Ich wil reigē

Ich wil reigē·
ſpꝛach ein wūneklichú magt·
diſen meigē·
wart mir froͤide gar v̾ſagt·
nv hat min iar ein ende·
des bin ich vꝛo·
niemā mich froͤidē wēde·
min mv̊t ſtet ho·
Mir iſt vō ſtrowe ein ſchapel vn̄ min vꝛier mv̊t· lieb̾ dāne ein roſen krāz ſo ich bin behv̊t·

Las^{[WS 1]} erbarmē·
dich ſpꝛach ir geſpil zehant·
dc mich armē
niht geſchv̊f dú gottes hant·
wan ſi geſchv̊f mih richē·
hi wer ich arn·
ſo wolt ich mit dir ſtrichē·
ze froͤidē varn·
Mir iſt vō ſtrowe ein ſchapel vn̄ min vꝛier mv̊t· lieb̾ dāne ein roſen krāz ſo ich bin behv̊t·^{[WS 2]}

Es iſt v̾dꝛôſſen·
hie ſit dc min mvͤmel hat
beſloſſē·
mir voꝛ die mine liehtē wat·
trure ich ſi giht ich habe vō liebe not·
froͤwe ich mich dc tv̊nt mīne
we wan wer ſi tot·
Mir iſt vō ſtrowe ein ſchapel vn̄ min vꝛier mv̊t· lieb̾ dāne ein roſen krāz ſo ich bin behv̊t·^{[WS 3]}

Wilt dv ſoꝛgē·
wc ſol dir din ſchon̾ lib·
dv ſolt moꝛgē·
ſant mir trurē vō dir trib·
ich wil dich lerē ſnidē·
wiſ vꝛoͤidē vol·
tůt dc we wir ſons midē·
vns wirt ſuſ wol·
Mir iſt vō ſtrowe ein ſchapel vn̄ min vꝛier mv̊t· lieb̾ dāne ein roſen krāz ſo ich bin behv̊t·^{[WS 4]}

Ich han ſchiere·
mir gedaht einē gerich·
wā ich zwiere·
ſwa man zwinget wid̾ mich·
ſi enlat mich niend̾ lachē
gegē w̾dekeit·
ſo nim ich einen ſwachen·
dc iſt ir leit·
Mir iſt vō ſtrowe ein ſchapel vn̄ min vꝛier mv̊t· lieb̾ dāne ein roſen krāz ſo ich bin behv̊t·^{[WS 5]}

Anmerkungen (Wikisource)

1. Vorlage: Das.
2. Vorlage: Mir iſt vō ſtrowe·
3. Vorlage: Mir iſt vō ſtrowe·
4. Vorlage: Mir iſt vō ſtrowe·
5. Vorlage: Mir iſt vō ſtrǒwe·