Jarlanc treit

Jarlanc treit·
heide breit·
manige not vnd arebeit·
si was ane leit·
do si froͤide erstreit·
vnd rosen willeklichen bar·
gruͤne kleit·
vnd weit·
ir der liehte svmer sneit·
ane kvnterfeit·
die sint nv verseit·
ir von schedelicher noͤte gar·
si mv̊s horden· leides orden·
worden· ist ir húbescheit·
vnbereit·
wan si sneit·
rife durh die werdekeit·
dc man in vermeit·
vnd maniger streit·
nah ir blv̊men wunneklich gevar·

Herze min·
vogellin·
vnd glanze rosen fin·
la nv dulten^{[WS 1]} pin·
vnd klage din·
selbes truren michel vnd stark·
tvgende schrin·
vmbe den rin·
stet vor dir beslossen· in
des torre vnd swin·
kv́nig salatin·
gab dvrh ere wilent manige mark·
nv wil schande· in maniger hande·
lande· volle komen sin·
kúnigin·
eren schin·
blichet^{[WS 2]} als ein baldegin·
dc vernezet win·
tvgende widergrin·
worden ist nv manic herre karc·

Schanden gran·
vnd ir zan·
missezierent richen man·
dem ich wirde erban·
vnd im lobes niht gan·
dvr dc ie sin herze tvgende verswůr·
eren van·
von im dan·
snvrret wîsser danne ein swan·
er ist milte wan·
dv́ von im entran·
vnd zv̊ dem tvgentrichen fůr·
im zerate· gar zespate·
krate· des gelúkes han·
sit im kan·
haften an·
git der^{[WS 3]} sich nie tvgende versan·
sit im zerran·
da dv́ selde span·
siner eweklichen wúnne snv̊r·

Anmerkungen (Wikisource)

1. Vorlage: dultent.
2. Vorlage: bliket.
3. Vorlage: er.