Kv́nd ich wol mit worten schône

aus Wikisource, der freien Quellensammlung
Zur Navigation springen Zur Suche springen
Textdaten
Autor: Eberhard von Sax
Illustrator: {{{ILLUSTRATOR}}}
Titel: Kv́nd ich wol mit worten schône
Untertitel:
aus: UB Heidelberg 49r und UB Heidelberg 49v
Herausgeber:
Auflage:
Entstehungsdatum: 13. und 14. Jahrhundert
Erscheinungsdatum: Vorlage:none
Verlag: Vorlage:none
Drucker: {{{DRUCKER}}}
Erscheinungsort:
Übersetzer:
Originaltitel:
Originalsubtitel:
Originalherkunft:
Quelle: UB Heidelberg und UB Heidelberg
Kurzbeschreibung:
Mit aufgelösten Lettern. Vergleiche auch Kv́nd ich wol mit woꝛten ſchône in Originallettern.
Wikipedia-logo-v2.svg Artikel in der Wikipedia
Eintrag in der GND: {{{GND}}}
Bild
[[Bild:|250px]]
Bearbeitungsstand
korrigiert
Dieser Text wurde anhand der angegebenen Quelle einmal Korrektur gelesen. Die Schreibweise sollte dem Originaltext folgen. Es ist noch ein weiterer Korrekturdurchgang nötig.
Um eine Seite zu bearbeiten, brauchst du nur auf die entsprechende [Seitenzahl] zu klicken. Weitere Informationen findest du hier: Hilfe
[[index:|Indexseite]]

[49r]

Kv́nd ich wol mit worten schône
wirken ganzes lobes krône·
wirdeklich in suͤssem dône·
gezieret nâch dem willen min·
gar nach êren als ich meine·
die wolde ich der megde reine·
dú îe stv̊nt gelichen eine·
smiden âne valschen schin·
nv hat mir den sin bestúrzet·
das ir lop noch stetgekv́rzet·
vnd doch dike hat gewirzet· in so kv́nstrichen sin·

Dv bist gar vor allem růme·
kúscher scham ein blvͤnder blůme·
gib von diner gnaden tv̊me mir dins lobes anevang·
sich hat schone vnderscheiden·
gottes wort· do es sich weiden·
wolt in dir vnd von dir kleiden·
sich dar nach sin guͤte ie rang·
dv bist der beslozzen garte·
den got selber im bewarte·
da er wont mit suͤssem zarte·
menschlich lob ist dir ze krank·

Dv bist der nature wvnder
himel erd lobt dich bisvnder·
von des hoͤhsten geistes zvnder
din lip gar gepúret stat· wan dv genzelich enbrvnnen·
were von dem waren svnnen·
der von dir ist vs gerunnen· vnd v́ns alle erlúhtet hat·
din vrid ist gar vngemessen·
got an dir niht hat vergessen·
dich dvr fúllet vnd besessen· hat sin hohe maiestat·

Dv́ kv́schekeit dú ie blůte·
sam hern aarones růte·
wnneklich in dinem mv̊te·
hat gezieret dinen kranz·
das bevant nach waren sinnen·
Moýses do er sach brinnen·
einen boschen vs vnd innen· ane mâzen vnd ganz·
wir mvn merken an dem trone·
den der kv́nig salamone· hat gebúwen alze schone·
das din lob stet ane schranz·
 Jn der hohsten wisheit râte·
got dich selbe nach wnsche drate·
als er din begeret hâte· zeinem svnder stv̊le sin·
der so hohe hat gereiget· das er sich dar in geneiget
hat als es was vorgezeiget· von der grozen wirde din·
wer mag wol din lob gesingen·
volleklichen ze liehte bringen·
est verzigen allen dingen· so clar ist sin reiner schin·

Dich bezeichent hat dv́ gerte·
kv́ng· asweres die er kerte·
dem den er sinhulde lerte· oder sinen senften mv̊t·
sw̾ hie dine gnade vindet·
dem wirt dort got so gelindet·
das er in im sa gesindet v́ber sin erweltes gv̊t·
von Jacob vf gen der sterne·
swer in dinem liehte gerne·
gat der wisse das er lerne· wie er gottes willen tv̊t·

Ezechiel sach ein porte· ie beslozzen zallem orte·
da got ein mit sinnem worte· tǒgenlich kan ingegan·
zu dir gar dvr reine schǒwe·
die er vant an dir o frǒwe·
aller tvgent ein blvͤnde ǒwe· rosegarte dornes an·
da der blůme wart gezwîget·
der v́ns alle hat gevriget·
die mit svͤnden wan besnîget· sin kraft ist so heilsan·

Des kraft nie wart úberwnden·
senfteklichen wart gebvnden·
zů dir an dien selben stvnden·
do dv eine dirne dich· butte got dc er dich suͤssen·
zeiner mv̊ter wolde gruͤssen·
davon wir dir iehen mvͤssen·
das dv bist genadenrich· davon dv do swanger were·
gottes svn den dv gebere· disú vroͤidebernden mere·
machent dich vil minneklich·

