Ich seite iv gerne ich weis wol was
[330r]
Ich seite iv gerne ich weis wol was·
dú ware minne got betwungen hat nv merket dc·
er bat [330v] mich vnd gote klagen wan got wir weren gar verlorn·
dú warú minne got enbot·
dc er vns sante sinen svn her nider in den tot·
vnd vns von helle erloste dar zv̊ hat in dú warú minne erkorn·
nv seht also gewaltig ist div minne·
verswige ich das war tete ich mine sinne·
in twang sin gotteliche wirde·
dc er vns menschen wart genôs·
der kv́nig ob allen kv́nigen grôs·
er fulte gar der waren minne ir girde·
Do got hat zerde wolte komen·
vnd in gebar ein reinú magt dien er im ze mv̊ter hat genomen·
do hv̊b sich vnser selde an sinem libe do hv̊b sich vngemah·
an dem frone krúze leit er den tot·
da mit er vns erloste vs grosser angest vs grosser not·
er gewan vns selekliche mit allem reht er do die helle brach·
do er schein ein lieht dc sant er vns zetrôste·
da mit er vil manig sele erloste·
sin gvͤte werde vns noch zeteile·
vnd sin blv̊t ê wir vervarn·
dc vns die sele sol bewarn·
mit froͤden dort in eweklichem heile·
Got vater svn heiliger geist·
dv aller gv̊ter dinge anegenge vnd ende weist·
da gebar von einem worte[WS 1] ein maget ân sv́nde nach mv̊tlicher traht·
dú geburt dir einem wol gezan·
dú menscheit an dem crúze den tot dvrh vns an sich genā·
do erstůnt an dem dritten tage dirre tot vns vnsern tot vbervaht·
der dar an zwifel der denke an dinú wunder·
dú dv tete vor den ivden besvnder·
vnd gelǒbe din drie namen dich alleine·
dc din gewalt ist ane zil·
hilf mir des ich dich bitten wil·
dc růch vnd tů vns von den sv́nden reine·
Got vater diner manigen tvgent·
vnd[WS 2] dines svns die der begangen hat in siner ivgent·
der ist dekein so kleine si si dannoch menschen lobe ze gros·
der han ich eine erwellet mir·
getorste ichs herre die wolde ich nv gerne lǒben an dir·
dú selbe tvgent ist also gros dc si dir selbem[WS 3] ist genos·
si was ie vnd ist noch din ratge binne·
vnd ob allen tvgenden kúniginne·
mit hvlden mv̊s ich dir si nennen·
es ist din reinú barmekeit·
dú vnser tegeliches leit·
dich herre tůt genedeklich erkennen·
Iesus dv gotes wunder bot·
iesvs dv menschen kint vnd got vnd ebenmehtig got·
dv́ himel sippe vaterhalp dú erden sippe mv̊ter halp·
dv vaterhalp iohannes ar·
dv leo marcus dv mv̊terhalb matheus mensche gar·
hie mit bezeichenvnge an lucas stat geformet[WS 4] als ein kalp·
die vier ewangelisten vnd ir bilde·
sint vngelerten lúten gar zewilde·
wc ar was leo was meine·
wc kalp betúte an lucas stat·
der ane sv́nde ie missetrat·
wer im das kvnt der wurde gar zwiuels eine·
Got herre swes dv an vns gerst·
des mvgen wir dich niht wol gewern e das dv vns gewerst·
wilt dv von vns reine gedanke reinen mv̊t vnd reines leben·
wa svln wir herre got dc nemen·
din reinekeit dv́ welle vns reinen so das wir dir zemen·
wilt dv dc wir nach dinem willen leben de wille mv̊stv vns geben·
wer kan iht gv̊tes an dich beginnen·
wes herze kan dich svnder dich geminnen·
wie kvnnen wir herre dir geleisten·
iht gv̊tes ane din volleist·
den vns gegeben hat din geist·
den selben geist la herre got vns geisten·
Got herre gib vns húte heil·
so das vns mvͤsse werden alles des gebetes ein teil·
so húte wirt gesprochen so wit dú cristenheit begrifen hat·
vater vnd mv̊ter min·
brv̊der vn swester svln ǒch dar inne sin·
dar zv̊ mine mage vber alle die min gebet zerehte stât·
dar zv̊ so wúnsche ich des den cristen allen·
dc si in hǒbet sv́nden iht veruallen·
vnd dc wir werden also fvnden·
so got an dem gerihte ste·
dc wir vor ime wernder we
von siner kraft des tages da werden enbvnden·
ICh wil iv singen merkent das·
von vnserre vrowen lob dc wir si eren deste bas·
von kv́niges kúnne ist si geborn des mvͤssen mir die wisen iehen·
got der geschv̊f nie niht so clar·
sin[WS 5] vberlúhte es alles dc ist endeliche war·
so kv́sche vnd ǒch so reine wart nie kv́niginne me gesehen·
si kan niht zúrnen vnd kan wol versvͤnen·
si machet manigen dv́rren mv̊t vil gruͤnen·
ir svͤsse senftet alle sůre·
der himel vnd erde wc zegros·
den [331r] enpfieng dú maget in ir schos·
nv sprechent an wa wart ie maget so túre·
O wol dir gabrieles mvnt·
dv tete ein kint der vil minnekliche megde kvnt·
dv́ ist reiner herzen wunne· vnd cristenr sele ein iemer wernder hort·
es wc der svͤsse emanuel·
den dv marien kvndest vil werder engel gabriel·
got mit vns des gvͤte wart nie vol lobt von menschen zvngen wort·
wol vns der grosen eren dc der reine·
got wart menschen kint vns gemeine·
im wart vil maniger hande swere·
an sv́nden broͤdekeit bekant·
iesus cristus ist er genant·
marien kint svͤsse vnd froͤidebere·
Nv si von even biz verkleit[WS 6]·
sit dc mensche ist worden got von einer meit
dú maget ist mv̊ter worden so dc ir magetlich ere ist ganz beliben·
ir kúsche witze lilien glanz·
ist vnverwest vnd ǒch sin gotliche flamme ganz·
so minneklicher orden· wart nie von mv̊ter libe mer geschriben·
si hat den starken got vns vberwunden·
dc sin gewalt ist so von ir gebunden·
dc er niht wan genade bútet·
fride vnd stete sv̊ne er git·
was eren an ir kúsche lit·
nv wol in wart der si von herzen trútet·
Gros wunder dc vns ist geschehen·
von einer megde des mir alle cristen mv̊ssen iehen·
des himels wite in vmbe vie die ende nie gewan·
noch mit der hoͤhe in vmbe vie·
noch mit der witen tiesen grundelosen helle nie·
den vmbe vie ir kleiner lip da merket alle ein wunder an·
si leit in minneklicher zv̊ ir schôssen·
was wunders mak dem wunder sich genôssen·
kintlichen leit er sich zv̊ ir brvsten·
mv̊terliche sǒgte si in·
si wante ir ǒgen dike an in·
wir habens da fúr si hielse in vnd kvsten·
Maria kv́niginne her·
dv las vns geniesen dc dv́ werlt in rehter ger·
gert frowe diner helfe· nv hilf vns ǒch dur alle die froͤide din·
der ich dir fúnfe nenne hie·
dú erste dc din heilig lib den hohen grv̊s enpfie·
den dir der engel brahte dc dv gotes mv̊ter soltest sin·
dv́ ander dc dv iesum crist gebere·
dv́ dritte dast in grossen froͤiden were·
do man dir seite sin vrstende·
dú vierde wc sin himelvart·
dú fúnfte an dir erfúllet wart·
do er dich hein fůrte ane missewende·
Gegruͤsset sist dv kúnigin·
maria ganzer tvgende ein dvrlv́htiger svnnen schin·
dv bist ǒch vollekliche aller genaden ein iemer werender hort·
vnser herre si mit dir·
so dc ir mit ein ander beidú sit genedig mir·
vnd von mir armen sv́nder gerv̊cht zevernemenne mine klagenden wort·
din hoh genade vrowe an mir erzeige·
e mich dú wilde todes angest neige·
gebendicht vor allen wiben·
si ǒch din vil reiner lib·
dv mv̊ter maget vnd niht ein wib·
gesegent si din fruht vor allen liben·
Vnde solde ich malen einen man·
deswar den wolt ich machen wunderlich getan·
dc er doch hiesse ein man vnd wolte in malen niht als man manigen siht·
er mvͤste strusses ǒgen han·
vnd einen krankes hals dar inne ein zvnge wol geschaben·
vnd zwei swines oren lǒwen herze des vergesse ich niht·
ein hant wolde ich im nach dem aren malen·
an der andern wolte ich niht entwalen·
ich wolde si bilden nach dem grifen·
dar zv̊ die fuͤsse als einem bern·
svs wolde ich ganzes mannes wern·
swer des niht hat von dem mag manheit slifen·
Struses ǒge sol ein man·
dur lieblich angesihte gegen den sinen gerne han·
