Ich vant si ane hůte

Ich vant si ane hůte·
die vil minnekliche eine stan·
ia do sprach dú gůte·
was went ir so eine har gegan·
frowe es ist also geschehen^{[WS 1]}·
sagent warvmbe sint ir her dc svlt ir mir veriehen·

Minen senden kvmber·
klage ich liebe frowe min·
we wc sagent ir tumber·
er mvgent úwer klage wol lassen sin·
frowe ich enmac ir niht enbern·
so wil ich in tvsent iaren niemer ú gewern·

Neina kúniginne·
dc min dienst so iht si verlorn·
ir sint ane sinne·
dc ir bringent mich in selken zorn·
frowe úwer has tůt mir den tot·
wer hat úch vil lieber man betwungen vf die not·

Das hat úwer schoͤne·
die ir hant vil minnekliches wib·
úwer svͤssen doͤne·
wolten krenken minen steten lip·
frowe niene welle got·
wert ich úch des het ir ere so wer min der spot·

So lant mich noh geniessen·
dc ich úch von herzen ie wc holt·
úch mac wol verdriessen·
dc ir úwer wortel gegen mir bolt·
dunket iv min rede niht gv̊t·
ia si hat besweret dike minen steten mv̊t·


Ich bin ǒch vil stete·
ob er růchent mir der warheit iehen·
volgent miner rete·
lat^{[WS 2]} die bete dú niemer mac beschehen·
sol ich also sin gewert·
got der wer úch anders wa des ir an mich da gert·

Sol mich dan min singen·
vnd min dienst gegen iv niht veruan·
iv sol wol gelingen
ane lon so sult ir niht bestan·
wie meinent ir dc frowe gůt·
dc ir dest werder sint vnd da bi hoh gemv̊t·

Anmerkungen (Wikisource)

1. Vorlage: geſchehehen.
2. Vorlage: lāt.