Dv gelichest wol dem schrîne·
v́ber gúldet nach dem liehten schîne·
wol gewirket von sechîne·
das man niht erw̾den siht·
der das himelbrôt beslossen·
hat das ie ist vmbedrossen·
dem der sin iht hat genossen· oder ioch befvnden iht·
der vil edel margarîte· bi dir in der gnaden zîte·
fvnden wart der dich so vrîte·
das man dir vil gůtes giht·

Din lob nieman v́berstigen·
mag doch wil ich sin niht swîgen·
diner hohen wirde nîgen·
mv̊s dest reinen engel schar·
von dir wart der vmbevangen·
des kraft nieman kan erlangen·
den slus dv in deinen angen·
da wart er von dir gevar·
do er in dir menschlich bilde·
einte siner gotheit wilde·
swen dins lobes ie bevilde·
der ist rehter sinne bar·

Dv hast ellú wip geprîset·
wie v́ns eîne [49v] hab verwîset· do si wider got gespîset·
wart nach ir gelúste krank· die hast dv von ittewîsse·
vsgenomen mit tugenden vlîsse·
swas dir ieman lobes risse·
das ist eines schatten wank·
nach der wirde diner eren·
die kein zvnge mag geleren·
in gůt ende kanst dv keren· eren tvmben anevank·

Got in sÎnes geistes brv̊nste· an dir zeigte sine kv́nste·
do er aller svͤnden túnste· gar von dir geveimet hat·
dv bist in der minne smitten·
so geziert mit reinen sîtten·
das din kvme hat erliten· dv́ vil hohe trinitât·
dv bist der gezeichent brvnne·
dar in schein dv́ lebendv́ svnne·
gar mit aller tvgenden wnne·
ist geblůmet wol din wat·
Dv bist gottes paradise· da gepflanzet wart dv́ spise·
dv́ nach wnschricher wise· alle girde fúllen mak·
von des suͤsten geistes tǒwe·
wêr dv berhaft reinv́ frǒwe·
gar an alles wandels schǒwe·
rehter kv́sche ein liehter tak·
we koͤnd ich din lob so velzen·
das es wenken noch gewelzen·
moͤht mit golde wol dvr smelzen·
dar nach als din wirde iê wak·

Dv bist aller selden gimme·
wan dv́ suͤsse gottes stimme·
dich vs allen frǒwen imme·
zeiner[WS 1] mv̊ter vserlas·
den dv maget doch gebere·
ane scham vnd ane swere· da bi alles serês lere·
sam dv́ svnne· dvr das glas·
vs vnd in kan er gegangen·
sensteklichen ane drangen· bi dir minneklich gevangen·
des kraft vngemessen was·

Frǒwe din lob ist zewilde·
wan an dinem schonem bilde·
gotte wnders nie bevilde· da er in dvr wnne siht·
dv hast hohe vfgedrvngen·
swas dir aller menschen zvngen·
riches lobes ie gesvngen· das ist alles doch ein niht·
swer din loblich wil gedenken·
dem mv̊st dv gnade schenken·
von dem brvnnen vnd trenken·
den man aller wisheit giht·

 Usser der propheten mvnde·
vil man dines lobes fvnde· der wol sůchen kvnde·
vnd volklichen spehen· in dem bůche von der minne·
da bistu gepruͤvet inne· wol nach loberichem sinne·
sam die wisen mvͤssen iehen·
got in sinem hohen trône· hat begert diner schone·
da er wil o wibes crone· mît gelúste dich ansehen·

Swer nv rehte wil erkvnnen·
wer dv́ ist dv́ mit derê svnnen·
ist bekleit mit richen wnnen·
gecroͤnet mit zwelf sternen clar·
vnd ir schamel ist der mâne·
das ist alles zwinels âne·
in der warheit niht nach wâne·
dú maget dv́ got gebar· ellú crêatúre zeiget·
din lob vnd wirt doch erreiget·
niht wan got hat sich geneiget·
din̾ minne wnne var·

Der berg davon wart gesnitten·
ein stein niht nach menschen sîtten·
bist dv des wir kv̂m erbitten·
han er ist so tvgentsam·
er kan heilen alle wnden·
der mit sv́nden ist gebvnden·
loͤset er alsa zestvnden· vnd bedeket alle scham·
in dir wůchs der leben de sâme·
der gelobt hern abrahâme·
wart von gotte ze selden krame·
als siner gvͤte zam·

Dines lobes vnderwinden·
ist gespilt nach sitte der kinden·
von den varwen sam des blinden·
sprechen die er nie gesach·
als ist ǒch in minem mvnde·
din lob frǒwe wie gerne ich kvnde·
dich geprisen wol von grvnde·
nv ist mir dv́ kvnst ze swach·
ich wêne alle engel kv́nden·
din lob niht ze reht ergrv́nden[WS 2]·
ob sis ioch mit vlîze begv́nden·
wan im endes ie gebrach·

Můter der vil schonen minne·
in der vinster lúhterinne·
zv́nde enbrenne mine sinne·
in der waren minne glůt·
da ich inne werde gereinet·
vnd mit gotte gar vereinet·
was ich anders hab gemeinet·
das bedeke frǒwe gůt·
frǒwe erbarme zallen stvnden·
wan dv hast genade fvnden·
gottes zorn hat v́berwnden·
din vil tvgentricher mv̊t·

Anmerkungen (Wikisource)

  1. Vorlage: zeinr.
  2. Vorlage: ergv́nden.