einen krankes hals durh fúrgedenken wc er sprechen mvge·
sin zvnge sol ǒch sin geschaben·
dur wort gar ane flehen· der sol er gern vnd sol ǒch haben·
dur hoͤren swines oren war ime zestane vnd ǒch zefliehenne túge·
lewen herze dvrh were ein hant nach dem aren·
dien sol er vor der milte niht ensparn·
die nach dem grifen dur behalten·
bern fuͤsse dvrh den zorn·
also han ich den man erkorn·
swel man dc hat der mag wol manheit walden·
Gerne gewern vngerne bitten·
swer disú an im vinden lât dc kvmt von edelen sitten·
nider geheissen hohe leisten dú zwei dú sint lobelich·
ein mvnt von richen worten vol·
da bi ein ital herze die cleident niht zesamne wol·
da sint die [331v] henden mvͤssig bi des libes schamte ich sere mich·
der also gehendet geherzet were·
gêt vs her lib ir sit niht minnebere
si vngenême wolken gvsse·
es si ein ivncfrowe oder ein wib·
dú also missewenden lib
an sinen mvnt iemer slafende kússe·
Mich wundert vnd ist iemerlich·
dc ein man den got gemachet hat so witzerich·
im alse schedelichen manige smêhe gelúste lat an gesigen·
vnd sich vor gottes ǒgen niht·
der dinge schamt der doch in aller menschen herze siht·
der er sich wolte schamen vor eime der zv̊ kúchen were gedigen·
nv gib vns schame aller boͤser dingen·
reine schame valschen mv̊t kan twingen·
von misseteten zů der gůte·
die got zefrúnde erwerben kan·
si selig wib er selig man·
swa er nv si der reine schame bruͤte·
Gelúkes rat ist sinewel·
im lǒfet maniger nach doch ist es vor in al zesnel·
doch lat es sich erlǒfen· vil manigen den es da beswichen wil·
swer stiget vf gelúkes rat·
der bedarf wol gv̊ter sinne wie er besitze gelúkes stat·
dc er vnder im iht wenke wan er dc rat hin ab im zúhet vil·
die mv̊ssen danne sigen mit vnwerde·
wan si mit schanden ligen vf der erde·
gelúke wenket vnd besorget·
es git vil manigem ê der zit·
vnd nimt hin wider swc es git·
es toͤret den swem es ze vil geborget·
Es volget ein gemeiner sitte·
vil nach der meisten mengi leider in der werlte mitte·
ein ieglich man der wil dc man im bas tů danne er wider tů·
swa tusent merkent einen man·
sin leben vnd al sin tv̊n son mag der eine noh en kan·
niht nach ir aller willen so wol getůn sin legen doch valsch dar zv̊·
ich enweis so gv̊ten herren noch so wisen·
das alle sine lúte gemeine in prisen·
dise iehent im gůtes dise vngv̊tes·
swer aber dem herren rehte tů·
da hoͤret ein wage zů·
dú gliche si vnd vnveiles mv̊tes·
Swas einem rehten herren zimt·
zetůn vnd ǒch zelâsenne swer dc gerne vnd wol vernimt·
den nenme trúwe vor vnd dar nach zuht mit eigenlicher schame·
tv̊t er ein teil im selben we·
an libe an gůte dvrh ere als die besten taten e·
so mag er wol genesen an libe an gv̊te vnd gůte vnd an den eren same·
er sol sich vssen svͤssen mit dem mvnde·
vnd dc dv svͤsse ge von herzen grunde·
so ist der mvnt des herzen brůder·
er sol ǒch ritters namen so tragen·
dc im der lib iht mvge veriagen·
vs gerten sitten· in lekerliches lůder·
Das gv̊t ist einem hohen man·
niht volleklich ein lob als ichs zerehte erkennen kan·
erst gůt dc ist gůt· er was gůt dc ist mere danne halp verlorn·
swer gut si der belibe ǒch gv̊t·
die wile er mvge vnd tvge so habe eregernden mv̊t·
wol an gehaben vnd wider keren dc wer alse gv̊t verborn·
swen lib noh gv̊t en irret dc der lǒset·
vnd also gar vergebne mv̊tes koͤset·
den wil sin leben sin lob verswachen·
an eren zv̊ grif der ist gv̊t·
an eren ab nemer der tǒt·
vil mange zit des ere niht mag lachen·
Wol dir richeit wol dir gewalt·
wol iv vnd ǒch dien den ir an tvgenden machet balt·
so we úch vnd ǒch dem den ir von sinen sinnen nemt·
dc er so lezzet sich
vf úwern trost da von er wirt so gar vnerkennelich·
gote vnd ǒch im selben wie v́bel ir dem an sinen eren zemt·
richeit gewalt swer sines mv̊tes were·
sterker danne ir dem wert ir niht swere·
swenne aber ir den man also geneiget·
dc ir komt oben vber in·
vnd er des mv̊tes vnden hin·
vil nider gat des lob ir sere veiget·
Es sint noch herren eteswa·
gesessen in den landen mangen enden hie vnd da·
die eregerne enthielten wan dc dú ere hat so vil gespiln·
trúwe vnd stete reine sitte·
sorge vnd schame kv́sche milte vnd manheit· vert ir mit·
demv̊t warheit gehorsam des hofgesindes mv̊s dvr not beviln·
den richen an gv̊te den armen an gemvͤte·
des vert dú hohgelopte svͤsse gvͤte·
vil gar wisenlos mit ir gesinde·
da si wc ie gebieterin·
da lat si nemen hin in·
er selig man der sich ir vnder winde·
Blanker geberde stuͤnde ir gang·
vil deste bas ob ir des vogener were ǒch blanc·
mit eregernden tugenden so meht si wol vúr einen keiser gan·
ist aber dc si verborgen hat·
vil tiefe vnder ir brusten [332r] triegen spotten vnsvͤssen rat·
so vil gen ir gruͤsse mit willen niemer vf gestan·
swa wol gestalt geberde niht endeket·
dc wir verwissen ir ob sis enbleket·
innen svͤsse reht alsam vsen·
da ist glinzheit
noh gvnterfeit· als man nv siht
bi mangen wol geberenden lúten luzen·
Vergúldet kvpfer silber schin·
ob zin die mvgen wol gelich in einer art geselle sin·
vnd swer in grossem liebe gros valsch vnd vngefuͤge verborgen hat·
es si en wib es si ein man·
fúres glv̊t ist schoͤne swer aber si zegahes grifet an·
der mag des schaden gewinne· da vor huͤtent v́ch dc ist min rat·
swer nv steten froͤiden alten welle·
der sehe zv̊ wem er sich nv geselle·
dc des herze si also geschoͤnet·
ob im zuht trúwe wone bi·
swie es al der hv̊te si·
des schoͤne stat bi ander schoͤne gekroͤnet·
Paris badowe salerne kan·
niht also wol gebern ein ivngen eregernden man·
so dc er sich enthalte in sinem zorn an worten vnd an tat·
vnd mvͤ in iht das man im tů·
des sol er ander lúte erlan dc hoͤrt in beiden zů·
kan er so sinne walden so git im sin herze gůten rat·
ivng man nv merke was die wîsen prisen·
vnd la die wîsen dich des selben wisen·
dc dv sist gerne biden besten·
vnd wennest dv dich in diner ivgent·
an dise vorgenanden tvgent·
so zimst dv wol bi kvnden vnd bi gesten·
Ein zwelf iar alter ivngeling·
stille zúhtig dienesthaft dc sint drú hǒbet ding·
dú des vrkv́nde gebent dc ma sich fúrbc mag an im versehen·
ob er kome an dú zwenzig iar·
dc er gemeine vnd ǒch geminne werde vnd wirt dc war·
so leret in dv́ ier vnd zweng iar· zuht vnd manheit spehen·
vnd kome er danne zsinen driseg iaren·
so sol er stete vnd ganzer trúwen varen·
habt sich kintliche e vergahet·
dc sol er bvͤssen mit der rate·
die lip vnd gv̊t zegebenne hant·
wie schone er danne dien fúnfzeg iaren nahet·
Alle schv̊le sint gar ein wint·
wan die schv̊le aleine da der minne ivnger sint·
dú ist so kúnsteriche· dc man ir mv̊s der meisterschefte iehen·
ir besmen zament so wilden man·
dc er nie gehorte noch gesach das er das kan·
wa hat ieman so hoher schv̊le mere gehoͤret vnd gesehen·
dú minne lert die frowen schone gruͤssen·
dú minne leret mangen spruch vil svͤssen·
dú minne leret grôsse milte·
dú minne leret grôsse tvgent·
si lert die ivngen in der ivgent·
ritterliche gebaren vnder schilte·
Minne ist ein dc beste wort·
minne ist ein vbergulde ob allen tvgenden kamer hort·
minne ist ein slos der sinne da mit man gvͤtú werk besliessen sol·
si ist lere meister reiner sitte·
si wont den kúschen lúten vnd der stete gerne mitte·
vntrúwe vnd ir gesinde die schúhet minne dien ist mit v́bel wol·
