Ivnge vn̄ alte ir helfet alle froͤide m̾en

IVnge vn̄ alte ir helfet alle froͤide m̾en·
dc dú w̾lt noh w̾de vꝛo·
niemā kan vúr trurē beſſers niht gelerē·
dc weis ich vúr war alſo·
volget ſwer ú tvgēde rat·
da mit ir ſo grôſſe vnfroͤide mvget v̾kerē·
da dú w̾lt mit vmbe gat·

Wir ſin beſſer fro ſo wir nah tvgēdē ringē·
dāne ein trureklicheſ lebē·
vur die ſoꝛge ſvln wir tanzē vn̄ ſpꝛingē·
diſē rat wil ich ú gebē·
ich bin deſ gedīgē fro·
daſ mir an d̾ liebē ſol noh wol gelingē·
dú mih hat betwungē ſo·

Niemā kan mit ſw̾em mv̊te niht v̾endē·
ich bin vf genade fro·
ſelig wib ir ſvlt genade an mich wendē·
ſo ſtet mir dc h̾ze ho·
ir ſit wol dar zv̊ geſtalt·
dc ir mvgt ī trurig h̾ze froͤide ſendē·
froͤidē habt ir vil gewalt·

Frowe mir hat úw̾ ſchoͤne vn̄ úwer gvͤte·
ſv́ftēs vil vō h̾zē bꝛaht·
ſelig wib nv troͤſte ſchiere min gemvͤte·
alle tage vn̄ alle naht·
ſo v̾giſſe ich úwer niht·
dar zv̊ wúnſch ich dc dú ſelde ivh wol behvͤte·
ſwas ſo mir vō ú geſchiht·

Mich en wil d̾ liebē gvͤte niht erlâſſē·
ich betraht ir w̾dekeit·
ſone kvm ich leid̾ niend̾ ir zemazen·
ſi iſt hohe vn̄ mir zebꝛeit·
doch mag ich dc niht v̾lan·
ſin ſi iemer min gev̾te vf allen ſtraſſen·
dc ir niht v̾geſſen kan·