Jvnger man wis hohes mv̊tes

Jvnger man wis hohes mv̊tes·
dvr dú reinen wolgemv̊ten wib·
frǒwe dich libes vnd gůtes·
vnd wirde dinen ivngen lip·
ganzer froͤide hast dv niht·
so man die werdekeit von wibe an dir niht siht·

Er hat rehter froͤide kleine·
der si von gv̊ten wiben niht ennimt·
offenbar stille vnd eine·
vnd als es der mâsse danne zimt·
daran gedenke ivnger man·
vnd wirb nach herzeliebe da gewinnest an·

Ob dv es danne niht erwirbest·
dv mv̊st doch iemer deste túrre sin·
dast an froͤiden niht verdirbest·
dc kvmt alles von der frowen din·
dv wirst also wol gemv̊t·
dc dv den andern wol behagest swie si dir tůt·

Ist aber dc dir wol gelinget·
so dc ein gv̊t wib din genade hat·
hei wc dir danne froͤiden bringet·
so si svnder wer vor dir gestat·
halsen trúten bi gelegen·
von so rehter herzeliebe mv̊st dv́ froͤiden pflegen·

Sich nv hab ich dich geleret·
des ich selber leider nie gepflag·
vngelùke mir verkeret·
dc ein selig man vol enden mag·
doch tv̊t mir der gedinge wol·
vnd der wille den ich han dc ichs noch erwerben sol·