minne ist als edel dc wissent sicherlichen·
man kan ir in der werlte niht gelichen·
wan das man si nennet wibes bilde·
vnd dc si ist dem wisen zam·
si sterket ere trúwe vnd scham[WS 7]·
vnd ist da bi vil mangem tôren wilde·
Wibes minne ist rehter hort·
swer sich versinne der wege in hie vnd dort vf ellú ort·
so mv̊s er mir bekennen dc wibes minne sich niht gelichen kan·
froͤwen lachen bringet gelt·
dc mannes herze in froͤiden gen frowen lachen vert erzelt·
da mit si von den sinne frowen bringent mangen wilden man·
wib mit scham sich fúr dich vf dich vf die erden·
wilt dv mannes sv́nde vberwerden·
so minne got in herzen tǒgen·
got minnet dinen kúschen lib·
so hohe minnent reinú wib[WS 8]
zuht meisterschaft zimt wol in frowen ǒgen·
Got hat mit hoher werdekeit·
gar sinen flîs vúr ellú ding an reinú wib geleit·
so dc si getúret sint vber alles dc in der werlde lebt·
ir werdekeit ist so geslaht·
dc ir lob hat vber flǒgen alles lobes maht·
so dc ir lob geliche ob allem lobe schone als ein crone swebt·
dú reinú wib sint werder danne dú svnne·
niemen lebt der wib vol loben kvnne·
noch ir lob mvge volle tihten·
dc in vf erde iht si gelich·
mit eren reines mv̊tes rich·
wisse ieman das des bite ich mich berihten·
ICh wil úch leren werden wib·
der lere volget so wirt getúret úwer werder lip·
besliesset [332v] in ivwerm herzen tugent kúsche dar zú reinen mv̊t·
dar zv̊ sult ir úch sere schamen·
sit demvͤtig vnd wol gezogen dc priset úwern namen·
getrúwe vnd erbere dc stat wol· und ist ǒch frowen gv̊t·
der werlde hort lit gar an reinen wiben·
ir lob dc sol man hoͤhen vnd triben·
swc got geschv̊f ie creatúre
dc vber geldent reinú wib·
es wart geborn sin selbes lib
von einer magt dc gab er in zestúre·
Er ist ein seldericher man·
der mit stetem dienest wil wesen frowen vndertan·
ob sich des vnderwindet ein reines wib dú rehter masse pfliget·
svmlich sint aber so gemv̊t·
dc si húte prisent dc si dc morne niht dvnket gǒt·
wie sol man den gewarte dien hat vnmasse volleklichen an gesiget·
svmeliche minnent brennen rǒben·
so minnent die die vrechen die die tǒben·
etliche wellent sich zv̊ den tvmben pflihten·
svmeliche· minnent die wisen gar·
etliche minnent die affen·
ga er selig man der sich da kan verrihten·
Gedinge hoͤhet mir den mv̊t·
so nidert in sorge dú mir vil dike vnsanfte tv̊t·
swenne ich in hohem wane mit froͤide bin so truͤbet mich ein leit·
den wehsel tribet min gedank·
hin vnd her der zwiuel mich ir herzeklichen twanc·
meht ich mich des vereinen dc si so lange mir verseit·
hort ich ein svͤsses ia noch von ir mvnde·
dc si vil minnekliche[WS 9] ſpꝛechē kvnde·
dú reine ſvͤſſe wol getane· sprechen kvnde·
dú reine svͤsse wol getane·
dc nêm ich vúr ein wares nein·
dc wort ist hertrer danne ein stein·
swc vil geschiht da wirt ma frúndes ane·
Tristram der leit vil grôsse nôt·
von eines wibes minne· lag er vil iemerliche tot·
dc kan von sinen trúwen die selben minne vs einem glas er trank[WS 10]·
dc selbe ǒch ich getrvnken han·
vs miner frowen ǒgen· da von ich[WS 11] in grôssem kvmber stan·
des mag mir gehelfen des meien schin noch kleiner vogelin sanc·
si hat mich verwundet also sere·
dvr min herze mit ir minne gere·
es ensi dc mich ir trost noch heile·
ich were anders schiere tot·
wand ir vil svͤsser mvnt so rôt·
der werde noch mir sendem man zeteile·
Dú reine zvnge ist also gv̊t·
dc si got[WS 12] selben sanfte[WS 13] in sinen oren[WS 14] tůt·
si svͤnet vnd samnet frúnt· vnd loͤschet mangen sweren zorn·
wol im der si behuset hat·
vnd ǒch dem herzen dc der zvngen schenket solhen rât·
er si swes kint er welle ich wil in haben fúr edel vnd wolgeborn·
dú reine zvnge lat sich niht ermieten·
die mieten kan si niemen an gebieten·
dc si sich zvn trúwen valde·
dú reine zvnge erwerben kan·
gůt wib zefrúnde vnd werden man·
er selig mvnt der reiner zvngen walde·
Do got in menschen bilde erschein·
vil arm vnd also armer es meht erbarmen einen stein·
dise armv̊t trůg er vf der erde· volleklich drú vnd drisseg iar·
dis bilde trůg er aller diet·
ist aber ieman vs gescheiden·
des enweis ich niht vúr war·
sint aber die bebeste vs genomen alleine·
swie si gewerkent dc si sint doch reine·
so wart nie niht so hoh geheret·
golt silber lúte búrge lant·
hant si dc svnder sv́nden bant·
vnd nieman me so sint si wohl bekeret·
Swer bannen wil vnd bannen sol·
der huͤte dc sin bannen iht si vleischliches zornes vol·
swa fleischlich zorn in banne steket mich dvnket dc da iht gottes ban·
swes ban mit gotte ist vnd nach gotte si vnd nah gotte·
der wirbet wol nach gote alsam ein gesanter gotes botte·
swer des bannes niht enfúrhtet· der ist niht ein wiser man
der vnder stole flúhet· schiltet· bennet
vnd vnder helme rǒbet vnd brennet·
der wil mit beiden swerten striten·
mag dc geschehen in gottes namen·
so darf sich sante peter schamen·
dc er des niht enpflag bi sinen ziten·
IR seht der ieglichen in den mvnt·
her babst vnd nement war ob alle ir orden sin gesunt·
tv̊t war ob vnder berten iht stechen gret in der kilchen keln·
ein orden der sich streichen lat·
mit sv́monien hant vnd doh der kilchen zehen hat·
an mantel vnd an schappen der wil dc inre mit dem vssern heln·
dú kilche solt niht mit der sv́monie·
gemeine han noch mit der heserie[WS 15]·
dc gv̊t ist niht wol gewunnen·
dc man dort nimt vnd dishalb hilt·
wer ist ein dieb wan der da stilt·
nv helent [333r] vnd stelnt doch breite ichs an die svnnen·
Swer einen schoͤnen wisen man·
von rome vnd ǒch von lateran wolde schrien an·
durh hc fúr einen moren vnd einen moren dvr miete han vúr wis·
swer dc also lange tribe·
dc swarz man wis vnd wis man swarz durh miete belibe·
so heten si doch beide dar nach als ir rehter varwe glis·
swas rome hat vberrust mit tvsent bannen·
wellent si dc wider núwen mit drin mannen·
so wil ichs hohe vf den tache·
mit schalle geschreie machen swarz·
nv hast dv da alsam ein harz·
wie kvnnen sis mit runen wis gemachen·
Ein vederlosú fledermvs·
zeinem valken sprach her valke ich habe in minem hus·
valken gevidere veile· her valke welt ir das han so seht mich an·
da bi so sas ein oderchvh·
der iach er were ein meister nahtegal sanges ǒch·
svs vermassen si sich beide des ir deweder kemes nie gewan·
dis bispel tvmben man alhie betútet·
der wisen lúten ere veile bútet·
vnd giht er welle in alles dc verkǒfen·
dc nie vbernehtig bi im wart·
der nie gewan har noch den bart·
den mehte man alsen sanfte rǒfen·
Den suren sur den scharpfen scharf·
den herten hart dast alles gůt ders kan da mans bedarf·
vnd hohvart hohuerten kan zerehte dc ist ǒch gv̊t·
swer lant vnd lúte hat gewalt·
der si den slehten sleht den manigvalden manicvalt·
minne den ereberen hasse den der dankes missetůt·
wil er in beiden sin geliche svͤsse·
nv sprechent wer dem svͤssen danne buͤsse·
ob er des svren schade gewinnen·
da hoͤret herren[WS 16] vorhte zv̊·
dc er an disen iht missetů·
da von wirt er vorht vnd ǒch geminnet·
Ein gelle ir gellen niden mv̊s
zwischen gellen zwein wirt vil selten nides bůs·
doch weis ich zwo die sint mit fůge dike wol ein andern bi·
ere vnd ein rehte reines wib·
swem dise zwo rehte bi geligent· dc ist ein wol gedriet lib·
