Jarlanc wil dú heide· mit leide
[386v]
JArlanc wil dú heide· mit leide·
vrijen vnd enploͤzen sich·
liehter blv̊men wunneklich·
die der svͤsse meie kvnde bringen·
walt von dinem kleide· nv scheide·
gruͤner[WS 1] lǒber dv versprich·
des wil rife twingen dich·
vnd der sne mit angest bernden dingen·
lerche troͤschel nahtegal·
amsel vnd galander·
húre mit ein ander· wol svngen
die nv swigent vber al·
manigen froͤiderichen schal·
hat dv́ kalte winter zit verdrungen·
Swer mit lieben wiben· vertriben·
sol die langen winterzit·
hei wc dem wunnen git·
minne bi den herze svͤssen frǒwen·
wer mac von ir liben· geschriben[WS 2]·
wc an in gewinnes lit·
vnd froͤide an allen strit·
wan sol wib fúr liehte blv̊men schowen·
vnd fúr der vogel sanc·
wiblich kosen hoͤren·
got in sinen koͤren· zemv̊te
wc vil wol do sin gedanc·
reinú wib an allen wanc·
schv̊f dem man zeselden vnd zegv̊te·
Ich wil vmb ein lehen· nv flehen·
frowen húbesch vnd frůt·
dc ir edelú minne gv̊t·
argen herren als nv́tze werden mvͤsse·
sam ein stift der zehen· swer vehen·
kvnne tvgentrichen mv̊t·
dem werde iemer vor behv̊t·
hohgelopter wibe minne svͤsse·
swer niht ere[WS 3] meinen kan·
wie sol der geminnen·
reines wib mit sinnen· getrúwen·
wissent dc vnertic man·
lieb von grunde nie gewan·
wan sin trúten bringet leides rúwen·