Ich wil der lieben aber singen

Ich wil der lieben aber singen·
der ich ie mit trúwen sang·
vf genade vnd vf gedingen·
dc mir truren werde krank·
bi der ich also schone·
an eime tanze gie·
ir zeme wol dú krone·
so schone wib wart nie·
Elle vnd else tanzent wol·
des man in beiden danken sol·

INe gesach so tugentriche·
frǒwen nie des mv̊s ich iehen·
noh so rehte minnekliche·
swc ich frowen han gesehen·
des ist si vor in allen·
gewaltig iemer min·
si mv̊s mir wol gevallen·
si svͤzer selden schrin·
Elle vnd else tanzent wol·
des man in beiden danken sol·^{[WS 1]}

Selig si dú svͤze reine·
selig si ir roter mvnt·
selig si die ich da meine·
selig si so svͤzer funt·
selig si dv́ svͤze stunde·
selig si dc ich si ersach·
selig si do si mich bvnde·
dú bant si noh nie zerbrach·
Elle vnd else tanzent wol·
des man in beiden danken sol·^{[WS 2]}

Anmerkungen (Wikisource)

1. Vorlage: elle vn̄ el·
2. Vorlage: Elle vn̄ elſe tanzent wol·