nach gv̊te vnd ǒch nach eren· der drier driunge ist wol wandels fri·
zwein andern gellen were ein stadel zenge·
ere vnd ein wib die lident wol gedrenge·
si lant sich so wol zesamne sliessen
in einen[WS 17] eregernden man·
des herze sich behusen kann
vnd er sich ir nih schiere lât verdriessen·
Swem lieb geschiht vnd doch niht wol·
swer des sinem frúnde gan der gan im anders danne er sol·
drú lieb geschen sint niht dem tvmben so gv̊t als einem wol geschen·
er dvnket mich ein wiser man·
der lib gesehen vnd wol geschv̊f beide zerehte erkennen kan·
lieb geschehen vnd wol geschehen· lant sich dike svnder spehen·
von lieb geschehen vil lúte in kvmber vellet·
wol im zv̊ dem sich wol geschehen gesellet·
der ist der dinge lere·
dc schade schande sv́nde si·
dc wol geschehen ist wandels vri·
dc lieb geschehen ist dike wandelbere·
Swer sich vor nide welle ernern·
der minne vnfůge vnd flisse sich der tvgende[WS 18] wern·
wie sol man in geniden wil er beliben svnder ere ger·
wes zige man einen boͤsen man·
dc man in nide sit er niht niden verdienen kan·
swer den boͤsen niden wil der mv̊s noch boͤser sin danne er·
werde lúte svln vnwerde lúte niden·
die werden mv̊ssen iemer niden liden·
die werden svln sin nit lidere·
nit liden zimt dien werden wol·
so sint die boͤsen nides vol·
nit lidere sint besser danne nidere·
Sv́nden gelúst ist sv́nde niht·
swenne er wirt sigelos vnd dc mit widerwer geschiht·
sv́nden gelvst mit widerwer tv̊t cronebernden kempfen·
sv́nden gelvst mit widerwer swer da mit ist behaft der stritet wider ein kreftig her·
wand in vil sere an wigent sv́nden gelvst mit kampfe manger stunt·
sv́nden gelust swer der erlâssen were·
dc der ǒch alle sv́nde gar verbere·
dc were niht ein marter crone·
dem hvnger niemer we getv̊t·
nimt got des vasten wol vergv̊t·
dc ist ein ding dc got im selben lone·
Vil manig gv̊t cristen sv́nden pfligt·
der doch mit bůsse in sv́nden sinen sv́nden an gesiget·
wand sv́nde sint so gemeine dc lútzel ieman lebt gar sv́nden vri·
des mag man alles sich erholn·
wan dem vs sinem herzen der rehte gelǒbe wirt verstoln·
von den kristen dieben die vns mit valscher lere slichen bi·
dc ist ein sv́nde dú also tiefe grúndet·
dc si nieman mit sv́nden vbersv́ndet·
nv wachet edele cristen wachet·
dc vns der leideren [333v] ketzer rat·
iht scheide von der trinitat·
da mit wir sin zekristenheit gemachet·
Wir wellen dc dú minne si·
in dem wage vnd vf der erde vnd ǒch den lúften bi·
dar zů im himelriche· so ist si wert fro minne vnd ǒch vil lieb·
sit si der meisterschefte pfligt·
dc si den hohen kúnigen als den armen an gesigt·
so darf ǒch ich niht zúrnen· vnd stilt si mir gedanke alsam ein dieb·
nv sprechent an ob man fro minnen sehe·
was man ir gewaldes danne iehe·
sit si so tǒgenlichen twingen
mag beide wib vnd man·
dú minne wol gefuͤgen kan·
lieb vnd leit den die zů ir habent gedingen·
Die berge sint nv nah mir zů·
het ich ê gesvngen der were minem heil ein teil ze frů·
ich wil dien valschen frowen minen willeklichen dienest wider sagen·
vnd wil den gv̊ten kúnden das·
meht ich in wol gesprechen vnd ǒch nach gesingen bas·
danne mich min sinne leitent des wolde wile niht an in verzagen·
die boͤsen die sint maniges valsches riche·
die biderben ich vil verre von in geliche·
ein boͤsen lat ir mangen dienen·
des entůt ein reinú niht
dú hat mit einer liebe pfliht·
swelh frowe wil mer die schan die kan mit losen vienen·
Vnde het ich drier wúnsche gewalt·
vnd die wurden war so kvnde ich niemer werden alt·
so wolde ich wúnschen das die gv̊ten vrowen iht wurden růmes zam·
ich wolde ǒch eines wunsches gern·
dc si versagen kvnden vnd ǒch zerehte gewern·
vnd swas ir wille were dc si dc teten e man in wurde gram·
ich wunschte dc si die gůten man erkanden·
vnd ir herze von den valschen wanden·
swelch frowe wil alles dc gelúke hoͤren·
swc valscher man in valsche gert·
vnd weder versaget noch gewert·
die effent in vnd wil sich selben toͤren·
Swelh frowe ir mv̊tes irre vert·
des dvnket mich si si der eren da bi schiere behert·
die den man so grvͤssent dc er wol swuͤre er het es in der hant·
dem git si wunne in herzen gar·
swenne aber ir mv̊t verkert so stat es aber froͤiden bar·
so hat si ir gedank vnd ǒch ir mv̊t vil snelle von im gewant·
dú húte ist hie vnd morne dort in trúwen·
swer der vil gedienet dc mag in gerúwen·
nim man von in din mannes gemvͤte·
vnd wende es an ein reines wib·
dú túret ein dir dinen lib·
vnd tuget dir din herze in wibes gvͤte·
Man tůt vns michel wunder kvnt·
wie fúr parcifalen trůg mit zúhten manger stvnt·
den gral von arte rein des wunsch wc allen kúnigrichen obe·
dem gral ich wol gelichen wil·
ein reines wib der kúsche reichet wol des grales zil·
dú sich vor valscher vriet· dv́ wirt geziert wol nach der wisen lobe·
wil ieman nach dem núwen grale striten·
der sol sin kúsche milte zallen ziten·
als alle die des grales pflagen·
vnd noch vil gůter frowen pflegen·
wirt den ein reiner wibes segen·
der ist vri vor schanden vnd ir magen·
Ein man im selben ist ze rich·
der ander zarn der dritte ist sinem gv̊te wol gelich·
wer ich ein ebenere der drier ebenvnge wolde ich niht wan zwei·
der sines mv̊tes were ein rise·
des gv̊tes ein getwerg lobten dc iene vnd dise·
dc wolde ich also ebenen dc vmb die wal nieman gebe ein ei·
swc hie wurde vber dc leite ich zv̊ dem gůte·
der gůtes were rich vnd arn an dem mv̊te·
bescheidenlichen wolde ich sprechen·
man edels mv̊tes nv sitze vf·
dem aber der mv̊t kvme an die hvf·
nach eren stuͤnde den wolde ich nider stechen·
Venediere die hant vernomen·
dc roͤmesch riche veile si des sint in brieve komen·
nv hant si sich vermessen si wellen gerne dar zv̊ ir stúre geben·
dc es noch kome in ir gewalt·
swas si dc kosten mag des sint si willig vnd balt·
si iehent wurde in das riche si wolden iemer deste gerner leben·
ir herzoge ist ein mehtig kúrsenere·
vnd wart ie kúrsenere kronebere·
mit sinen igel varwen glazze·
so mag er wol krone tragen·
son darf ǒch fúrbas nieman fúrbas iagen·
der es nv mvge vergelten bas mit schatze·
Vnreht vnd reht han ie gestritten·
si hant vil vngeliche lant vnd lúte enzwei gesnitten·
vnreht hat mer gesindes· so hat dc arme reht die minren schar·
vnreht dc wil hohe man·
es vnd der babest lachent [334r] eteswenne einander an·
da bi stat reht vil trurig da bi stat roͤmsches lob rúweklich gevar·
das arme reht dc ist e doch so kriege·
e dc es sinú mvͤden bein gebiege·
es machet e vil offenbere·
swas vnreht har gerunet hat·
vnreht in rehter lúte wat·
die kempfet reht vúr einen trugenere·
Von rine so bin ich geborn·
in oͤsterriche erwahsen beheim han ich mir erkorn·
mer dvr den herren danne dur dc lant doch beide sint si gv̊t·
der herre ist gůt sin lant ist sam·
wan das ich mich einer dinge sere bi in beiden scham·
dc mich nieman wirdet es en si ob ers alleine tůt·
were ich bi gote in frone himelriche·
vnd heten mich die sine vnwerdekliche·
dc dvhte mich ein missewende·
ich han den kv́nig alleine noch·
vnd weder ritter noch das roch·
mich stúret niht sin alte noch sin vende·
Mir ist geswullen ie der mv̊t·
al da dc herze lit vnd ist dc man dc niht wider tůt·
mit einer sv̊ne salben so mv̊s ich min brust rumen dur den mvnt·
mich hat begriffen vasenden zorn·
