Kint vnd welle dich gelúke miden
[367v]
Kint vnd welle dich gelúke miden·
dc dir got armv̊t gebe an libe vnd ǒch an gůte·
dc solt gedulteklich liden·
vnd ensolt darvmbe han kein truren in dem mv̊te·
dv solt im es genade sagen· mit herzen vnd mit gedaͤnken·
niemer solt dv dar an gewaͤnken·
sich so heizet er dir dort die werden froͤide schenken·
Kint armv̊t dc wissest trut geselle·
swer die willekliche hat dc solt dv mir gelǒben·
den ernert si vor der tiefen helle·
si kan den lip die sele vor allen sv́nden rǒben·
armv̊t ist gegen gotes zorne dú hohste sv̊nerinne·
zwischen gote vnd vns vuͤget si die minne·
die kein engel fuͤgen kan dc nim in dine sinne·
Kint armv̊t die minnete der erste vnd der herste·
der ie wc vnd iemer ist an ende·
armv̊t wc sin anevang zemerste·
do in dú svͤze mv̊ter sin gebar in dis ellende·
armv̊t leit er naht vnd tag mit armv̊t schiet er hinnen·
mit armv̊t mv̊ster vns widergewinnen·
sich die mv̊st dv minnen ǒch wiltu der helle entrinnen·
Kint dvn la dich nieman des betriegen·
dv enminnest armv̊t· dvr got in dem herzen·
so mv̊st dv dich zv̊ der helle biegen·
da dv an ende dvlden mv̊st den iemer wernden smerzen·
got enwolte der mv̊ter sin niht geben zwei himelriche·
bitter armv̊t leit dú minnekliche·
der an wirde mensche wart noh engel nie geliche·
Kint got sprach mit sin selbes mvnde·
dc dc himelriche si der willeklichen armen·
dc nim in din herze zaller stvnde·
noh en la den mv̊t nah horde selten dir erwarmen·
gv̊t ist ane mazen schade ze dem eweklichen heile·
es verleitet den man an manigem teile·
da von wende drabe den mv̊t wellest dv dort sin geile·
Liebes kint nv wil ich dir betúten·
wa von gv̊t ist also schade· da mans niht hat zemaze·
es lat got von herzen selten trúten·
es hat im vil manige sele erwant an siner strasse·
es birt hohvart hohen mv̊t vnd gotes vil vergessen·
es wil han wib win vnd svͤzú essen·
da von maniger mv̊z [368r] hin abe den weg zer helle messen·
Kint nú wil ich dir bescheiden mere·
wa von gv̊t ist also schade gegen gote vnd gegen den luten·
es tv̊t manigen[WS 1] gǒch als vberhere·
dc sin blindes herze en kan niemanne dehein ere erbieten·
so ist es ǒch von art also swelh man sin iht gevahet·
dc der alzehant den mv̊t versmahet·
da von er gotte verret vnd der helle nahet·
Kint nv wil ich dir noh bc bescheiden·
wa von gv̊t ist also schade gegen gotlichen dingen·
es kan geistlich leben sere leiden·
es kan wenden vngemach vnd zartes leben bringen·
es kan vs dem herzen iagen die svͤzen gottes minne·
swa din hort ist da sit dine sinne·
sprach got selbe sich dv́ wort dú la dir alten inne·
Kint nv wil ich dich noh bc bewisen·
wa von gv̊t ist also schade ze dem himelsllichen chore·
sich es machet manigen[WS 2] alten grisen·
dc er wirt an gůten werken tvmb alsam ein tore·
wan sin geiles herze wirt so vule von dem gv̊te·
dc er got vertribet vs dem mv̊te·
der in an dem krúze erloste mit sins herzen blv̊te·
Kint sist dv versmahet von den lúten·
dc dv gv̊tes niht enhast dc la dir niht sin swere·
sich got wil dich lieblich drvmbe trúten·
an der stunt da im vil richer lúte wirt vnmere·
nim ein weder hie din wol oder dort din we an ende·
doh nim hie din we dar an genende·
vmbe dort iemer werndes wol nach dirre welte ellende·
Kint got wart nie niht so lieb so mere·
als im ist demvͤtekeit an mannen vnd an wiben·
vnd da wider nie niht also swere·
sam dú hohvart wan si kan ir kint zeder helle triben·
sich nv en sihest dv ir niender me danne vnder richen lúten·
die kvnnen sich ir zedienste erbúten·
naht vnd tag da von solt dv richeit zemaze trúten·
Kint fúnf dinge solt dv haben minne·
wellest dv dc dir got lone diner armvͤde·
reinekeit die nim in dine sinne·
kúschekeit in dc herze din die milte in din gemvͤte·
naht vnd tag solt dv demůt vúr dinú ǒgen spannen·
gedultig sin gegen frowen vnd gegen mannen·
sih so wirdest dv niht dort mit den bennigen verbannen·
So die richen lúte sint gedrungen·
an dc alter dc si niht mvgen me die hohvart vͤben·
so spizzent si aber vf die ivngen·
vnd lerent si hohvart dú got da kan betruͤben·
svs hant si die hohvart vnz an dc ende·
so scheident si dir von dc ist vnwende·
got dvrh sinen tot vns allen sin genade sende·