Ich klage mich vil leide

ICh klage mich vil leide·
die ich sender dol·
si gelichent mich der heide·
dú ê stv̊nt blv̊men vol·
vnd nv der ane lit·
dú kalte winter zit·

alse mide ich froͤide·
der ich schone pflag·
min herze stet mir oͤde·
das e· gefúllet lag·
vil maniger frîer wal
nv stet es wal chal·

dú leit klage ich vnd eine schulde·
die ich doch vngerne dvlde·
ich habe seht der minne hvlde·
verlorn dast ein not·
dú mich vil rot·

vnd missevar vil ofte machet·
des min weinender schade wachet·
so iener slafet oder lachet·
der nie gewan sende sere·
noch klage ich mere·

Mir hat ein wib·
den tvmben lib·
aller froͤide in ahte braht·
Dc ist ein not·
dc ich den tot·
habe mir darvmbe erdaht·
Als ich das klage·
vnd irs sage·
so ist es ir gar versmaht·
hie bedorft ich helfeklich gůtes rates zv̊·
wie ich getů

das ich den mv̊t·
lib vnd gůt·
mvge erbrechen gar von ir·
alde aber bas·
ane allen has·
mvge bringen wol hin zir·
wil sich dc wenden·
vnd niht enden·
seht dc mvͤssen klagen wir·
ich vnd ein iegeslich siech sender man·
der mirs verban·

Doch ist ir leider kleine·
die mir geraten kvnden·
wan si alterseine·
dú mich da hat gebvnden·
ir lib ist alse reine·
si sol mich vnderstvnden·
minnen die ich da meine·
die mir des verbunden·

die mvͤsse has·
ane alles was·
sich fúgen bas·
seht vmbe das·
si kvnnen niht wan niden·
ich bin in gram·
si mir alsam·
an eren lam·
ist gar ir nam·
ich sol si gerne miden·

Mir tv̊t vil we·
dc ich mich me·
von in klagen mv̊s·
danne es mir solde sin·
dem tiefen se·
bevel ich e·
min hǒbet vnd minen fůs·
E· ich der frowen min·

iemer gv̊ten hvlden enbere·
mir were·
gar der lip vnmere·
gv̊t vnd alles dc ich han·
wa wart ie man·
von manigen dingen so betwungen·
het ich tusent gv̊ter zvngen·
ich kvnde volleklagen niet·
wie mir geschiet·
von senelichen sorge·
abent sehent vnd morgen·
hie bi wissent dvr das iar·
dis ist vil war·

Mir git dú here·
sorgen mere·
danne ich liebes ie gewan·
es ist ir ere·
dc si kere·
kvmber den ich von ir han·

minem mv̊te·
mag dv́ gůte·
tv̊n mit lihten dingen wol·
mich hat ir růte·
in solher hv̊te·
dc ichs iemer minnen sol·

were ich der sinne· dc ich mich
emstvͤnde gv̊tes iht·
so hete si liebe mir getan·
swer mich des fraget dem sage ich·
ein wort vnd anders niht·
ich han dvr si vntat gelan·

des mv̊s ich singen·
vnd ringen·
wan ich si iemer minnen wil·
ich mv̊s dingen
vf gedingen·
wan si ist der froͤiden zil·

der ich beginne·
vnz ich inne·
wirde froͤide die hat si·
mich tv̊t ir minne·
valscher sinne·
wendig vnd wandels vri·

ich mv̊s dvr si vnstete lan·
ich getar von ir gewenken niht·
swie si mir tv̊t
ich heisse es wol getan·
des sols ir guͤte an mir began·
swie mir wol oder we geschiht·
ich heis es gv̊t·
ich mv̊s in ir gebotte stan·

ob si mich twinget so·
dc ich von herzen vro·
werden niemer mag·
so klage ich manigen tag·
den ich in wanc·
froͤiden ane·
han gesvngen·
vnd mich ivngen·
tv̊ gar alden·
dú min walden·
wil vnwert·
dc ist ein vngenedig leit·
het si min doch dekeinen gert·
min klage were niht so breit·
Swer minen dienst wil ane dank·
der mv̊s min gar geweldig sin·
ich tv̊n im doch mit willen kranc·
dc wirt wol an dem erde schin·
an eineg si die herzeliebe frowen min·

alsvs klage ich min not·
mit sange vntz an den tot·
alsam der elbes tv̊t·
der keret sinen mv̊t·
ze svͤssem sange·
e dest lange·
e er erwende·
solker mende·
mv̊s ich dingen·
svͤsse singen·
vnd ringen·
als ein lib·
der sich des todes wol versiht·
si selig wib·
warvmbe lihtert si mirs niht·
swenne ich erstirbe so hat si
verlorn ein dienstman·
der ir mit dienste ie wc bi·
dc wolde si nie vergv̊t enpfan·
ich liesse es sin wolde sis noch vúr liebe han·

Moͤht ich die welt betwingen gar·
alse rôme ivlius betwank·
ich were doch iemer froͤdie bar·
si eine spreche habe danc·
ich wolde niht ein keiser sin·
dc ich die lieben frowen min·
gesêhe niemer zallen tagen·
sone wolde ich niht der krone tragen·
es ist niht kleine·
dc ich si meine
si ist alles das ich bin·
lib vnd sin·

Ich wolde ins riches ahte sin·
vnd vallen in des babsdes ban·
dc ich der lieben frǒwen min·
solde heissen werder man·
wurde dc ein wares wort·
so were mir truren vnbekort·
sone wolde ich niht min sůsses leben
vmbe al der welte wúnschen geben·
In selken sachen·
mv̊ste ich lachen·
ellú minen lieben iar·
vnd wurde es war·

Doch bin ich vf gedinge fro·
vnz ich gedinge so lebe ich ho·
vnd wil mich niemer des verkunnen·
sine svl mir ir minne gvnnen·
ia enbin ich ein heiden·
so bescheiden·
ist ir minneklicher lib·
nv troͤste mich das beste wib·
mit dinen liehten ǒgen·
dc ich erkenne tǒgen·
ob mich din sendebernder suͤsser mv̄t·
mit gruͤsse welle tv̊n gesvnt·