wirt er mir niht benomen so scherpf ich miner zvngen dorn·
vnd luppe minen pfilen vf minú boͤse zimer zaller stvnde·
swenne si den valsch gekrenkent mit ir henden·
si legent ir vnschulde bi in vf ein enden·
so bin ich doch so nasewise·
dc mich ir schalkeit stinket an·
irnheines rede sich niht enkan·
von mir verheln ich smeke ir vntrúwe lise·
Ich were vngerne da pferit·
da man dc beste fůter den ohsen vnd den eseln git·
ich wolde ǒch da niht valke sin da man mit mvsern beissen vert·
ich were vngerne da ein wint·
da die stvmphen hovewart werder danne die winde sint·
ich were vngerne vf des helm ein ar der sich der milte were·
sinen schilt den wolde ich niemer zieren·
wer ich ein kúnig stat ob andern tieren·
alse der lewe mit der krone·
der bas kvnde flúhen dane iagen·
vnd liesse mich den gerne trage·
so wurde mir der luter spot ze lone·
Angest dv bist ein verbel dieb·
es wart nie frúnt dem andern so trutlichen lieb·
dv stilst den einen von dem andern also dc er vergisset sin·
swie vil angest der diepheit kan·
mines lieben frúndes stilet er mir niht hin dan·
stilet aber er mich im dc mv̊s ich also lassen sin·
angest dv bist vil dike· schalkes mv̊tes·
dv verzihest dinen frúnde ein lúzel gv̊tes·
des mvͤsse angest der túfel schenden·
er dieb vnrehter boͤsewiht·
mins herzen kúniges stilt er mir niht·
stilt er mih ime des mag ich niht erwenden·
Ein rv̊ch sagt weder abe noch an·
enrůch behabt zefrúnde weder dc wib noch den man·
enrůch ist weder lieb noch leit· enrůch ist weder kalt noch warn·
enrůch dc kan wol vbersehen·
enrůch dc lat dem man geschen dc im doch mag geschehen·
enrůch ist eren ane dc spriche ich volleklich vf minen eit·
swa ich selch enrůch veile vinde·
da ist vil wert ich růch sin ingesinde·
enrůch ist sippe der vnmere·
naher danne es der liebe si·
enrůch ist ǒch der frage vri·
zwú sol ein man der machet so zwiuelere·
Der parat valscher serion·
her liegat triegat trumpfator der růfe meister don·
hat alle die werlt so lieb dc in dú meiste menge tanzet nach·
da tanzet slurchart vnd slich·
fridelos diebolt manolt rǒbolt die vil manigen slich·
den vogtelosen machent da hilfet vngewis arg vnd schach·
vntrúwe vnd schande singent da vor zeprise·
rǒb mort brant nidunk in sibchen wise·
losheit iaherre vnd hovegalle·
spot vnkust oren drus vnd vâr·
vntrúwe singet vber iar·
werlt dinen tanz pfi dich vnd ǒch die alle·
Die hende mvͤssen selig sin·
da milte vnd ellen beide hant gehuset in·
der zweier tvgent mag ein ieglich man von schulden wesen geil·
ist aber ellen vberladen·
in eines zagen hant dc tůt an wirde grossen schaden·
ellen bi der erge erwirbet selten gv̊tes manes heil·
swa milte vnd ellen sich gesamnent beide·
dc ziert den lip als der kle die[WS 19] heide·
hat aber milte sich gehuset·
in zagen hant dc mvͤze man klagen·
dc tv̊t an wirden grossen schaden·
vnd ist ir lob in schanden hol verkluset·
Der leker mvnde zvnge ist snel·
swa man si gerne hoͤret da sint si kv́ndig vnd hel·
zem boͤsten niht zem besten· vnd argú ding [334v] zeshuzze vil bereit·
nv snappe dar vnd hellehunt·
du slange gift du eiter klus ich meine schalkes mvnt·
du boden grunt der helle· da wehset dir ein iemerwerndes leit·
swenne dv den kristentům an dir zerbrichest·
dc dv zem besten niemer niht gesprichest·
es sol dir werden al zeswere·
des einer schulde nie gewan·
dc snappe lúgest dv in an·
verflůchet bist den svͤssen gotte vnmere·
Wes svmest dv dich ende krist·
dc dv niht kvmst dvn darft niht mere biten dekeine frist·
dv vindest fúrsten veile veile graven frien dienest man·
kvmt ane hǒbet dc la sin·
hast dv in zegebenne silber golt si werdent alle din·
an den si gelǒben solden da kerent si sich leider lúzel an·
der si geschv̊f des hant si gar vergessen·
der vngelǒbe manig herze hat besessen·
des úbeln kúniges pharâones herte·
rehtes gelǒben sint si vri·
in wont vnreht gelǒbe bi·
si volgent niht dem der si gerne nerte·
Man swc dir vnuerdienet kome·
ald vundeliche wilt dv dc der fvnt dich lange frome·
so diene nach dem funde dc dv vor gedienet soltest han·
stige in dich selben vnd sprich·
zedinem herzen frúnt wir han verslafen dvnket mich·
nach disem grossen fvnde den vns gelúkes wunder hat getan·
nv rate wie wirt dis wilt wilde gelúke·
behalden dc es sich niht von vns zúke·
es lat sich als vngerne mvzen·
es ist so ledig vnd ist so vri·
sin wir im niht mit hůte bi·
wirt im der sprung wir mvgen es wol verlúzen·
Der werlde rede ist es ensol·
ein ledig wib niht werbe vmb die man es stat niht wol·
doch wil ich úch bescheiden· wie es ein frowe wol mit eren tůt·
si sol sich flîssen reiner sitte·
so dc ir wibes gvͤte vnd wibes tvgende volge mitte·
vnd dc da bi ir ere an allen vieren enden wol behv̊t·
si sol sprechen lachen vnd schimpfen·
also dc si sich túre mit gelimpfen·
mit wibes tvgent ir lob gemeren·
si selig frowe dú also kan·
mit rehter kv́sche erwerben man·
vnd minne got in kans niht bessers leren·
Ich han dc dike wol vernomen·
dc vs dien grôssen wassern sint die grôssen vische komen·
swer si dar inne vahet der hat gelúke vnd ist ein selig man·
da bi so svlt ir wissen das·
das man in grosen wassern mag ertrinken niender bas·
er dvnket mich vil wise der dise rede zerehte kan verstan·
ich han in grossen wassern vil gevischet
vnd han der grossen vische[WS 20] niht erwischet·
in kvnde ir leider nie gevahen·
ertrinken was mir vil nach kunt·
mir gieng dc wasser in den mvnt·
mir hulfen niht die herren die dc sahen·
Von sinewellen mv̊te ein man·
zv̊ swem der walget der walzet ǒch von im hin wider dan·
nv walge hin nv walge her eins vngevierten mannes mv̊t·
der kvchet kalt der blaset warm·
vs eines mannes mvnde steter trúwen ist er arm·
ander lute meine ich niht wan den einen der es tůt·
her pfenning dc ir nement lob so riche·
er tůt durh ivwern willen lasterliche·
dc mvͤsse got von himel erbarmen·
her pfenning dc ir werent lieb·
vnde niht so gar der eren dieb·
des gvnde ich wol dien richen vnd dien armen·
Nv hoͤrt wie listig er doch wc·
dc er vs truͤber aschen worhte ein luter spiegelglas·
so clar vnd ǒch so reine dc er sin selbes bilde darinne sach·
wc dc niht ein wnder gros·
dc er nv vs eschen machet vnd wc doch ein erden klos·
vnsern vater adam wan des ist vil lang dc es geschach·
den lie sin schepfer wider zeschen werden·
nv wil er aber vs siner núwen erden·
manigen lutern spiegel machen·
der iemer mv̊s an ende sin·
noch clarer danne der svnnenschin·
sin kvnst ist ganz die kan im nieman swachen·
Dú werlt wc wilent so gestalt·
dc man einem biderben man sin frúmkeit schone galt·
mit grůsse vnd ǒch mit gůte· deste lihter wc ein man do gůt·
nv si swie frome welle ein man·
vnd vlîsse sich des besten so er sich versinnen kan·
dc mv̊s also geschehen dc im dú werlt dekeine helfe tůt·
ê hulfen hundert einem gůten gv̊tes·
nv irrent tusent einen gůtes mv̊tes·
swer nv bi dirre werlte súre·
sich in tvgenden vinden lât·
vnd valschen werken abegestat·
der dvnket mich vúr manigen man gehúre·
[335r] Owe dir spil wie boͤse ein ampt·
mich wundert das sich din niht al dú werlt gemeine schamt·
vnd doch so manig man von dir verlorn hat sele vnd lib·
dú grawest svnder alter iugent·
in kan an dir gemerken noh gepruͤuen keine tugent·
