Ich solde den liehten svmer loben

ICh solde den liehten svmer loben·
des han ich mich versvmet her·
dc lant ist niden vnd da bi oben·
geblvͤmet nach mis herzen ger·
dú zit vns bringet núwe fruht·
frid vnd frůt ist vns bereit·
ir swaben nemt die alten zuht·
her fúr so tragent ir eren kleit·
mit zuhten sult^{[WS 1]} ir sin gemeit·
Swem ich singe· swies erklinge·
swas ich sage· doch trage ich klage·

Min klage ist dc mich hat verwunt·
ir minneklicher ǒgen schin·
ir liehtevarwer roter mvnt·
enmitten in dc herze min·
an schoͤn an kv́sche vnd ǒch an zuht·
ist si fúr ellú wib gelobet·
ir wunnebernden reinen fruht·
an tvgenden nieman vberobet·
wan dc si an mir senden dobet·
Swem ich singe· swies erklinge·
swas ich sage· doch trage ich klage·^{[WS 2]}

Min klage ist dc ich sende not·
von der vil herzelieben han·
vnd si mir das noch nie enbot·
ich sold in ir genaden stan·
ir rede ist gege mir gar verswigen·
dc si nie wart ze mir gesprach·
svs hat dv́ liebe mir verzigen·
dc ist min klagendes vngemach·
owe dc ich si ie gesach·
Swem ich singe· swies erklinge·
swas ich sage· doch trage ich klage·^{[WS 3]}

Min klage it vngerihtet mir·
wie gv̊t gerihte· der kv́nig hat·
ob ich nv klagte das von ir·
dc si mich in den sorgen lat·
wer êhtet si danne vffen reht·
wan si wirt von mir niht genant·
nv lant gerihte wesen sleht·
es si dein rihter wol erkant·
so ist vngershtes sa zehant·
Swem ich singe· swies erklinge·
swas ich sage· doch trage ich klage·^{[WS 4]}

Min klage dv́ mag wol enden sich·
ob dv́ vil herzeliche wil·
si tv̊t gegen mir vnminneklich·
dc ist an ende vnd ane zil·
ach got wie lange sol dc wern·
dc si tút vngenade an mir·
in mac ir hulde niht embern·
vnd han doch kleinen trost von ir·
svs hindert sich mins herzen gir·
Swen ich singe· swies erklinge·
swas ich sage· doch trage ich klage·^{[WS 5]}

Anmerkungen (Wikisource)

1. Vorlage: zuht.
2. Vorlage: Swem ich singe·
3. Vorlage: Swem ich ſinge·
4. Vorlage: Swem ich ⁊c̾·
5. Vorlage: Swē ich ſinge· ſwies erklinge·