Ich han ver triben (Mit aufgelösten Abbreviaturen)

Ich han ver triben
die minen besten zit da her von einem^{[WS 1]} kinde·
got weis wol nit wan in der lieben dienste gar·
vnd bin ir doch vnwerder nv danne doch ichs erst began·
ich bin beliben·
also da her das ich von ir nit dankes vinde·
si stet gegen mir vil leider aller gvͤte bar·
das hat geswachet sere mich vil helfelosen man·
ǒwe ia dachte ich do ich si des ersten mir erkos·
si hette wunder gvͤte vnd were milter sinne·
wie es dar vmbe si des bin ich sit wol worden inne·
ir vngenade ist sunder schulde gegen mir alze gros

Ach herter mv̊t·
was hat din dv́ gvͤtlich gestalte zúchte riche·
nieman enwîse mir ob mich des wunder neme·
ich han so lange her gedienet ir edlen werdenkeit·
des war si tůt
an ir getrúwem stetem frúnde vn minnekliche·
vnd ander danne gv̊tes wibes gvͤte zeme·
das si nicht achtet miner langewernden arebeit·
ob ichs mit hulden sprechen tar· si hat gesv́ndet sich·
vnd hat vil grosse herte an mir da her begangen·
das ich ie was dvr si mit sender not so gar bevangen·
vnd si dar vnder ein vil lútzel nie getroste mich

Bin ich unfro
sich welt dv́ schulde ist der vil minneklichen svͤssen·
hette ich gegen der ie misse varn bi minen tagen·
so hette ich noͤte zit gedinge vnd arebeit verlorn·
were es also·
son solte si mir niemer sende swere buͤssen·
wan das ich iemer wernde rúwe solte tragen·
sit aber ich ie gegen ir noch alle vnfůge habe verlorn·
vnd ie das beste habe getan sol mich das nit gevromen·
so lat úch wol gemůten lúte das erbarmen·
des ich von rechte richen solte das ich des můs armen·
vnd das mir truren kvmet da von mir froͤide solten komen·

Anmerkungen (Wikisource)

1. Vorlage: einen.