dc dv also dike beswerest vnd beruͤrest reinú wib·
din wirt getúret lútzel ieman selten·
dú prisest rǒb mort liegen steln schelten·
dv hast gekeret von gotes minne·
dv breht den tieuel manigen man·
sit ich dc wol erkennen kan·
mide ich dich niht spil zware dc sint vnsinne·
Der mv̊t wc wilent herren kneht·
nv er svmelich herren herre svnder reht·
dc herren lib solt eren· der mv̊t im halb des niht verhengen wil·
wer dich hoherborner lib·
gesigt dir an din mv̊t so bist dv kranker danne ein wib·
er leret dich nach schanden leben weisgot mere danne zevil·
er sol sin der minre wis dv der merre·
er sol wesen kneht wis du sin herre·
schaffe dc er dich fúrhten mvͤsse·
dv solt im sin wilde wern·
heis in dir balde hulde swern·
e er dich werfe hin vnder eren fuͤsse·
Ein bruder sinen brůder slůg·
e dc ir beider vater wart geborn den vngefůg·
den sol ein wiser raten· wan das was ein wunderlich geschiht·
dar nach ich eine brvgge sach·
dú wart bi einer nacht gewort vber einen breiten bach·
swas kúnige vf erde lebt die wurhten alle selker brvgge niht·
do kamen zwene die die brachen·
vnd die beide nie ein wort gesprachen·
den einen sach man vnd niht horte·
den andern hort man vnd niht sach·
ers al der werlte ein vngemach·
der beider kraft die brugge gar zerstorte·
Nv merke wc dc si vnd rat·
dc niht ersterben mag vnd ist doch ewecliche tot·
noch niemer mere erstirbet noch nie erstarb ich rate es ob ich wil·
lib vnd sele es beide hat·
da von ein toͤrscher leij ich wene es vngeraten lât·
vnd ist ir eteslicher der es weis·
der vindet man niht vil·
sines wunders ich úch mer bescheide·
brv̊der vnd swester hat es beide·
were es alles an geschriben·
warte ob des iht si genv̊g·
ich sach die es trůg·
vnd wart doch nie geborn von wibes liben·
Manig man wenet frowen leben·
der in lob mit fůge halben weg niht kan geben·
dc sich ir ere enzúnde als dc fúr der dúrren zvndern tůt·
maht dv denken wiser man·
ob dir ein wib durh ir wibheit mit ir wol zeredenne gan·
dc dv mit rede iht machest da von ir herze gewinne sweren mv̊t·
ia meine ich mich vnd die vil gar vnwisen·
die frowen kvnnen sich vil tǒgen prisen·
swenne wib dvrh wibheit gruͤsset den tôren·
vnd dc er wêent er habe gesigt·
dannoch ein wib ir wibheit pfliget·
so erkent man doch den esel bi den oren·
Her hagen ir sit ein man so wis·
sagt mir des ich úch vrage vnd habt des iemer eren pris·
wie mangen fůs hat úwer mv̊ter vnd ir esel saget mir dc·
dar nach frage ich úch frúndes halb·
wie manigen fůs hat úwer mv̊ter vnd ir liebes kalb·
alsvs getane vrage lat man von gůten frúnden ane has·
sit dc min ane zoch úwer anen mv̊ter·
ir svnt niht zúrnen trut sun vil gv̊ter·
es ist ein so getane vrage·
erloͤset ir mir disen haft·
dc han ich vúr ein meisterschaft·
wie wurden wir von adam úwer mage·
Der triskamer hort·
ein ankerhaft der stete ein fúrgedank vf ieglich wort·
ein wahter cristentůmes roͤmscher eren grunt veste vnd gesvnt·
ein bilde der hǒbethafter zuht·
ein vollú kruft der sinne ein same seldebernder fruht·
ein zvnge rehter vrteilde frides hant gewisser worte ein mvnt·
ein hǒbet dem nie smit deheinen krone·
vol machen kvnde siner tvgende zelone·
dem hǒbte svln wir alle gelichen·
wúnschen lange wernder tage·
wes herze wes lib dc lob nv trage·
des svln wir iehen den keiser friderichen·
Swelh wib sich so gevriet hat·
dc ir lib ist vri vor aller missezemender tat·
dú hat sich hoh gefúrstet swie si doch lant noch eigen lúte habe·
sint ir gedanke vnkv́sche vri·
vnkúscher worte ir mvnt so iehen wir dc si beide si·
ein engel vnd ein wib des lobes get ir niemer gůt man abe·
swer si danne ein wib vnd engel nennet·
der hat bekant rehte als si [335v] got erkennet·
von libe ein wib von tvgende ein frowe·
ein engel an der reinekeit·
da von der geist ie angestreit·
menschlicher gir als svnne tv̊t dem tǒwe·
Man seit von heilawage vns vil·
wie heil wie gůt es si wie gar vollekomen der eren spil·
wie gar sin kraft verheilet swc wundes an dem man verseret ist·
noch besser weis ich heiles wag·
des kv́sche dú ist von hoher art der reinen engel mag·
sin lvter rein gemvͤte den berǒbet niemer valscher list·
dc ist ein reines wib dú mit ir gvͤte·
loͤschet mannes zorn vnd vngemvͤte·
dú kan wol selden leit vertriben·
vnd swenden sinú vngemach·
ein schilt vúr vngemvͤte ein tach·
des bin ich wer von seldehaften wiben·
Frowe miner froͤiden heil·
mines libes wunne vnd aller miner selden teil·
din gvͤte mih des betwinget dc ich dir iemer spriche lobes wort·
ob allen frowen selig wib·
in wiblicher fůre minnenklicher schoner lib·
der werdekeite blv̊men wiblicher zuht vnd eren ganzer hort·
din roter mvnt din liehten ǒgen blike·
hant mich verwunt in ir minne strike·
so dc ich herze vnd al die sinne·
in din genade han gegeben·
swie dv wilt so wil ich leben·
ich bin din kneht dv min gebieterinne·
Vns wont ein wunsch gemeine bi·
dc vns gebe ein ende gůt vnd alles wandels vri·
der wunsch ist gůt aber ende gůt zegebenne an rehtem lebenne lit·
got mag es geben ob er wil·
dc ich gelǒbe wol es wer aber ein gewunnen spil·
dc got gv̊t ende gebe ane rehtes leben dc wisset ane strit·
rehte leben git vil gerne gv̊tes ende·
vnrehtes leben pfligt der missewende·
mit der der zwiuel hat die pflihte·
wie dv́ sele mag gevarn·
des mag vns alles wol bewarn·
reht leben ob wir dc bringen fúr gerihte·
Got herre bit vil manig man·
genade gib mir frist zeleben vnz ich dir vndertan·
mit dienste mvͤsse werden· dis gebêt got ofte erhoͤret hat·
an manigem man der im doch nie·
so vil zedienste wart dc er im ie gebutte dú knie·
an rehter liebe ze eren dis ist iamer der mir nahe gat·
got git ie frist man vindet in aber selten·
der die vrist mit dienste welle gelten·
die got so lange herat geborget·
er schribet es vf von tage zetage·
vnd wenit an einem tage iriage·
dc er da hat so wening vor besorget·
Der wise salomo do sprach·
swc ich han eruarn vnd alles dc ich ie gesach·
vnder der svnnen dc ist gar ein truge ob aller trugeheit·
er sprach ǒch sicherlichen war·
owe dc wir danne hie svs swenden vnser kvrzen iar·
mit truge vnd niht gedenken an die iemer wernden stetekeit·
niht hilfet al der werlde hort gekǒfet·
vnd dvr den hort die sele hin besoufet·
in helle pine svnder enden·
des svln wir werben vmb ein leben·
den ewig froͤide wirt gegeben·
vnd lâssen varn dc vns des mag gepfenden·
Es fůr ein ebenhere diet·
in einem scheffe bis dc schef gegen einer mv́ln geriet·
do rief der schifman sine schifgereisen in den noͤten an·
dc si dú růder in die hant
gerůchten nemen· do sich der ir dekeiner vnderwant·
don mohte er ǒch dc schif niht eine bringen von der mv́le hin dan·
sus trůg der wag dc schif mir disen lúten·
hin durh die múln dis bispel mag betůten·
die fúrsten die so sint verdrossen·
dc si niht růdernt gegen dem stade·
e dc vf in geliget der schade
der ienen geschach die durh die múln flossen·
Das boͤste das man erdenken kan·
in himel vnd vf erde· dc ist der vngetrúwe man·
der blendet liehtú ǒgen· vnd verderbet dc e was gesvnt·
sin zvnge eiter gallen hat
er lebendig re mort meilig man ein vrspring aller missetat·
hvͤtet úch vor sime lachen es machet gůte lúte sere wunt·
er ist lange siech an den sin aten tuͤret·
sin grůs durh reinú herze strale fuͤret·
...
