Ich singe svnder minen dank

Ich singe svnder minen dank·
vnd ane hohgemvͤte·
die froͤidelosen machent dc·
do ich vs hohem mv̊te sang·
von eines wibes guͤte·
do konde ich wol gesingen bc·
nv lat si mir dv́ liebe gv̊te·
die vngevuͤgen an gesigen·
doh hab ich mich dvr ir valschen hůte·
der lieben trostes niht verzigen·
ich enmv́ge noh vs hohem mv̊te·
vil wol gesingen wol geligen·

IR guͤtlich lachen minneklich·
ir froͤlich stenden ǒgen·
vnd ir vil werder wibes lib·
hant mich betwungen so dc ich
gewaltes ir niht lǒgen·
ich minne si vúr ellú wib·
lat si mich nv froͤidelos beliben·
wie zimt ir reinen gute dc·
sin sol mir froͤide niht vertriben·
sit ir min herze nie vergas·
ich diene iemer gv̊ten wiben·
dur si tůt mir ir froͤide bc·

Wie kvmt dc mich ir ǒgen grůs·
noch nie gemeinen wolde^{[WS 1]}·
swie dike ich bi ir bin gewesen·
ob si mir sorgen wolde bv̊s·
noh machen als si solde·
so moͤht ich leides wol genesen·
nvn gan si mir niht des gv̊t gedingen·
von dem ich dike in froͤiden stan·
si wil mih vs dem wane bringen·
den ich doch niemer mag verlan·
vnd sol mir niht an ir gelingen·
wer wil danne alles dc ich han·

Ich wúnsche dc ich ir gelige·
so minnekliche nahe·
dc ich mich in ir ǒge ersehe·
vnd dc min stete an ir gesige·
vnd ich si guͤtlich vmbevahe·
so dc si min zefrúnde veriehe·
so trêt ich vs leide in hohgemvͤte·
ê· doh tůt mir dú sorge we·
dc si mich verge vnd ǒch ir gvͤte·
nvn sol aber ich niht wúnschen me·
wan dc ir got iemer huͤte·
vnd dc ich vro von ir besten·

Anmerkungen (Wikisource)

1. Vorlage: woldē.