Ich vant ſi ane hůte

Ich vant ſi ane hůte·
die vil mīnekliche eine ſtan·
ia do ſpꝛach dú gůte·
was wēt ir ſo eine har gegan·
frowe es iſt alſo geſchehen^{[WS 1]}·
ſagent warvmbe ſint ir her dc ſvlt ir mir v̾iehen·

Minen ſenden kvmb̾·
klage ich liebe frowe min·
we wc ſagent ir tumb̾·
er mvgēt úwer klage wol laſſen ſin·
frowe ich enmac ir niht enbern·
ſo wil ich in tvſent iaren niemer ú gewern·

Neina kúniginne·
dc min dienſt ſo iht ſi v̾loꝛn·
ir ſint ane ſinne·
dc ir bꝛingent mich ī ſelken zoꝛn·
frowe úw̾ has tůt mir den tot·
wer hat úch vil lieber man betwūgen vf die not·

Das hat úwer ſchoͤne·
die ir hant vil mīnekliches wib·
úwer ſvͤſſen doͤne·
woltē krenkē minen ſtetē lip·
frowe niene welle got·
wert ich úch des het ir ere ſo wer min der ſpot·

So lant mich noh genieſſen·
dc ich úch vō h̾zen ie wc holt·
úch mac wol verdꝛieſſen·
dc ir úwer woꝛtel gegē mir bolt·
dunket iv min rede niht gv̊t·
ia ſi hat beſweret dike minē ſtetē mv̊t·


Ich bin ǒch vil ſtete·
ob er růchent mir der warheit iehē·
volgēt miner rete·
lat^{[WS 2]} die bete dú niemer mac beſchehē·
ſol ich alſo ſin gew̾t·
got der wer úch anderſ wa des ir an mich da gert·

Sol mich dan min ſingē·
vn̄ min dienſt gegen iv niht v̾uan·
iv ſol wol gelīgen
ane lon ſo ſult ir niht beſtan·
wie meinēt ir dc frowe gůt·
dc ir deſt werder ſint vn̄ da bi hoh gemv̊t·

Anmerkungen (Wikisource)

1. Vorlage: geſchehehen.
2. Vorlage: lāt.