Ich wil reigen

Ich wil reigen·
sprach ein wunneklichú magt·
disen meigen·
wart mir froͤide gar versagt·
nv hat min iar ein ende·
des bin ich vro·
nieman mich froͤiden wende·
min mv̊t stet ho·
Mir ist von strowe ein schapel vnd min vrier mv̊t· lieber danne ein rosen kranz so ich bin behv̊t·

Las^{[WS 1]} erbarmen·
dich sprach ir gespil zehant·
dc mich armen
niht geschv̊f dú gottes hant·
wan si geschv̊f mih richen·
hi wer ich arn·
so wolt ich mit dir strichen·
ze froͤiden varn·
Mir ist von strowe ein schapel vnd min vrier mv̊t· lieber danne ein rosen kranz so ich bin behv̊t·^{[WS 2]}

Es ist verdrôssen·
hie sit dc min mvͤmel hat
beslossen·
mir vor die mine liehten wat·
trure ich si giht ich habe von liebe not·
froͤwe ich mich dc tv̊nt minne
we wan wer si tot·
Mir ist von strowe ein schapel vnd min vrier mv̊t· lieber danne ein rosen kranz so ich bin behv̊t·^{[WS 3]}

Wilt dv sorgen·
wc sol dir din schoner lib·
dv solt morgen·
sant mir truren von dir trib·
ich wil dich leren sniden·
wis vroͤiden vol·
tůt dc we wir sons miden·
vns wirt sus wol·
Mir ist von strowe ein schapel vnd min vrier mv̊t· lieber danne ein rosen kranz so ich bin behv̊t·^{[WS 4]}

Ich han schiere·
mir gedaht einen gerich·
wan ich zwiere·
swa man zwinget wider mich·
si enlat mich niender lachen
gegen werdekeit·
so nim ich einen swachen·
dc ist ir leit·
Mir ist von strowe ein schapel vnd min vrier mv̊t· lieber danne ein rosen kranz so ich bin behv̊t·^{[WS 5]}

Anmerkungen (Wikisource)

1. Vorlage: Das.
2. Vorlage: Mir iſt vō ſtrowe·
3. Vorlage: Mir iſt vō ſtrowe·
4. Vorlage: Mir iſt vō ſtrowe·
5. Vorlage: Mir iſt vō ſtrǒwe·