sin zeigen swachet reinv́ wib·
sin runen toͤtet manigen lib·
vnd sinú werk alle bosheit gar durh grúndet·
Was hilfet ane sinne kvnst·
wc hilfet wol gehoͤren der dar zv̊ niht hat vernunst·
wc helfent schoͤnú ǒgen dem der dc weger niemer kan ersehen·
wc hilfet richeit ane rât·
was hilfet vil geheissen ders niht mv̊t zetv̊nne hat·
wc hilfet manne schoͤne von dem doch niemer ere kan geschehen·
wc hilfet sterke der si niht versv̊chet·
wc hilfet dienst [336r] da man sin niht gerůchet·
wc hilfet ǒch gebeitu minne·
dú niender von dem herzen kvmet·
noch minre zallen selden frumet·
des mannes leben der valsch ist vs vn inne·
Was sol ein minnekliches wib·
wc svln ir liehtu ǒgen ir roter munt ir schoner lib·
was sol ir grůs ir lachen· ob deheines vs vron eren kamer vert·
wc sol ouch ir vil svͤsser name·
wc suln ir guͤtú kleider ob si dú treit ane schame·
was sol ir wibes guͤte ob si sich tvgende mit vneren wert·
was sol ir schone klarheit vnd ir ivgende·
wc sol ob si wil alten ane tvgende·
wc sol ist si nach gotte gebildet·
ir reinen man ir werden wib·
hassent also schoͤnen boͤsen lib·
der schande zamt vnd sich gar eren wildet·
ICh wise an wiser lúte rat·
dc man den habe vnd niht an den der rates nien enhat·
wie kan mir der geraten des rât gegen werden tvgenden nie geschein·
est besser bilde an dem genomen·
der bilde an selde an eren vnd an gv̊te ist vollekomen·
swer nach dem bilde keret der stôset sich vil lihte an herten stein·
swer blinden[WS 21] volget der ist wol erblendet·
was wunders ist ob den sin blintheit schendet·
dar vmbe rate ich swer sich vlîsse·
gegen got vnd werder zvht
swer hat zv̊ den sins rates fluht
ich wene er kome zedem ân itewîsse·
Spotter dv solt hoͤren mich·
ich wil dir sagen wes got von himelriche zihet dich·
er giht dc schvlde meineide vntrúwe sv́nde has vnd nides vol·
si din herze vnd ǒch din lip·
dv fridebreche dv schuldig mort an man vnd ǒch an wib·
die din gelupte zvnge mit valscher svͤsse kan geschiessen wol·
got sinen[WS 22] vride gab alder werlte gemeine·
den brichest dv mit dinem spotte vnreine·
das dv in erge hast gesprochen·
dvrh dinen spottigen valschen munt·
dc wirt dor an der helle grvnt·
gehabe dich wol vil svre an dir gerochen·
Ein meister der hat vns geslagen·
zwei swert die zwene kv́nigen wol mit eren moͤhten tragen·
gemachet volleklich von hoher kvnst vnd sint wol vollekomen·
geliche lang geliche breit·
zetroste vnd ǒch zehelfe der vil edelen cristenheit·
si sint vnschedelich vnd mvgen den getrúwen wol gefromen·
stole vnd swert sint si genennet beide·
si bedurfen niht wan ein scheide·
an in[WS 23] sich nieman mag versniden·
wan der da lebet svnder vorht·
er ist listig der si hat geworht·
ir beider slege mag man vil gerne miden·
Die lúte sint gelandet wol·
die lant niht wol gelútet meines sint die lúte vol·
lvft vnd erde himelzeichen nach ir rehte tvnt·
des tůnt aber die lúte niht·
vnschúhende vnd vnschamende sv́ndet sie dc es der siht·
der dvrh vns wart geborn vnd an dem heren krúze verwunt·
dc wir des so dike an im vergessen·
des hat vns sin vergessen besessen·
zetode mit den tǒfelosen·
der tǒf mag sich wol vnser schamen·
dc wir mit wol getǒften namen·
tǒf vnd crismen· so dike an vns verbosen·
Ein wol werbende weideman·
der vische vogel wilt so meisterlichen vahen kan·
wie gv̊t er si noch besser ist der der lúte vaher ist·
hie mit mein ich ein biderben wirt·
der geste wol enpfahen kan vnd den froͤide birt·
in sinem hvse bi sinem brote vnd dc tůt gar ane valschen list·
gv̊t wirt erwirbet ere vnd gotes hulde
gv̊t wirt ist aller wirde ein vbergulde·
swelh wirt kan die geste enpfahen·
so dc fro ere vnd ǒch ir kint·
mit gv̊tem willen bi im sint·
als der von seine der mag wol ere ergahen·
IR engel hoͤhet úwern sang·
sit sich got hat geivnget·
des ist nv zemâssen lang·
lobt alle geliche die reinen magt die got ze mv̊ter nam·
do er sich in ir herze vielt·
ich meine de edelen got der aller elementen wielt·
erde vnd himelriches ist er gewaltig sprich ich svnder scham·
dar zv̊ riet im die barmvnge vnd die minne·
dc er zehimel kos die kúniginne·
vnd ǒch im selben zeiner mv̊ter·
svst wart der alte herre ivng·
von himel tet er einen sprvng·
vúr vnser not wart er svn vil gůter·
Ave maria reinú meit·
sit dich got hat erwelt ze mv̊ter der erbarmeherzecheit·
so erbarme dich genedekliche vber alle sv́ndekliche diet·
dv svnnenglast dv morgenrot· [336r] din lib vns hat benomen des eweclichen valles tot·
den der leide sathan vnser alten mv̊ter even riet·
des bit ich dich svͤnerine reine·
dc din helfe mit barmvnge vns meine·
wir gern in inneklichen herzen·
dc got sin antlúze clar·
vber vns erlúhte vnd neme war·
wie mit vns hat der túfel sinen smerzen·
Wache crist es wil tagen·
der han hat zwir gekret ich wils iv werlichen sagen·
es nahet gegen dem morgen dc got wil rechen alle sine leit·
er wil vns alle lassen sehen·
swas im grosser marter dvrh vns svnder ist geschehen·
dc solten wir besorgen· so wer sin helfe gegen vns gar bereit·
swenne er vns zeiget sper krúze vnd krone·
der gewaltig sitzet in dem[WS 24] throne·
so kan im nieman widerstriten·
er ist gewaltig vber ellú lant·
ir cristen dar an sint gemant·
vnd warnet úch gegen im in kurzen ziten·
Das eine dc gehoͤret an·
dem babest der mit dem bůche sere twingen kan·
mit im vnd mit dem banne sol er vaste droͤwen zaller zit·
dc ander sol ein keiser nemen·
stole vnd swert vnd ǒch dc riche mag ime wol gezemen·
sol er gerihtes walten so mac er niht beliben ane strit·
er svllemvnt der edel crstenheit·
sante peters kempfe des sit ir gv̊t geleit·
dc die gerehten vberwinden·
die rehtes widersachen sint·
des bittet maniger mv̊ter kint·
hilf herre got dc wir gerihte vinden·
Wil ieman raten wc das si·
est lihter danne ein lǒb vnd ist noch swer danne ein bli·
est grosser danne ein berg gefuͤger danne ein kleines mvggelin·
dc selbe schonet mannes leben·
es kan ǒch mannes schoͤne vil der vngetete geben·
so vorhtiges noch so liebes wart nie mer nv rate wc mag dc sin·
est ê zehimel danne ein ǒge mvge winken·
es ist so swere swenne es beginnet sinken·
dc al die werlt niht widerwůge·
es ist ǒch so gefuͤge wol·
es slufse dvr ein nadel hol·
est bern grôs swenne es verlet die fv̊ge·
Swas gůt ist einen hohen man·
niht volleclich ein lob als ichs zerehte erkennen kan·
ist gv̊t dc gůt was gůt dc ist mer danne halbes verlorn·
swer gv̊t si der belibe gv̊t·
die wile er mvge vnd tvge vnd habe steten mv̊t·
wol an gehaben vnd widerkert wer noh bas verborn·
swen lib noh gůt niht irret vnd doch boͤset·
dc er mit sinen listen hinder loͤset·
des lib sin leben so hat geswachet·
ein eren zv̊nemer der ist gůt·
ein eren abnemer dike tůt alsolhe tât der ere niht enlachet·
Heten vrowen den gewalt·
dc si mit liehten ǒgen viengen manigen ritter balt·
vnd betwungen die da mitte· dc si sich eigenlichen mvͤsten geben·
swa swa frowen varnt vber velt·
die vâht man dur schatzes willen· vnd niht dur ir rehter minne gelt·
fluhe ein wolf zv̊ frowen man solt in dvrh ir liebe lâssen leben·
ein ritter mag sin ere wol verhǒwen·
der frowen vehet swa si vert mit ivncfrowen·
vnd die rǒblichen mit im zoͤmet·
hermin zen scharlachen mvnt·
werde im von vrowen niemer kvnt·
dar zv̊ mvͤsse im von einer sin getrǒmet·
Der nv́we sliffen vride ist scharf·
vnd also scharf dc vngerihte nieman fúrhte darf·
swer eine masse goldes truͤge vber velt dú wer vnlange sin·
des mag dú kúniginne wol iehen·
von vngerlant dú hat dc wol gehoͤret vnd gesehen·
der núwe gesworn vride ist an ir rosse vnd an ir wol schin·
man was den vrowen wilent so gevêre·
wer sie da her gevarn so minnebere
ein kússen von ir roten mvnde·
het man ir gerner abe verstoln·
denne alle ir vngerische voln·
dc was do do dú minne twingen kvnde·
Ach rome wie dv verwitwet bist·
vnd der stůl verweiset· swer der frone flîssig ist·
der minnet got noch gotes reht er si halt swer er si·
do roͤmesch lieht luhte vnd bran·
swa kristentv̊m erloͤschen wc· den zvnde man wider an·
swa kristentům nv loͤsche da siht man den gelǒben hinken bi·
swem veterlich des vater reht versmahet·
ob sich ein geher tot an dem vergahet·
des wúnschet alle vnd dannoch eines·
dc vns got růche geben·
voget vnd ewart die rehte leben·
dc sýmonie mit in iht habe gemeine·
[337r] Rome zwo tohtern gab zeman·
Megenze vnd koͤlne da ist ir niht gelvngen an·
nv sint der tohtern man ein teil zetvmb vnd da bi al zegeil·
die sint den riche niht gůt wirt·
