star ane sinne·
wol gelernten dc si sprachen minne·
wol sprich dc vnd habe des iemer danc·

Wolte si min denken fúr dc sprechen·
vnd min truren fúr die klage verstan·
so mvͤse in der nuwen rede gebrechen·
owe dc ieman sol fúr fúge han·
dc er sere klagen
dc er doch von herzen niht meinet·
als einer truret vnd weinet·
vnd er sin nieman kan gesagen·

Sit dv́ herzeliebe heisset minne
sone weis ich niht wie dú leide heissen sol·
herzeliebe wont mir in dem sinne·
lieb het ich gerne leides enber ich wol·
div gůte dú mir git
hohen mv̊t· dar zv̊ froide vnd wunne·
sone weis ich wc dú liebe kvnne·
wan dc ich iemer truren mv̊s nah ir·

Sine sol niht allen lúten lachen·
alse von herzen sam si lachet mir·
vnd ir ansehen so minnekliche machen·
was hat aber ieman da ze schǒwen an ir·
der ich leben sol
vnd an der ist al min wunne behalten·
ione wil ich niemer des er alten·
swenne ich si sihe mir ensi von herzen wol·