gewesen hie bi rine ob den keiser das wol verswirt·
so mv̊s er doch die scharten tragen dú niht gahens wirdet heil·
dú bistv̊n waren ê in des riches hůte·
megenze vnd koͤlne nv lit úwer růte·
dem riche vf sime blossen rugge·
welt ir mit úwern krvmben steben·
des riches schaden geleite geben·
so mag doch niht den arn vertriben ein mvgge·
Aller orden pris ich niht·
so sere als die ê alleine swas dar vmbe mir geschiht·
barfůssen bredigere krúzer orden sint da engegen blint·
gra wis swarzer mv́nche ist vil·
hornbrv̊der vnd martere als ich úch bescheiden wil·
schotten bruder vnd die mit den swerten sint da engegen alle gar ein wint·
tv̊mherren nvnnen vnd leigen pfaffen·
vnd alle die orden die got hat geschaffen·
die lebent des dú ê hat erzúget·
swer der ê zerehte pfliget·
der hat hie vnd dort gesiget·
swers wider redet des volget niht er lúget·
Maria mv̊ter vnd maget·
in himel kv́niginne was vns selden ist betaget·
doch vrowe von der guͤte die dv vil vserweltú mv̊ter treist·
dc dv so reine ein reines kint·
gebere herren vber alle die nv herren sint·
den brâht ǒch dir vil ebene zv̊ dinen oren in der heilig geist·
des la du svͤsse mv̊ter mich genîessen·
vnd tů din heilig ore sich entsliessen
gegen miner bete vnd hilf mir armen·
dc ich von sv́nden werde erlost·
dv bist min heil vnd ǒch min trost
vnd al min hort la dich min leit erbarmen·
Des mischseneres ist·
ist besser danne sin was des si gelobt der suͤsse krist·
dc er als húgeliche tvgende mit eren an sich las·
sin was was tvmber danne ivng·
nv hat getan sin ist vúr sin was also herten sprvng·
der sin lop was dir lúhtet danne dú svnne ein meienntǒwig gras·
er et vsen tvmp vnd innen wis·
so weis ich wol dc in der ist bc pris·
danne im der wc noch ie gezeme·
wol tv̊n ist gůt e bc tůn kvmt·
dc tůn bc denne wol tůn frumt
ein bc tůn ich vúr wol tůn iemer nême·
Got aller wunder wunder ê·
gewundert· hat mit wunder wunder vnd wunder me·
danne ieman mac vol sprechen· dannoch hat er wunders me getan·
den selben wunderere grôs·
aller wunder wunder nie mit wunder vmbeslos·
den hete wunderlich ein meit in ir da merket wunder an·
dc wc ein wunder an dem wunderere·
wie mit wunder in der meide were·
dennoch so wc der wunder me·
dc er mit wunder in ir was·
vnd sin mit wunder meit genas·
der wunder grôs danket wunderlich im sere·
Gelobt bis hohú trinitat·
vater svn geist gelobt bis aller der genaden rat·
die dv durh vns vil arme ie begienge oder noch dvr vns begast·
gelobt so si din gotlich kraft·
gelobt si din gewalt din kvnst vnd ǒch din meisterschaft·
gelobt so si din wunne· gelobt so si din schoͤne die dv hast·
gelobt so si din wisheit diner sinne·
gelobt so si din gvͤte der waren minne·
gelobt so si din menschlich ivgende·
gelobt so si dú milte din·
gelobt so sol din barminge sin·
gelobt so sist dv aller diner tvgende·
Lob si dir hohgewihte meit·
lob si dir aller froͤiden dú vns ist von dir bereit·
lob si dir aller selden lob si dir alles heiles vnder bot·
lob si dir liebstú gotes trut·
lob si dir gotes tohter lob si dir werdú gotes brut·
lob si dir gottes mv̊ter den menschen hast versvͤnet vnd got·
lob si dir frowe gotes nider kvnfte·
lob der gebvrt der marter der sigenvnfte·
zehelle vnd ǒch der vrstende·
lob si dir geseit· von vns
der lere vnd vfvart dines svns
lob si dir meit iemer mer an ende·
Ein brvnne vs herzen grunde gat·
der vor der heisen helle vil manig sele behvͤtet hat·
er dúzet in die hoͤhe sich frewet sin alles menschlich her·
sin vnd die sint sinewel·
er flússet in der rúwen pfat vnd ist dvr ǒgen snel·
er ist vor cristes mv̊ter noch breit danne dc wilde lebermer·
swer nv welle werden ane súnde·
der senke in vaste vnd habe sin gv̊te kv́nde·
er loͤschet ewekliches dúrsten·
wanne er ist luter vnd clar·
swelh sv́nder in geleiten tar·
der mag wol werden zeime himel fúrsten·
Gelobt bis mv̊ter reinú meit·
gelobt so si din kúsche gelobt so si din ere breit·
gelobt so si din werder name gelobt so si din werder lib·
gelobt so si din vbergvͤte·
gelobt so si [337v] din tvgent dú als ein tǒwig rose bluͤte·
an alle missewende des bis gelobt gelobt fúr ellú wib·
disú lob ich frowe von dir singen·
dv maht mich wol von minen sv́nden bringen·
vnd mich zegv̊ten dingen kere·
dc mir dc beste bi gesta·
vnd ich dime dienste werde gra·
des hilf dv mir dvr dines kindes ere·
Von megenze wol nv́nherzig man·
dc der hat drier fúrsten sedel da enist niht wunder an·
e doch so nimt mich wunder dc er nv́nherzeklich kan geleben·
mit eime libe ers alles tůt·
er hat ein adern niender si ziehe vf kronebernden mv̊t·
des hat sin herze sinem libe sine trúwe des gegeben·
dc er nach eren iemer fúrwert kriege·
vnd dc sin lib sin leben des niht triege·
dc wil ich ane zwifel laze·
im ist nah eren also ger·
dc nie eime hvnger gitig ber·
so not enwart nach svͤsses honeges raze·
Maria ist ein svͤsser name·
so seldenfrúhtig vnd so rehte wunnesame·
zv̊ dem svln wir gedingen an dem lit vnser selden hoh gewin·
der erste bv̊chstab ist genant·
ein ·M· da von vns schu dehaften wesen sol bekant·
dc si mediatrix heisset dc spricht entútschen si ist ein svͤnerin·
ir milte svͤnet vns vil mange schulde·
ir gvͤte ist aller gvͤte ein vbergulde·
si machet ir kindes zorn vns linde·
vnd git vúr sv́nde gv̊ten rat·
si tilget vnser missetat·
des loben wir die mv̊ter mit den kinde·
Was nv der ander búchstab si·
ein ·a· auxiliatrix ist da betútet bi·
helferin genennet ir helfe svln wir gemeine nemen war·
mit wiser vorbedehtkeit·
wart ir der name geformet vnd vor maniger stunt bereit·
von dem den si zetroste der cristenheit an dise werlt gebar·
er was ir kint ir vater ir schepfere·
wol dem wunder die der wunderere·
gewundert hat an der vil suͤssen·
sit er kan kint vnd vater sin·
dc wunder tůt vns helfe schin·
si helferin si kan wol helflich gruͤssen·
Der dritte sol ein ·r· sin·
dc sprichet repatrix sist ein wider bringerin·
vil maniger armen sele dú anders were verlorn iemer me·
ir widerbringen wc so stark·
dc sich dú clarú gocheit in ir kúschen libe barg·
da mit si vns wider brahte in menschliche bilde vs iamerberndem we·
swer ir des widerbringens nv gedenket·
vnd ir mit herzen trehen winder schenket·
vs rúwigen herzen dc sint sinne·
si wider bringet lúte vil·
swer im vnd ir getruwen wil·
er mehtig kúnig si mehtig kúnigine·
Der vierde ein ·I· geheissen ist·
dc sprichet illuminatrix dv vil seldenriche bist erlúhterin genennet·
nie reiner name von vrowen wart gelesen·
din lib braht vns des liehtes schin·
din svn vns loste von der vinsternisse pin·
da wir ane wunne vnd ane ende mvͤsten sin gewesen·
also durh lúhtig so was din gemvͤte·
dc gotes geist vs dinem herzen blvͤte·
nv erlúhte ǒch vnser truͤbes herzen·
dc wir in dem gelǒben vri·
durh sine svͤssen namen dri·
behvͤte er vns vor eweclichen smerzen·
Der fúnfte vnd ǒch d ivngeste wol·
von schulde ein a adiutrix man si heissen sol·
schirmerin genennet ein helferin vúr endelose not·
maria mv̊ter reinú meit·
ein schirm vor sv́nden werken von dir ein schirmen ist vns bereit·
er helfer siner weisen dú helferin fúr iamerbernden tot·
nim vns hilf vns bringe vns von dem blike·
erledege vnd erloͤse vns vor dem schrike·
den wir han zv̊ dines kindes gerihte·
swer da vor vrteile wirt ernert·
der ist ganzer froͤiden vnverhert·
got vns gewer der selben zvoversihte·
Dis ist in vron eren done·
Unstetú welt nv sage mir·
wie ist der lon geschaffen des wir warten suln von dir·
so wir von hinnan scheiden· ich wenne es ist niht anders wan la varn·
dv volgest vns bis zv̊ dem grabe·
da hast dv eine kleine wile nach vns din vngehabe·
da mit ist es ein ende· got rv̊che dort die sele wol bewarn·
sus ist din ende vnd ǒch din lon geschaffen·
dar an gedenken leijen vnd pfaffen·
nach frúndes tode ist frúnt seltzene·
frvnt volget vrúnde ans grabes tor·
frúnt leit man in frúnt stet hie vor·
sus mv̊ssens alle ersterben des ich wene·
Anmerkungen (Wikisource)
- ↑ Vorlage: einē woꝛte einem woꝛte.
- ↑ Vorlage: vn̄ vn̄.
- ↑ Vorlage: ſebē.
- ↑ Vorlage: gefomet.
- ↑ Vorlage: ſi.
- ↑ Vorlage: v̾keit.
- ↑ Vorlage: ſchame.
- ↑ Vorlage: wibe.
- ↑ Vorlage: mīkliche.
- ↑ Vorlage: ertrank.
- ↑ Vorlage: ich ich.
- ↑ Vorlage: dc ſi got dc ſi got.
- ↑ Vorlage: ſaſte.
- ↑ Vorlage: eren.
- ↑ Vorlage: eſerie.
- ↑ Vorlage: erē.
- ↑ Vorlageeinē einē.
- ↑ Vorlage: ivgende.
- ↑ Vorlage: kleide.
- ↑ Vorlage: viſſche.
- ↑ Vorlage: blindet.
- ↑ Vorlage: ſine.
- ↑ Vorlage: in in.
- ↑ Vorlage: in.